ନୂଆଦିଲ୍ଲୀ, ୧୩।୯: ସ୍ପଟ୍ ଫିକ୍ସିଂ ମାମଲାରେ ଭାରତୀୟ କ୍ରିକେଟ୍ ଦଳର ଦ୍ରୁତ ବୋଲର ଏସ୍. ଶ୍ରୀସନ୍ଥଙ୍କ ଉପରେ ଲାଗିଥିବା ୭ ବର୍ଷର ବାସନ୍ଦ ଅବଧି ରବିବାର (ସେପ୍ଟେମ୍ବର ୧୩) ଶେଷ ହୋଇଛି। ଶ୍ରୀସନ୍ଥଙ୍କ ଉପରେ ପ୍ରଥମେ ଆଜୀବନ ବାସନ୍ଦାଦେଶ ଲାଗୁ ହୋଇଥିଲା। କିନ୍ତୁ ସେ ଏହି ନିଷ୍ପତ୍ତି ବିରୋଧରେ ଆଇନଗତ ଯୁଦ୍ଧ ଲଢ଼ିଥିଲେ। ପରେ ଏହା ୭ ବର୍ଷକୁ କମି ଯାଇଥିଲା। ୩୭ ବର୍ଷୀୟ ଏହି କେରଳ ଦ୍ରୁତ ବୋଲର ବହୁ ପୂର୍ବରୁ ସ୍ପଷ୍ଟ କରି ଦେଇଛନ୍ତି ଯେ, ବାସନ୍ଦ ଅବଧି ସମାପ୍ତ ହେବା ପରେ ଅନ୍ତତଃ ପକ୍ଷେ ସେ ଘରୋଇ କ୍ରିକେଟ୍ ପୁଣିଥରେ ଆରମ୍ଭ କରିବାକୁ ଲକ୍ଷ୍ୟ ରଖିଛନ୍ତି। ସେହିଭଳି ଶ୍ରୀସନ୍ଥଙ୍କ ଘରୋଇ ଦଳ କେରଳ ପକ୍ଷରୁ ମଧ୍ୟ କୁହାଯାଇଛି, ଯଦି ଏହି ଦ୍ରୁତ ବୋଲର ଫିଟ୍ନେସ ପ୍ରମାଣିତ କରିପାରନ୍ତି ତେବେ ତାଙ୍କ ନାମ ବିଚାରକୁ ନିଆଯିବ।
ଅବଧି ଶେଷ ହେବାର ୨ ଦିନ ପୂର୍ବରୁ ଅର୍ଥାତ୍ ଶୁକ୍ରବାର ଶ୍ରୀସନ୍ଥ ଟୁଇଟରରେ ଉଲ୍ଲେଖ କରିଥିଲେ, ‘ମୁଁ ବର୍ତ୍ତମାନ କୌଣସି ପ୍ରକାର ଅଭିଯୋଗରୁ ସମ୍ପୂର୍ଣ୍ଣ ମୁକ୍ତ। ଏବେ ମୁଁ ସେହି ଖେଳକୁ ଖେଳିପାରିବି ଯାହାକୁ ସବୁଠୁ ଅଧିକ ପସନ୍ଦ କରେ। ପ୍ରତ୍ୟେକ ବଲ୍ରେ ମୁଁ ମୋ ଶ୍ରେଷ୍ଠତ୍ୱ ଦେବାକୁ ଚେଷ୍ଟା କରିବି। ମୋ ନିକଟରେ ଏବେ ଆହୁରି ୫-୭ ବର୍ଷର ଖେଳ ବାକି ରହିଛି। ଯେଉଁ ଟିମ୍ ପକ୍ଷରୁ ଖେଳିବି ଶ୍ରେଷ୍ଠତ୍ୱ ଦେବାକୁ ଚେଷ୍ଟା କରିବି।’ ଏଠାରେ ସ୍ମରଣଯୋଗ୍ୟ, ୨୦୧୩ ଆଇପିଏଲ୍ରେ ସ୍ପଟ୍ ଫିକ୍ସିଂ ମାମଲାରେ ରାଜସ୍ଥାନ ରୟାଲ୍ସ ପକ୍ଷରୁ ପ୍ରତିନିଧିତ୍ୱ କରୁଥ୍ତ୍ବା ଶ୍ରୀସନ୍ଥଙ୍କୁ ପ୍ରଥମେ ଆଜୀବନ ବାସନ୍ଦ କରାଯାଇଥିଲା।