ଚଣ୍ଡିଗଡ଼, ୨୪।୬- ମହାନ ଭାରତୀୟ କ୍ରିକେଟର୍ ସଚିନ ତେନ୍ଦୁଲକରଙ୍କ ପରି ଅବିକଳ ଦେଖାଯାଉଥିବା ପଞ୍ଜାବର ବଲବୀର ଚାନ୍ଦଙ୍କୁ କିଏ ନ ଜାଣେ। ଗତ ୩ ଦଶନ୍ଧି ଧରି ସଚିନଙ୍କ ଚରିତ୍ରରେ ଟେଲିଭିଜନ ଆଦିରେ ଅଭିନୟ କରିଆସୁଥିବା ବଲବୀର ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। ସଚିନଙ୍କ ଖେଳିବା ସମୟରେ ବଲ୍ବୀର ଟେଲିଭିଜନରେ ବହୁ ବିଜ୍ଞାପନ କରିବାର ସୁଯୋଗ ପାଇଥିଲେ। ଏହାପରେ ତାଙ୍କୁ ମୁମ୍ବାଇରେ ଏକ ଚାଇନିଜ ଫାଷ୍ଟ ଫୁଡ୍ର ବ୍ରାଣ୍ଡ ଆମ୍ବାସାଡର ଭାବେ ଚାକିରି ମିଳିଯାଇଥିଲା। କିନ୍ତୁ ବର୍ତ୍ତମାନ ବିଶ୍ୱ ପାଇଁ ଚିନ୍ତାର କାରଣ ପାଲଟିଥିବା ମହାମାରୀ କରୋନା ଭାଇରସର ପ୍ରଭାବ ବଲବୀରଙ୍କ ଉପରେ ସିଧାସଳଖ ପଡ଼ିଛି। କରୋନା ଲାଗି ବଲବୀର ମୁମ୍ବାଇରେ କରୁଥିବା ଚାକିରି ମଧ୍ୟ ହରାଇଛନ୍ତି। ଲକ୍ ଡାଉନ୍ ଚାଲିଥିବାବେଳେ ସେ ଏହି ଚାକିରି ହରାଇଥିଲେ। ଏହାପରେ ୫୦ ବର୍ଷୀୟ ବଲବୀର ଜୁନ୍ ୧୦ରେ ପଞ୍ଜାବରେ ଥିବା ନିଜ ଗ୍ରାମକୁ ପଳାଇ ଆସିଥିଲେ। କିନ୍ତୁ ଗ୍ରାମରେ ପହଞ୍ଚତ୍ଲା ପରେ ବଲବୀରଙ୍କ ସମେତ ତାଙ୍କର ପୁରା ପରିବାର କରୋନାରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିବା ଜଣାପଡ଼ିଛି। ବଲବୀର କହିଛନ୍ତି, ଲକ୍ ଡାଉନ୍ ପୂର୍ବରୁ ତାଙ୍କ ରୋଜଗାର ଭଲ ଥିଲା। ସେ ବକ୍ରୋଲି ଅଞ୍ଚଳରେ ଘର ଭଡ଼ା ନେଇ ରହୁଥିଲେ। କିନ୍ତୁ ଚାକିରି ଚାଲିଯିବା ପରେ ଘରଭଡ଼ା ଦେବା ତାଙ୍କ ପକ୍ଷେ ସମ୍ଭବପର ହୋଇ ନ ଥିଲା। ତେଣୁ ସେ ବାଧ୍ୟ ହୋଇ ଘରକୁ ପଳାଇ ଆସିଥିଲେ।