ରାୟପୁର,୨୨।୩ : ୨୦୧୧ ବିଶ୍ୱକପ୍ ଫାଇନାଲ ଭଳି ରୋମାଞ୍ଚକ ମ୍ୟାଚ୍ରେ ଶ୍ରୀଲଙ୍କାକୁ ହରାଇ ଚାମ୍ପିୟନ ହୋଇଛି ଇଣ୍ଡିଆ। ତେବେ ଏହା ବିଶ୍ୱକପ୍ ନୁହେଁ, ଅନଏକାଡେମୀ ରୋଡ୍ ସେଫ୍ଟି ଓ୍ବାଲର୍ଡ ଟି୨୦ ସିରିଜ୍। ସ୍ଥାନୀୟ ଶହୀଦ ବୀର ନାରାୟଣ ସିଂ ଅନ୍ତର୍ଜାତୀୟ ଷ୍ଟାଡିୟମରେ ଅନୁଷ୍ଠିତ ଫାଇନାଲରେ ତାରକା ଖଚିତ ଇଣ୍ଡିଆ ଲିଜେଣ୍ଡ୍ସ ୧୪ ରନ୍ରେ ଶ୍ରୀଲଙ୍କା ଲିଜେଣ୍ଡ୍ସକୁ ହରାଇ ଦେଇଛି।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ଇଣ୍ଡିଆ ଲିଜେଣ୍ଡ୍ସ ପାଓ୍ବର ପ୍ଲେରେ କିଛି ଖାସ କରିପାରି ନ ଥିଲା। ପ୍ରଥମ ୫ ଓଭରରେ ହିଁ ବୀରେନ୍ଦ୍ର ସେହ୍ବାଗ (୧୦) ଓ ଏସ୍. ବଦ୍ରିନାଥ (୭)ଙ୍କ ଉଇକେଟ ହରାଇଥିଲା ଦଳ। ଏହାପରେ ଅଧିନାୟକ ସଚିନ ତେନ୍ଦୁଲକର (୩୦) ମଧ୍ୟ ପ୍ୟାଭିଲିଅନ ଫେରି ଯାଇଥିଲେ। ମାତ୍ର ଯୁବରାଜ ସିଂ ଓ ୟୁସୁଫ ପଠାନ ଚତୁର୍ଥ ଉଇକେଟ ପାଇଁ ଯୋଡ଼ିଥିଲେ ବିସ୍ଫୋରକ ୮୫ ରନ୍। ଦୁହେଁ ଗ୍ରାଉଣ୍ଡର ଚାରି ଆଡ଼େ ଛକା ଚୌକା ବର୍ଷା କରିଥିଲେ। ଫଳରେ ପୂରା ୨୦ ଓଭରରେ ଇଣ୍ଡିଆ ଲିଜେଣ୍ଡ୍ସ ୪ ଉଇକେଟ ହରାଇ ୧୮୧ ରନ୍ କରିଥିଲା। ଯୁବି ୬୦ (୪ ଲେଖାଏ ଚୌକା ଓ ଛକା) ରନ୍ କରି ଆଉଟ୍ ଥିବାବେଳେ ୟୁସୁଫ ୬୨ (୪ ଚୌକା ଓ ୫ ଛକା) ନଟ୍ ଆଉଟ୍ ରହିଥିଲେ।
ଏହାପରେ ଶ୍ରୀଲଙ୍କା ଲିଜେଣ୍ଡ୍ସ ବ୍ୟାଟିଂ ଆରମ୍ଭରୁ ହିଁ ପଠାନ ବ୍ରଦର୍ସଙ୍କ ଯୋଗୁ ବାରମ୍ବାର ଝୁଣ୍ଟିଥିଲା। କିନ୍ତୁ ଚିନଥାକା ଜୟସିଙ୍ଘେ (୪୦) ଓ କୌଶଲ୍ୟା ଓ୍ବିରାରତ୍ନେ (୩୮) ୫ମ ଉଇକେଟ ଲାଗି ୬୪ ରନ୍ ଯୋଡ଼ି ବିଜୟ ସମ୍ଭାବନା ସୃଷ୍ଟି କରିଥିଲେ। ମାତ୍ର ଅନ୍ତିମ ଓଭରରେ ଫେଲ୍ ମାରିଥିଲେ ଦୁହେଁ। ଫଳରେ ତିଲକରତ୍ନେ ଦିଲସାନଙ୍କ ନେତୃତ୍ୱାଧୀନ ଶ୍ରୀଲଙ୍କା ଲିଜେଣ୍ଡ୍ସ ଶେଷ ପର୍ଯ୍ୟନ୍ତ ଖେଳି ୭ ଉଇକେଟ ହରାଇ ୧୬୭ ରନ୍ କରିବାକୁ ସକ୍ଷମ ହୋଇଥିଲା। ଦଳ ପକ୍ଷରୁ ସନଥ ଜୟସୁରିୟା ୪୩, ଚିନଥାକା ଜୟସିଙ୍ଘେ ୪୦ ଓ କୌଶଲ୍ୟା ଓ୍ବିରାରତ୍ନେ ୩୮ ରନ୍ କରିଥିଲେ। ପଠାନ ବ୍ରଦର୍ସ ହାତେଇଥିଲେ ୨ ଲେଖାଏ ଉଇକେଟ।