ପାଟନା/ନୂଆଦିଲ୍ଲୀ,୨୮ା୪: ଗ୍ୟାଙ୍ଗ୍ଷ୍ଟରରୁ ରାଜନେତା ସାଜିଥିବା ଆନନ୍ଦ ମୋହନ ସିଂଙ୍କୁ ବିହାରର ସହର୍ଷ ଜେଲରୁ ଗୁରୁବାର ଭୋର ୩ଟାରେ ମୁକ୍ତ କରାଯାଇଛି। ୨୯ ବର୍ଷ ପୂର୍ବେ ଜଣେ ଭାରତୀୟ ପ୍ରଶାସନିକ ସେବା (ଆଇଏଏସ୍) ଅଧିକାରୀଙ୍କୁ ହତ୍ୟା କରିବା ଅଭିଯୋଗରେ ଦୋଷୀ ସାବ୍ୟସ୍ତ ହୋଇ ଆଜୀବନ କାରାଦଣ୍ଡ ଭୋଗୁଥିବା ପୂର୍ବତନ ଏମ୍ପି ଆନନ୍ଦ ୧୫ ବର୍ଷ ଜେଲରେ ରହିବା ପରେ ରେମିଶନ (ଉତ୍ତମ ବ୍ୟବହାର ପାଇଁ ସମ୍ପୂର୍ଣ୍ଣ ଅବଧି ଦଣ୍ଡ ଭୋଗିବା ପୂର୍ବରୁ ମୁକ୍ତି) ଆଧାରରେ ନୀତୀଶ ସରକାରଙ୍କ ନିର୍ଦ୍ଦେଶନାମା ଅନୁସାରେ ତାଙ୍କୁ ଛଡ଼ାଯାଇଛି। ଏଥିପାଇଁ ରାଜ୍ୟ ସରକାରଙ୍କୁ ଜେଲ ନିୟମରେ ସଂଶୋଧନ ଆଣିବାକୁ ପଡ଼ିଥିଲା। କେବଳ ଏତିକି ନୁହେଁ, ଆନନ୍ଦଙ୍କ ସହ ଅନ୍ୟ ୨୬ ଦୋଷୀଙ୍କୁ ମଧ୍ୟ ଆଗୁଆ ଛଡ଼ାଯାଇଛି। ଆନନ୍ଦ ନିଜ ପୁଅ ତଥା ଆର୍ଜେଡି ବିଧାୟକ ଚେତନ ଆନନ୍ଦଙ୍କ ନିର୍ବନ୍ଧ ପାଇଁ ୧୫ ଦିନିଆ ପାରୋଲରେ ପାଟନାରେ ଥିବାବେଳେ ଜେଲରୁ ମୁକ୍ତ ହେବା ବିଷୟ ଖବର ପାଇଥିଲେ। ଗଣମାଧ୍ୟମ ଆନନ୍ଦଙ୍କ ପ୍ରତିକ୍ରିୟା ଜାଣିବାକୁ ଚାହିଁବାରୁ ସେ କହିଥିଲେ, ପୂର୍ବତନ ଜିଲାପାଳ ଜି. କ୍ରିଷ୍ଣୈୟାଙ୍କ ସ୍ତ୍ରୀ ହୁଅନ୍ତୁ କି ଆଇଏଏସ୍ ଅଫିସର୍ସ ଆସୋସିଏଶନ୍, ମୁଁ ସମସ୍ତଙ୍କୁ ପ୍ରଣାମ କରୁଛି। ବର୍ତ୍ତମାନ ସ୍ଥିତିରେ ମୁଁ କିଛି କହିବାକୁ ଚାହୁଁନାହିଁ। ଆଇଏଏସ୍ ଅଫିସର୍ସ ଆସୋସିଏଶନ୍ ଏବଂ ହାଇଦ୍ରାବାଦରେ ରହୁଥିବା କ୍ରିଷ୍ଣୈୟାଙ୍କ ବିଧବା ସ୍ତ୍ରୀ ଉମା କ୍ରିଷ୍ଣୈୟା ରାଜ୍ୟ ସରକାରଙ୍କ ଏହି ନିଷ୍ପତ୍ତିକୁ ନେଇ ନୈରାଶ୍ୟ ବ୍ୟକ୍ତ କରିଛନ୍ତି।
ବିହାରର ମୁଜାଫରପୁରରେ ଗ୍ୟାଙ୍ଗ୍ଷ୍ଟରରୁ ବାହୁବଳୀ ନେତା ପାଲଟିଥିବା ଛୋଟନ୍ ଶୁକ୍ଳାଙ୍କୁ ହତ୍ୟା କରାଯାଇଥିଲା। ତାଙ୍କ ମୃତଦେହ ଧରି ବିକ୍ଷୋଭ ଶୋଭାଯାତ୍ରା ଚାଲିଥିବାବେଳେ ଯୁବ ଆଇଏଏସ୍ ଅଫିସର ଗୋପାଲଗଞ୍ଜ ଜିଲାପାଳ ଜି. କ୍ରିଷ୍ଣୈୟାଙ୍କୁ ହତ୍ୟା କରାଯାଇଥିଲା। ଆନନ୍ଦ ଉସୁକାଇବାରୁ ଲୋକେ ତାଙ୍କୁ କାର୍ରୁ ଟାଣିନେଇ ପିଟି ପିଟି ହତ୍ୟା କରିଥିବା ଅଭିଯୋଗ ହୋଇଥିଲା। ୨୦୦୭ ଅକ୍ଟୋବରରେ ଏକ ସ୍ଥାନୀୟ କୋର୍ଟ ହତ୍ୟା ଅଭିଯୋଗରେ ଆନନ୍ଦଙ୍କୁ ଦୋଷୀ ସାବ୍ୟସ୍ତ କରି ମୃତ୍ୟୁ ଦଣ୍ଡାଦେଶ ଦେଇଥିଲେ। ଏହି ରାୟକୁ ସେ ପାଟନା ହାଇକୋର୍ଟରେ ଚ୍ୟାଲେଞ୍ଜ କରିଥିଲେ। ହାଇକୋର୍ଟ ମୃତ୍ୟୁ ଦଣ୍ଡାଦେଶକୁ ଆଜୀବନ କାରାଦଣ୍ଡାଦେଶରେ ପରିବର୍ତ୍ତିତ କରିଥିଲେ। ଗତ ୧୦ ତାରିଖରେ ରାଜ୍ୟ ସରକାର ବିହାର ପ୍ରିଜନ୍ ମାନୁଆଲ୍ରେ ସଂଶୋଧନ ଆଣିଛନ୍ତି। ଜଣେ କର୍ତ୍ତବ୍ୟରତ ସରକାରୀ କର୍ମଚାରୀଙ୍କୁ ହତ୍ୟା ଅଭିଯୋଗରେ ଦୋଷୀ ସାବ୍ୟସ୍ତ ହୋଇଥିବା ବ୍ୟକ୍ତିଙ୍କୁ ଦଣ୍ଡମୁକ୍ତି ମିଳିବ ନାହିଁ ବୋଲି ପୂର୍ବରୁ ନିୟମ ଥିଲା। ରାଜ୍ୟ ସରକାର ଏହି ଧାରାକୁ ହଟାଇ ଦେଇଛନ୍ତି। ଆନନ୍ଦଙ୍କ ମୁକ୍ତି ପାଇଁ ମୁଖ୍ୟମନ୍ତ୍ରୀ ନୀତୀଶ କୁମାର ଏପରି କରିଥିବା ସମାଲୋଚକମାନେ କହୁଛନ୍ତି। ମହାମେଣ୍ଟ ସରକାର ବିରୋଧୀଙ୍କ ଟାର୍ଗେଟରେ ଥିବାବେଳେ ଏହି ପଦକ୍ଷେପ ଏକ ନୂଆ ରାଜନୈତିକ ବିବାଦକୁ ଜନ୍ମ ଦେଇଛି। ଭାଜପା ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ସୁଶୀଲ କୁମାର ମୋଦି କହିଛନ୍ତି, ନୀତୀଶ ସହଯୋଗୀ ରାଷ୍ଟ୍ରୀୟ ଜନତା ଦଳ (ଆର୍ଜେଡି) ସମର୍ଥନରେ କ୍ଷମତାରେ ରହିବା ପାଇଁ ଆଇନକୁ ବଳି ପକାଇଛନ୍ତି।