ନୂଆଦିଲ୍ଲୀ,୨୩।୧୨: ଗୋଟିଏ ପଟେ ବିରାଟ-ବିସିସିଆଇ ମଧ୍ୟରେ ବିବାଦ ଥମି ନ ଥିବା ବେଳେ ପୁଣି ଏକ ନୂଆ ବିବାଦ ମୁଣ୍ଡ ଟେକିଲାଣି। ସେଇଟି ଭାରତୀୟ କ୍ରିକେଟର କିମ୍ବଦନ୍ତୀ ସ୍ପିନର ରବିଚନ୍ଦ୍ରନ ଅଶ୍ୱିନଙ୍କ ବିବୃତ୍ତିକୁ ନେଇ। ପୂର୍ବତନ ଭାରତୀୟ ପ୍ରଶିକ୍ଷକ ରବି ଶାସ୍ତ୍ରୀଙ୍କ ବିଷୟରେ ସେ ବିସ୍ଫୋରକ ବିବୃତ୍ତି ଦେବା ପରେ ତାହାକୁ ନେଇ ଚର୍ଚ୍ଚା ଜୋର ଧରିଛି। ତେବେ ଏଭଳି କଥା ଯୋଗୁ ଦଳର ପରିବେଶ ଭଲ ରହିବ ନାହିଁ ବୋଲି ପୂର୍ବତନ ଭାରତୀୟ ଉଇକେଟକିପର ବ୍ୟାଟ୍ସମ୍ୟାନ୍ ସବା କରିମ କହିଛନ୍ତି।
ଅଶ୍ୱିନ ଏକ ସାକ୍ଷାତକାରରେ କହିଛନ୍ତି, ଶାସ୍ତ୍ରୀ ଉପରେ ସେ ଖପ୍ପା ଥିଲେ। କାରଣ ସେ ଏକ ବୟାନରେ ଭାରତର ଚାଇନାମ୍ୟାନ୍ ବୋଲର୍ କୁଲଦୀପ ଯାଦବ ବିଦେଶୀ ମାଟିରେ ସର୍ବଶ୍ରେଷ୍ଠ ସ୍ପିନର ବୋଲି କହିଥିଲେ। ସେହି ବିବୃତ୍ତି ବିଷୟରେ ଉଲ୍ଲେଖ କରି ଅଶ୍ୱିନ କହିଛନ୍ତି, ରବି ଭାଇଙ୍କ ପ୍ରତି ମୋର ବହୁତ ସମ୍ମାନ ରହିଛି। ଆମେ ସମସ୍ତେ ମଧ୍ୟ ତାଙ୍କୁ ସମ୍ମାନ କରୁ। ହେଲେ ସେହି ବିବୃତ୍ତି ନେଇ ମୁଁ ଭାଙ୍ଗି ପଡ଼ିଥିଲି। ସାଥୀ ଖେଳାଳିଙ୍କ ସଫଳତାରେ ଖୁସି ହେବା ଉଚିତ ବୋଲି ଜାଣେ। ମୁଁ କୁଲଦୀପଙ୍କ ପାଇଁ ଖୁସି ଥିଲି। ସେ ଅଷ୍ଟ୍ରେଲିଆରେ ୫ ଉଇକେଟ ନେଇଥିଲେ, ହେଲେ ମୁଁ ପାରି ନ ଥିଲି। ଏ କେତେ ବଡ଼ ମୁଁ ଜାଣେ। ହେଲେ ତାଙ୍କ କଥା ମୋତେ ବହୁତ ଆଘାତ ଲାଗିଥିଲା। ମୁଁ ରୁମ୍କୁ ଫେରି ସ୍ତ୍ରୀଙ୍କ ସହ କଥା ହୋଇଥିଲି। ପରେ ମୁଁ ହସି ହସି ଖୁସିରେ ସାମିଲ ହୋଇଥିଲି।
ଅପରପକ୍ଷେ ଅଶ୍ୱିନଙ୍କ ବିବୃତ୍ତି ନେଇ ସବା କରିମ କହିଛନ୍ତି, ଏଭଳି ଘଟଣା ଯେତେବେଳେ ସାମ୍ନାକୁ ଆସେ ସେତେବେଳେ ଦଳର ପରିବେଶ ଭଲ ରଖିବା କଷ୍ଟକର। ଏବେ ରାହୁଲ ଦ୍ରାବିଡ଼ଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିବ। ଏଭଳି ସ୍ଥିତିରେ ଅଧିନାୟକ ଉପରେ ଚାପ ପକାଇବା ଉଚିତ ନୁହେଁ।