ଭୁବନେଶ୍ୱର,୧୪।୭(ବ୍ୟୁରୋ): ଏନ୍ଡି ଟିଭି ଗୁଡ୍ଟାଇମ୍ସରେ ପ୍ରସାରିତ ଦେଶର ଖ୍ୟାତନାମା ଫ୍ୟାଶନ ଡିଜାଇନର ସବ୍ୟସାଚୀ ମୁଖାର୍ଜୀଙ୍କ ବହୁଚର୍ଚ୍ଚିତ ଶୋ ‘ବ୍ୟାଣ୍ଡ୍ ବାଜା ବ୍ରାଇଡ୍’ରେ ସ୍ଥାନ ପାଇଛନ୍ତି ଓଡ଼ିଆ ଝିଅ ଅଙ୍କିତା ମହାନ୍ତି। ପ୍ରଥମଥର ପାଇଁ ଜଣେ ଓଡ଼ିଆଙ୍କୁ ଏଭଳି ଏକ ଓ୍ବେଡିଂ ଶୋ’ରେ ଦେଖିବାକୁ ମିଳିଛି। ହାଇଦ୍ରାବାଦସ୍ଥିତ ଏକ ଏମ୍ଏନ୍ସିରେ ପ୍ରୋଗ୍ରାମ ମ୍ୟାନେଜରଭାବେ କାମ କରୁଥିବା ଅଙ୍କିତା କିଭଳି ଚିରାଚରିତଠାରୁ ଦୂରେଇ ନିଜ ସାଥୀଙ୍କ ସହ ନୂଆ ଜୀବନ ଆରମ୍ଭ କରୁଛନ୍ତି ତାହାକୁ ଏଥିରେ ଦେଖିବାକୁ ମିଳିଥିଲା। ‘ବ୍ୟାଣ୍ଡ୍ ବାଜା ବ୍ରାଇଡ୍’ରେ ଅଂଶଗ୍ରହଣ କରି ‘ସବ୍ୟସାଚୀ ବ୍ରାଇଡ୍’ ହେବାକୁ ଦେଶର କୋଟି କୋଟି ଯୁବତୀ ସ୍ବପ୍ନ ଦେଖୁଥିବାବେଳେ ଅଙ୍କିତା ସବ୍ୟସାଚୀଙ୍କ ତରଫରୁ ଏହି ଅଫର୍ ପାଇଥିଲେ। ସବୁଠାରୁ ବଡ଼କଥା ହେଲା ଶୋ’ରେ ଅଂଶଗ୍ରହଣ କରିବାକୁ ସେ ନିଜେ ଆବେଦନ କରି ନ ଥିଲେ। ଏନେଇ ସବ୍ୟସାଚୀ କହିଛନ୍ତି, ଅଙ୍କିତା ଜଣେ ଭିନ୍ନ ଧରଣର ଝିଅ। ତାଙ୍କ ନିକଟରେ ଅବର୍ଣ୍ଣନୀୟ ଗୁଣ ରହିଛି। ତାଙ୍କ ଦୃଢ ମନୋବଳ ଏବଂ ଯେଉଁଭଳି ଭାବେ ସେ ନିଜକୁ ଉପସ୍ଥାପନ କରନ୍ତି ସେଭଳି ବହୁତ କମ୍ ଝିଅ କରିପାରନ୍ତି ବୋଲି କହି ସେ ଅଙ୍କିତାଙ୍କୁ ଢେର୍ ପ୍ରଶଂସା କରିଛନ୍ତି।
ଶ୍ୟାମଳ ରଙ୍ଗ ଓ ମୋଟାପଣ ପାଇଁ ପିଲାବେଳୁ ଅଙ୍କିତା ବହୁ ଥଟ୍ଟାମଜା ସହ ପରିହାସର ଶିକାର ହୋଇଥିଲେ। ପ୍ରଥମେ ପ୍ରଥମେ ଏହା ଅଙ୍କିତାଙ୍କ ମନକୁ ଆଘାତ ଦେଉଥିଲା, ହେଲେ ସମୟକ୍ରମେ ଏହାକୁ ସେ ଭୁଲିଯାଇଛନ୍ତି। ସମାଜର ଆଶା, ଆକାଂକ୍ଷାଠାରୁ ବହୁ ଊର୍ଦ୍ଧ୍ୱକୁ ଯାଇ କିଭଳି ବିଶ୍ୱରେ ନିଜର ଏକ ସ୍ବତନ୍ତ୍ର ସ୍ଥାନ ସୃଷ୍ଟି କରିହେବ ତାହା ଅଙ୍କିତା ପ୍ରମାଣ କରି ଦେଖାଇଛନ୍ତି। ନିଜ ଜୀବନସାଥୀଙ୍କ ପାଇଁ ଦୁର୍ବଳତାକୁ ନିଜ ଶକ୍ତିରେ ପରିଣତ କରିଥିବା ଅଙ୍କିତା ଏବେ ହସୁଛନ୍ତି ଓ ଅନ୍ୟକୁ ହସାଉଛନ୍ତି। ପ୍ରତି ରବିବାର ଗୁଡ୍ଟାଇମ୍ସରେ ପ୍ରସାରିତ ହେଉଥିବା ଏହି ଶୋ’ ମଙ୍ଗଳବାର ରାତି ୭ଟା, ବୁଧବାର ରାତି ୯ଟା ଏବଂ ଶନିବାର ରାତି ୮ଟାରେ ପୁନଃ ପ୍ରସାରିତ ହୋଇଥାଏ।
