ଜୟପୁର,୧୩।୭: ରାଜସ୍ଥାନ ରାଜନୀତି ବେଳକୁ ବେଳ ନୂଆ ମୋଡ ନେଉଛି। ପୂର୍ବରୁ ଶୁଣିବାକୁ ମିଳିଥିଲା କି ସଚ୍ଚିନ ପାଇଲଟଙ୍କ ପାଖେ କେତେଜଣ ବିଧାୟକଙ୍କ ସମର୍ଥନ ରହିଛି ଓ ସେ ଭାରତୀୟ ଜନତା ପାର୍ଟି(ଭାଜପା) ସହ ସମ୍ପର୍କରେ ଅଛନ୍ତି। ତେଣୁ ସେ ଭାଜପାରେ ସାମିଲ ହୋଇପାରନ୍ତି। ଏବେ କିନ୍ତୁ ବିଶେଷ ସୂତ୍ରରୁ ମିଳିଥିବା ଖବରରୁ ଜଣାପଡିଛି କି ପାଇଲଟ ଭାଜପାରେ ଯୋଗ ଦେବେ ନାହିଁ। ବରଂ ସେ କଂଗ୍ରେସ ଛାଡି ଏକ ନୂଆ ଦଳ ଗଠନ କରିପାରନ୍ତି। ଯାହାର ନାମ ‘ପ୍ରଗତିଶୀଳ କଂଗ୍ରେସ’ ହୋଇପାରେ ବୋଲି ଆଲୋଚନା ହେଉଛି। ରାଜସ୍ଥାନରେ ଶାସକ କଂଗ୍ରେସ ଦଳ ମଧ୍ୟରେ ଅନ୍ତଃକଳହ ଦେଖାଦେବା ପରେ ଉପମୁଖ୍ୟମନ୍ତ୍ରୀ ସଚ୍ଚିନ ପାଇଲଟ ରବିବାର ପାର୍ଟିରୁ ଓହରି ଯିବାର ସଙ୍କେତ ଦେଇ କହିଥିଲେ ତାଙ୍କ ସହ ପାଖାପାଖି ୩୦ ବିଧାୟକ ଅଛନ୍ତି ତେଣୁ ଅଶୋକ ଗେହଲଟ ସରକାରଙ୍କ ପାଖରେ ଆଉ ବହୁମତ ନାହିଁ। କଂଗ୍ରେସ ପକ୍ଷରୁ ମିଳିଥିବା ସୂଚନାରୁ ଜଣାପଡିଛି କି ପାଇଲଟଙ୍କୁ କୁହାଯାଇଥିଲା କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ଓ ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ଯାହା କହିବେ ସେଥିରେ ପାଇଲଟ ରାଜି ହୋଇଯିବେ। ହେଲେ ପାଇଲଟ ଏଭଳି କରିବେ ନାହିଁ ବୋଲି ସଫା ସଫା ମନା କରି ଦେଇଥିଲେ। ରବିବାର ରାତି ୯ଟାରେ ମୁଖ୍ୟମନ୍ତ୍ରୀ ଗେହଲଟ ଆୟୋଜିତ କରିଥିବା ବୈଠକରେ ତାଙ୍କ ସମର୍ଥକମାନେ କହିଥିଲେ ଆମର ଯେତେଜଣ ବିଧାୟକ ଦଳ ଛାଡିବେ ତା’ଠାରୁ ଅଧିକ ବିଧାୟକଙ୍କୁ ଆମେ ଭାଜପାରୁ ନେଇ ଆସିବୁ। ଏସବୁ ଭିତରେ କିନ୍ତୁ ଚୁପ୍ ରହିଥିଲେ ପାଇଲଟ।
