ନୂଆଦିଲ୍ଲୀ,୮ା୧୧: ତୃଣମୂଳ କଂଗ୍ରେସ ଏମପି ମହୁଆ ମୋଇତ୍ରାଙ୍କ ସଦସ୍ୟତା ବାତିଲ କରିବାକୁ ସୁପାରିସ କରିଛି ଏଥିକ୍ସ କମିଟି। ପ୍ରଶ୍ନ ପଚାରିବା ପାଇଁ ଟଙ୍କା ନେବା ଅଭିଯୋଗରେ ମହୁଆଙ୍କ ବିରୋଧରେ ତଦନ୍ତ କରି ଏଥିକ୍ସ କମିଟି ୫୦୦ ପୃଷ୍ଠାର ରିପୋର୍ଟ ପ୍ରସ୍ତୁତ କରିଥିବା ସୂଚନା ମିଳିଛି। ମହୁଆଙ୍କ ଏହି କାର୍ଯ୍ୟକୁ ଆପତ୍ତିଜନକ, ଅନୀତିକର ଏବଂ ଅତ୍ୟନ୍ତ ଘୃଣ୍ୟ ଏବଂ ଅପରାଧୀକ ବୋଲି କହି କମିଟି କହିବା ସହିତ ଏଥିପାଇଁ କଠୋର ଦଣ୍ଡ ଦେବାକୁ କୁହାଯାଇଛି।
କମିଟି ଏହା ମଧ୍ୟ ସୁପାରିସ କରିଛି ଯେ କେନ୍ଦ୍ର ସରକାର ଏକ ନିର୍ଦ୍ଧିଷ୍ଟ ସମୟସୀମା ମଧ୍ୟରେ ଆଇନଗତ, ଅନୁଷ୍ଠାନିକ ଏବଂ ତନତନ କରି ତଦନ୍ତ କରନ୍ତୁ। ଏହା ବ୍ୟତୀତ ରିପୋର୍ଟରେ କୁହାଯାଇଛି ଯେ, ‘ଚୁକ୍ତିର ଏକ ଅଂଶ ଭାବରେ ମହୁଆ ଏବଂ (ବ୍ୟବସାୟୀ) ଦର୍ଶନ ହିରାନନ୍ଦାନୀଙ୍କ ମଧ୍ୟରେ ନଗଦ କାରବାରର ଭାରତ ସରକାରଙ୍କ ଦ୍ୱାରା ଆଇନଗତ, ଅନୁଷ୍ଠାନିକ ତଥା ସମୟ ସୀମା ଅନୁଯାୟୀ ଅନୁସନ୍ଧାନ କରାଯିବା ଉଚିତ।
ତେବେ ସଂସଦର ଶୀତକାଳୀନ ଅଧିବେଶନରେ ଏହି ରିପୋର୍ଟ ଲୋକସଭା ବାଚସ୍ପତିଙ୍କ ନିକଟରେ ଦାଖଲ ହେବ ଏବଂ ଆଲୋଚନା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏହା ପୂର୍ବରୁ ଏହି ମାମଲାର ଲୋକପାଳ ମହୁଆଙ୍କ ବିରୋଧରେ ସିବିଆଇ ତଦନ୍ତ ନିର୍ଦ୍ଦେଶ ଦେଇଥିବା ସୋସିଆଲ ମିଡିଆରେ ଭାଜପା ଏମପି ନିଶିକାନ୍ତ ଦୁବେ ଦାବି କରିଥିଲେ।