ମୁମ୍ବାଇ,୧୨।୧୨: ମହିଳାଙ୍କ ବିରୋଧରେ ଅପରାଧ ବଢ଼ୁଥିବାରୁ ଏହାକୁ ରୋକିବା ଲାଗି ନିର୍ଭୟା ପାଣ୍ଠି ଗଠନ କରାଯାଇଥିଲା। ଏହି ପାଣ୍ଠି ଅର୍ଥରେ ମୁମ୍ବାଇ ପୋଲିସ ଚଳିତ ବର୍ଷ କେତେକ ଗାଡ଼ି କିଣିଥିଲା। ଉକ୍ତ ଗାଡ଼ି ମହିଳାଙ୍କ ସୁରକ୍ଷାରେ ନ ଲାଗି ଏବେ ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କ ପରିଚାଳିତ ଶିବସେନା ଗୋଷ୍ଠୀର ବିଧାୟକ ଏବଂ ଏମ୍ପିମାନଙ୍କ ସୁରକ୍ଷାରେ ବ୍ୟବହୃତ ହେଉଥିବା ଜଣାପଡ଼ିଛି।
ନେତାମାନଙ୍କୁ ଓ୍ବାଇ-ପ୍ଲସ୍ ସୁରକ୍ଷା ଯୋଗାଇଦେବାରେ ଉକ୍ତ ଗାଡ଼ିଗୁଡ଼ିକୁ ବ୍ୟବହାର କରାଯାଉଥିବା ଜଣେ ପୋଲିସ ଅଧିକାରୀ କହିଛନ୍ତି। ଏହାକୁ ନେଇ ବିରୋଧୀ ଦଳ କଂଗ୍ରେସ ଏବଂ ଏନ୍ସିପି ଶିନ୍ଦେ ସରକାରଙ୍କୁ ସମାଲୋଚନା କରିଛନ୍ତି। ମହିଳାଙ୍କ ସୁରକ୍ଷା ଲାଗି ବିଭିନ୍ନ ଯୋଜନା କାର୍ଯ୍ୟକାରୀ କରିବା ନିମନ୍ତେ କେନ୍ଦ୍ର ସରକାର ୨୦୧୩ରୁ ରାଜ୍ୟଗୁଡ଼ିକୁ ନିର୍ଭୟା ପାଣ୍ଠି ଯୋଗାଇ ଆସୁଛନ୍ତି। ମହିଳାଙ୍କ ଅପେକ୍ଷା ଶାସକ ବିଧାୟକଙ୍କୁ ସୁରକ୍ଷା ଦେବା ଅଧିକ ଗୁରୁତ୍ୱପୂର୍ଣ୍ଣ କି ବୋଲି ବିରୋଧୀ ପ୍ରଶ୍ନ କରିଛନ୍ତି।
ସୂଚନାଯୋଗ୍ୟ, ଗତ ଜୁନ୍ରେ ମୁମ୍ବାଇ ପୋଲିସ ନିର୍ଭୟା ପାଣ୍ଠିରେ ୨୨୦ଟି ବୋଲେରୋ, ୩୫ ଏର୍ଟିଗା, ୩୧୩ ପଲ୍ସର ମୋଟରସାଇକେଲ ଏବଂ ୨୦୦ ଆକ୍ସିଭା କିଣିଥିଲା। ଏହି ଗାଡ଼ିଗୁଡ଼ିକୁ ଜୁଲାଇ ମାସରେ ମୁମ୍ବାଇର ୯୭ଟି ଥାନା, ସାଇବର, ଟ୍ରାଫିକ୍ ଏବଂ ଊପକୂଳ ପୋଲିସ ୟୁନିଟ୍କୁ ଯୋଗାଇ ଦିଆଯାଇଥିଲା। ପରେ ସେଥିରୁ ୪୭ଟି ବୋଲେରୋକୁ ଶିନ୍ଦେ ଗୋଷ୍ଠୀ ବିଧାୟକ ଓ ଏମ୍ପିଙ୍କ ଏସ୍କର୍ଟ ଯାନ ଭାବେ ବ୍ୟବହାର କରିବାକୁ ନିଆଯାଇଥିଲା।
