ସାଧାରଣତଃ ଘରେ ଏସି, ଫ୍ରିଜ୍, ଫ୍ୟାନ୍, କୁଲର, ଲାଇଟ୍ ଇତ୍ୟାଦି ଲାଗିଥିବାରୁ ଅଧିକ ଇଲେକ୍ଟ୍ରି ବିଲ୍ ଆସିଥାଏ। ମାତ୍ର କିଛି ଟିପ୍ସ ଆପଣାଇଲେ ବିଜୁଳି ସଞ୍ଚୟ ହେବା ସହ ଆପଣଙ୍କର ବିଲ୍ ମଧ୍ୟ କମ୍ ଆସିବ। ଜାଣନ୍ତୁ ଏ ସମ୍ପର୍କରେ…
ଧ୍ୟାନ ରଖନ୍ତୁ ଘରେ ଆଲୋକୀକରଣ ପାଇଁ ବଲ୍ବ ସ୍ଥାନରେ ଏଲଇଡି ବ୍ୟବହାର କରନ୍ତୁ। ଆବଶ୍ୟକ ନ ଥିଲେ ତୁରନ୍ତ ଲାଇଟ୍ ବନ୍ଦ କରିଦିଅନ୍ତୁ। ଟ୍ୟୁବ୍ଲାଇଟ୍ ଏବଂ ଲ୍ୟାମ୍ପ୍କୁ କିଛି ସମୟ ଅନ୍ତରରେ ସଫା କରନ୍ତୁ। କାରଣ ମଇଳା ଲାଇଟ୍ରେ ଆଲୋକ କମ୍ ହୋଇଥାଏ। ଏହାର ପ୍ରଭାବ ଇଲେକ୍ଟ୍ରି ବିଲ୍ ଉପରେ ପଡ଼ିଥାଏ। ଫ୍ଲୋରୋସେଣ୍ଟ୍ ଟ୍ୟୁବ୍ ଲାଇଟ୍ ଏବଂ ସିଏଫ୍ଏଲ୍ ସାଧାରଣ ବଲ୍ବଠାରୁ ୫ ଗୁଣ ଭଲ ହୋଇଥାଏ। ଖାଲି ଏତିକି ନୁହେଁ, ଏହା ଦ୍ୱାରା ଇଲେକ୍ଟ୍ରି ବିଲ୍ ମଧ୍ୟ କମ୍ ଆସିଥାଏ।
ଦେଶରେ ସୌରଶକ୍ତିର ବ୍ୟବହାର କରାଯାଉଛି। ବିଜୁଳି ବଞ୍ଚାଇବା ପାଇଁ ସୌରଶକ୍ତି ହିଁ ସବୁଠୁ ଭଲ ବିକଳ୍ପ। ସୌର ପ୍ୟାନେଲକୁ ଦୋକାନ କିମ୍ବା ଘରର ଛାତ ଉପରେ ଆରାମରେ ରଖି ପାରିବେ। ଥରେ ପଇସା ଖର୍ଚ୍ଚ ହେଲେ ମଧ୍ୟ ଦୀର୍ଘଦିନ ଏହା ଇଲେକ୍ଟ୍ରି ବିଲ୍ କମ୍ କରିବ। ବୈଜ୍ଞାନିକଙ୍କ ଅନୁଯାୟୀ, 1kwp ସୋଲାର ରୁଫ୍ ଟପ୍ ପ୍ଲାଣ୍ଟ ପ୍ରତିଦିନ 4.6kwh ବିଜୁଳି ଉତ୍ପନ କରିଥାଏ।
ଇଲେକ୍ଟ୍ରୋନିକ୍ ସାମଗ୍ରୀକୁ ଠିକ୍ ସ୍ଥାନରେ ରଖିବା ଜରୁରୀ। ଫ୍ରିଜ୍କୁ ଏମିତି ସ୍ଥାନରେ ରଖନ୍ତୁ ଯେଉଁଠି ସିଧାସଳଖ ଖରା ପଡ଼ିବ ନାହିଁ। ଗରମ ହେଉଥିବା ସ୍ଥାନଠାରୁ ଦୂରେଇ ରଖନ୍ତୁ। ଫ୍ରିଜ୍ରେ ଗରମ ଖାଦ୍ୟ ନ ରଖି ଥଣ୍ଡା ହେବା ପରେ ରଖନ୍ତୁ। କଏଲକୁ ନିୟମିତ ଭାବେ ସଫା କରନ୍ତୁ। ଫଳରେ ଠିକ୍ ଭାବରେ ବାୟୁ ଚଳାଚଳ ହୋଇପାରିବ।
ଏସିକୁ ସଠିକ୍ ତାପମାତ୍ରାରେ ଚଲାନ୍ତୁ। ଧ୍ୟାନ ରଖନ୍ତୁ ଏସିକୁ ପ୍ରାୟ ୨୫ ଡିଗ୍ରୀ ମଧ୍ୟରେ ଚଲାନ୍ତୁ। ଯାହାଦ୍ୱାରା ଆପଣଙ୍କ ବିଜୁଳି ବଞ୍ଚିପାରିବ। ଏସି ଅପେକ୍ଷା ସିଲିଂ କିମ୍ବା ଟେବୁଲ୍ ଫ୍ୟାନ୍ ସର୍ବଦା ବ୍ୟବହାର କରନ୍ତୁ। ଏମିତି କଲେ ଏଥିରୁ ୪୦ ପ୍ରତିଶତ କମ୍ ବିଲ୍ ଆସିବ।
ଏହାବ୍ୟତୀତ କମ୍ପ୍ୟୁଟର, ଟିଭି ମଧ୍ୟ ଇଲେକ୍ଟ୍ରି ବିଲ୍ ବଢ଼ାଇଥାନ୍ତି। ବ୍ୟବହାର କରୁ ନ ଥିବା ସମୟରେ ତୁରନ୍ତ ଏହାକୁ ବନ୍ଦ କରି ରଖନ୍ତୁ। କମ୍ପ୍ୟୁଟର, ମନିଟରର ବ୍ୟବହାର ନ ଥିଲେ ସ୍ଲିପ୍ ମୋଡ୍ରେ ସେଟ୍ କରନ୍ତୁ। ଏପରି କଲେ ଏଥିରୁ ମଧ୍ୟ ଆସୁଥିବା ବିଲ୍ ୪୦ ପ୍ରତିଶତ କମିଯିବ।