କୋଚି, ୨୨।୭: କରୋନା ମହାମାରୀ ଯୋଗୁ କେବଳ ଯେ କ୍ରୀଡ଼ା ଜଗତ ନୁହେଁ ଏହା ସହିତ ଜଡ଼ିତ ଲୋକମାନେ ମଧ୍ୟ ବେଶ୍ ପ୍ରଭାବିତ ହୋଇଛନ୍ତି। ଦୀର୍ଘ ୪ ମାସ ପରେ ଅନ୍ତର୍ଜାତୀୟ କ୍ରିକେଟ୍ ପ୍ରତ୍ୟାବର୍ତ୍ତନ କରିଥିଲେ ମଧ୍ୟ ଭାରତରେ ଏବେ ମଧ୍ୟ ଗ୍ରାଉଣ୍ଡ ଫାଙ୍କା ପଡ଼ିଛି। ମ୍ୟାଚ୍ ଆୟୋଜନ ହେଉ ନ ଥିଲେ ମଧ୍ୟ ପଡ଼ିଆକୁ ଖେଳ ଉପଯୋଗୀ ରଖିବା ପାଇଁ ଗ୍ରାଉଣ୍ଡ୍ସମ୍ୟାନ ପ୍ରତିଦିନ ଝାଳ ବୁହାଉଛନ୍ତି। ଏଭଳି ଏକ ସଙ୍କଟଜନକ ପରିସ୍ଥିତିରେ କେରଳ କ୍ରିକେଟ୍ ଦଳର ଅଧିନାୟକ ସଚିନ ବେବି ପଡ଼ିଆରେ କାମ କରୁଥିବା ଲୋକଙ୍କୁ ସହାୟତାର ହାତ ବଢ଼ାଇଛନ୍ତି। ରାଜ୍ୟରେ ଥିବା କିଛି କ୍ରିକେଟ୍ ପଡ଼ିଆରେ କାମ କରୁଥିବା ଲୋକଙ୍କ ନିକଟରେ ପହଞ୍ଚତ୍ ସଚିନ ସେମାନଙ୍କୁ ଦୈନନ୍ଦିନ ଚଳଣି ପାଇଁ ଆବଶ୍ୟକ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ପ୍ରଦାନ କରିଛନ୍ତି। ସଚିନଙ୍କୁ ଏହି କାମରେ ତାଙ୍କ ସ୍ତ୍ରୀ ଆନ୍ନା ଚାଣ୍ଡି ସହାୟତା କରୁଛନ୍ତି। କୋଚିସ୍ଥିତ ସେଣ୍ଟ ପାଉଲ୍ କଲେଜର ପ୍ରତ୍ୟେକ ପଡ଼ିଆ କର୍ମଚାରୀଙ୍କୁ ସଚିନ ୨୦ କେଜି ଚାଉଳ ଓ ୨ କେଜି ଚିନି ପ୍ରଦାନ କରିଛନ୍ତି। ଏହିଭଳି ଭାବେ ସେ ଅନ୍ୟ ଗ୍ରାଉଣ୍ଡର କର୍ମଚାରୀଙ୍କୁ ମଧ୍ୟ ରାଶନ ପ୍ରଦାନ କରିଥିଲେ। କେରଳ ଦଳର ଅଧିନାୟକ ଥିବା ବେବି କହିଛନ୍ତି, ‘ରନ୍ ସ୍କୋର କରିବା ଓ ଉଇକେଟ୍ ନେବା ପଛରେ ପଡ଼ିଆ କର୍ମଚାରୀଙ୍କ କଠିନ ପରିଶ୍ରମ ରହିଛି। ଆମେ ସେମାନଙ୍କୁ ଭୁଲି ପାରିବୁ ନାହିଁ। ମୁଁ ଭାବୁଛି ଟଙ୍କା ଅପେକ୍ଷା ଖାଦ୍ୟ ଅଧିକ ଗୁରୁତ୍ୱପୂର୍ଣ୍ଣ। ତେଣୁ ପଡ଼ିଆରେ କାମ କରୁଥବା କର୍ମଚାରୀଙ୍କୁ ଚାଉଳ, ଚିନି ଦେବାକୁ ସ୍ଥିର କଲି। ଆଶା କରୁଛି ଅନ୍ୟ କ୍ରିକେଟର୍ମାନେ ମଧ୍ୟ ଏଭଳି ସମୟରେ ଆଗକୁ ଆସି ସେମାନଙ୍କୁ ସହାୟତାର ହାତ ବଢ଼ାନ୍ତୁ।’ ୩୧ ବର୍ଷୀୟ ସଚିନ କେରଳ ପକ୍ଷରୁ ୭୨ଟି ଲେଖାଏ ପ୍ରଥମ ଶ୍ରେଣୀ ଓ ଲି୍ଷ୍ଟ-ଏ ମ୍ୟାଚ୍ ଖେଳି ଯଥାକ୍ରମେ ୩,୨୫୧ ଓ ୨,୪୨୦ ରନ କରିଛନ୍ତି।