କେନ୍ଦ୍ରାପଡ଼ା ଅଫିସ, ୨୮।୮: କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ବତୀଘର ପଞ୍ଚାୟତ ନିପାଣିଆ ଗ୍ରାମର ସବିତା ଗିରି ଓ ପୂର୍ଣ୍ଣିମା ଗିରି ବିଜୁ ପଟ୍ଟନାୟକ ସାହସିକତା ପୁରସ୍କାର ପାଇବେ। ଏ ନେଇ ଜିଲା କ୍ରୀଡା ବିଭାଗ ପକ୍ଷରୁ ଗୁରୁବାର ସୂଚନା ଦିଆଯାଇଛି।
ଜିଲା କ୍ରୀଡା ଅଧିକାରୀ ଲୋକନାଥ ପାଣିଗ୍ରାହୀଙ୍କ ସୂଚନା ଅନୁଯାୟୀ, ଆସନ୍ତା ୨୯ରେ ଭୁବନେଶ୍ୱର ଲୋକସେବା ଭବନ ପରିସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଦୁଇ ବାଳିକାଙ୍କୁ ପୁରସ୍କୃତ କରିବେ। ସୂଚନାଯୋଗ୍ୟ, ୨୦୧୯ରେ ଜଗତ୍ସିଂହପୁର ଜିଲା ହସିଣା ଗ୍ରାମର ୫୫ ଜଣ ଲୋକ ବତୀଘର ପଞ୍ଚାୟତର ହୁକିଟୋଲାକୁ ପର୍ଯ୍ୟଟନରେ ଆସିଥିଲେ। ସନ୍ଧ୍ୟାରେ ଫେରିବା ସମୟରେ ପର୍ଯ୍ୟଟକ ବସିଥିବା ଡଙ୍ଗାଟି ନିପାଣିଆଠାରେ ଓଲଟି ପଡିଥିଲା। ଏହି ସମୟରେ ସବିତା ଓ ପୂର୍ଣ୍ଣିମା କୁମ୍ଭୀର ସାଲୁବାଲୁ ନଦୀରେ ପଶି ୧୨ ଜଣଙ୍କୁ ଉଦ୍ଧାର କରିଥିଲେ। ତେବେ ଏହି ଦୁର୍ଘଟଣାରେ ୧୦ ଜଣ ମହିଳା ଓ ଶିଶୁଙ୍କ ମୃତ୍ୟୁ ହୋଇଥିଲା।