ନୂଆଦିଲ୍ଲୀ,୨୫।୫: ବିଶ୍ୱର ମହାନ କ୍ରିକେଟରଙ୍କ ମଧ୍ୟରୁ ଜଣେ ହେଲେ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର। ନିଜର ଉଲ୍ଲେଖନୀୟ ବ୍ୟାଟିଂ ଯୋଗୁ ସେ କ୍ରିକେଟ ଇତିହାସରେ ନିଜର ସ୍ବତନ୍ତ୍ର ଛାପ ଛାଡ଼ିଛନ୍ତି କହିଲେ ଅତ୍ୟୁକ୍ତି ହେବ ନାହିଁ। ତେବେ ଦିନ ଥିଲା ଯେତେବେଳେ ସଚିନ ବେଶ ଲାଜକୁଳା ଥିଲେ। କଥାଟି ତାଙ୍କ କ୍ରିକେଟ କ୍ୟାରିୟର ଆରମ୍ଭ ସମୟର। ଏହାସତ୍ତ୍ୱେ ମାତ୍ର ୧୭ ବର୍ଷ ବୟସରେ ସେ ପ୍ରେମ କରି ବସିଥିଲେ। ୧୯୯୦ରେ ସେ ବମ୍ବେ ବିମାନବନ୍ଦରରେ ଅଞ୍ଜଳିଙ୍କୁ ପ୍ରଥମ ଥର ପାଇଁ ଦେଖିଥିଲେ। ଅଞ୍ଜଳି ମା’ଙ୍କୁ ନେବା ଲାଗି ସେଠାକୁ ଆସିଥିବା ବେଳେ ସଚିନ ଇଂଲଣ୍ଡ ଗସ୍ତରୁ ଫେରୁଥିଲେ। ପରେ ଏକ ବନ୍ଧୁଙ୍କ ଯୋଗୁ ସେମାନେ ପରସ୍ପରକୁ ଜାଣିଥିଲେ। ଏହାପରେ ଉଭୟ ଦୀର୍ଘ ୫ ବର୍ଷ ଧରି ପରସ୍ପରକୁ ଡେଟ୍ କରିଥିଲେ। ଶେଷରେ ୧୯୯୫ ମେ’ ୨୫ ତାରିଖରେ ବିବାହ ବନ୍ଧନରେ ଆବଦ୍ଧ ହୋଇଥିଲେ।
ସଚିନ ପ୍ରେମ ପାଇଁ ପରିବାରଲୋକଙ୍କୁ ଏକ ବଡ଼ ମିଛ କହିଥିଲେ। ସେ ପ୍ରେମିକା ଅଞ୍ଜଳି ଜଣେ ସାମ୍ବାଦିକା ବୋଲି କହି ପରିବାରଲୋକଙ୍କ ସହ ଚିହ୍ନା ପରିଚୟ କରାଇଥିଲେ। ସେତେବେଳେ ଅଞ୍ଜଳି ଡାକ୍ତରୀ ପାଠ ପଢ଼ୁଥିଲେ। ୨୦୧୫ରେ ସଚିନଙ୍କ ଆତ୍ମଜୀବନୀ ‘ପ୍ଲେଇଂ ଇଟ୍ ମାଇ ଓ୍ବେ’ର ଉନ୍ମୋଚନ ଉତ୍ସବରେ ଅଞ୍ଜଳି ଏନେଇ ସବିଶେଷ ଜଣାଇଥିଲେ। ସେ କହିଥିଲେ ସଚିନ ପ୍ରଥମ ଥର ଘରକୁ ଡାକିବା ସମୟରେ ବହୁତ ଡ଼ରି ଯାଇଥିଲେ। ଉଭୟଙ୍କ ପରିବାରଲୋକେ ସେମାନଙ୍କ ଭଲପାଇବା ବିଷୟରେ ନ ଜାଣନ୍ତୁ ବୋଲି ସେ ଚାହୁଁଥିଲେ। ଏଥିନେଇ ଜଣେ ଖବରଦାତା ଭାବେ ପରିବାରଲୋକଙ୍କ ସହ ମିଶାଇବେ ବୋଲି ସେ ମନସ୍ଥ କରିଥିଲେ। ତାହା ହିଁ ହୋଇଥିଲା। ସାଲଓ୍ବାର ପିନ୍ଧି ସଚିନଙ୍କୁ ଭେଟିବାକୁ ପହଞ୍ଚିଥିଲେ ଅଞ୍ଜଳି। ଆଜି ଅର୍ଥାତ ମଙ୍ଗଳବାର ଉଭୟ ବିବାହର ୨୬ତମ ବାର୍ଷିକୀ ପାଳନ କରୁଛନ୍ତି। ଏହି ଅବସରରେ ଉଭୟଙ୍କ ନିକଟକୁ ଶୁଭେଚ୍ଛାର ସୁଅ ଛୁଟୁଛି।