ପିପିଲି, ୯।୧(ସ୍ବ.ପ୍ର.): ପୁରୀ ଜିଲା ପିପିଲି ପୌରାଞ୍ଚଳ ଅଧୀନ ଭବାନୀପୁର ୮ନଂ. ୱାର୍ଡର ବାସିନ୍ଦା ହେଉଛନ୍ତି ସବ୍ନମ୍(୨୬)। ତାଙ୍କର ଦୁଇଟିଯାକ କିଡ୍ନୀ ନଷ୍ଟ ହୋଇଯାଇଛି। ତାଙ୍କ ଚିକିତ୍ସାରେ ଅର୍ଥାଭାବ ବାଧକ ସାଜିଛି। ସ୍ବାମୀ ପରିତ୍ୟକ୍ତା ସବ୍ନମ୍ ଏବେ ନିଜ ବୃଦ୍ଧ ବାପାଙ୍କ ପାଖରେ ଆଶ୍ରୟ ନେଇଛନ୍ତି। ଦୁଃଖକଷ୍ଟ ଏବଂ ଅଭାବ ଅନଟନ ଭିତରେ ତାଙ୍କର ଜୀବନ ବିତୁଛି। ଏଭଳି ସ୍ଥିତିରେ ଅସହାୟା ସବ୍ନମ୍ଙ୍କୁ ୪ବର୍ଷ ପୁଅର ଚିନ୍ତା ଘାରିଛି। ସେ କିପରି ଜୀଇଁବ, ପାଠ ପଢ଼ି ନିଜ ଭବିଷ୍ୟତ ଗଢିବ ଆଦି ନାନା ଚିନ୍ତା ତାଙ୍କ ମନକୁ ଭାରାକ୍ରାନ୍ତ କରିଦେଉଛି।
କୋହଭରା କଣ୍ଠରେ ସବ୍ନମ୍ କହିଛନ୍ତି, ୨୦୧୫ରେ ସେ କଟକ ଅଞ୍ଚଳରେ ବିବାହ କରିଥିଲେ। ପରେ ତାଙ୍କର ପୁଅଟିଏ ଜନ୍ମ ହୋଇଥିଲା। ଶାଶୁଘର ଲୋକେ ଖୁବ୍ ଖୁସି ହୋଇଥିଲେ। ତେବେ ପରବର୍ତ୍ତୀ ସମୟରେ ତାଙ୍କର ଦୁଇଟି ଯାକ କିଡ୍ନୀ ସମସ୍ୟା ଥିବା ଜଣାପଡ଼ିଥିଲା। ଏହା ଜାଣି ସ୍ବାମୀ ଓ ଶାଶୁଘର ଲୋକେ ତାଙ୍କୁ ଜୋର ଜବରଦସ୍ତ ବିଦା କରିଦେଇଥିଲେ। କୋଳରେ ଶିଶୁଟିଏ ଥିବାରୁ ସେ ଆଶ୍ରୟ ପାଇଁ ବାଧ୍ୟ ହୋଇ ବାପଘରକୁ ଚାଲିଆସିଥିଲେ। ବୃଦ୍ଧ ପିତାଙ୍କ ଉପରେ ବୋଝ ସଦୃଶ ହୋଇ ଦୁଃଖକଷ୍ଟରେ ଚଳିଲେ। ତାଙ୍କ ବାପା ଧାରକରଜ କରିବା ସହ ଘରର ଆସବାବପତ୍ର ବିକି ଦେଇ ଚିକିତ୍ସା କରାଇଥିଲେ ବି ସେ ସୁସ୍ଥ ହୋଇ ନ ଥିଲେ। ଫଳରେ ଏବେ ଯନ୍ତ୍ରଣାସିକ୍ତ ଜୀବନ ଜୀଉଁଛନ୍ତି। କେବଳ ପୁଅ ପାଇଁ ସେ ବଞ୍ଚତ୍ ରହି ସଂଘର୍ଷ କରିବାକୁ ଚାହଁୁଛନ୍ତି ବୋଲି ସବ୍ନମ୍ ପ୍ରକାଶ କରିଛନ୍ତି। ତାଙ୍କ ଚିକିତ୍ସା ପାଇଁ ଲକ୍ଷାଧିକ ଟଙ୍କା ଆବଶ୍ୟକ । ତେଣୁ ସରକାର ଓ ବଦାନ୍ୟ ବ୍ୟକ୍ତି ତାଙ୍କ ପ୍ରତି ସହାୟତାର ହାତ ବଢ଼ାଇବାକୁ ସବ୍ନମ୍ ନିବେଦନ କରିଛନ୍ତି।