ଭାରତୀୟ କ୍ରିକେଟ ପୂର୍ବତନ ବିସ୍ଫୋରକ ବ୍ୟାଟ୍ସମ୍ୟାନ୍ ବୀରେନ୍ଦ୍ର ସେହ୍ବାଗ ଆଜି ୪୨ତମ ଜନ୍ମଦିନ ପାଳନ କରୁଛନ୍ତି। ଏହି ଦିନରେରେ ଅନେକ ଖେଳାଳି ତାଙ୍କୁ ଅଭିନନ୍ଦନ ଜଣାଇଛନ୍ତି। ସେହ୍ବାଗଙ୍କ ସହ ଓପନିଂ କରି ଭାରତକୁ ଅନେକ ମ୍ୟାଚ ଜିତାଇଥିବା ମହାନ ଖେଳାଳି ସଚିନ ତେନ୍ଦୁଲକର ନିଆରା ଢଙ୍ଗରେ ତାଙ୍କୁ ଅଭିନନ୍ଦନ ଜଣାଇଛନ୍ତି। ସେହ୍ବାଗଙ୍କ ସହ ଏକ ପୁରୁଣା ଫଟୋ ଶେୟାର କରି ସଚିନ ତେନ୍ଦୁଲକର ଲେଖିଛନ୍ତି, ଯିଏ କେବଳ ଚାରି ଓ ଛକାରେ କାରବାର କରୁଥିଲା, ତାଙ୍କୁ ଆଜି ୪୨ ବର୍ଷ ହୋଇଛି। ୪+୨ ମିଶାଇଲେ ମଧ୍ୟ ୬ ହେଉଛି। ତୁମେ ହଜାରେ ବର୍ଷ ବଞ୍ଚ ଏବଂ ବର୍ଷର ଦିନଗୁଡିକ ୫୦ ହଜାର ହେଉ, ଜନ୍ମଦିନର ଶୁଭେଚ୍ଛା ବୋଲି ସଚିନ କହିଛନ୍ତି। ଏଥିସହ ସେହ୍ବାଗ ଭଳି ଦିଲ୍ଲୀରୁ ଖେଳୁଥିବା ବେଳେ ଭାରତୀୟ ଦଳର ଅଧିନାୟକ ବିରାଟ କୋହଲି ମଧ୍ୟ ସେହ୍ବାଗଙ୍କୁ ତାଙ୍କ ଜନ୍ମଦିନରେ ଅଭିନନ୍ଦନ ଜଣାଇ କହିଛନ୍ତି, ଜନ୍ମଦିନର ଶୁଭେଚ୍ଛା ଭାଇ। ଦିନଟି ଭଲରେ କଟୁ।
ଦିଲ୍ଲୀରେ ଜନ୍ମଗ୍ରହଣ କରିଥିବା ସେହ୍ବାଗ ବିସ୍ଫୋରକ ବ୍ୟାଟିଂ ପାଇଁ ଜଣାଶୁଣା ଥିଲେ। ୨୦୦୮ରେ ଦକ୍ଷିଣ ଆଫ୍ରିକା ବିପକ୍ଷରେ ଚେନ୍ନାଇ ଟେଷ୍ଟରେ ସେ ୧୦୪.୯୩ ଷ୍ଟ୍ରାଇକ ହାରରେ ୩୧୯ ରନ ସ୍କୋର କରିଥିଲେ। ଟେଷ୍ଟ ମ୍ୟାଚରେ ଡନ ବ୍ରାଡମ୍ୟାନଙ୍କ ପରେ କେବଳ ବୀରେନ୍ଦ୍ର ସେହ୍ବାଗ (୩୧୯, ୩୦୯, ୨୯୩) ଦୁଇଟି ତ୍ରିଶତକ ଏବଂ ୨୯୦ରୁ ଅଧିକ ସ୍କୋର କରିଛନ୍ତି।