ଦାରିଙ୍ଗବାଡ଼ି,୨।୧୨(ଅରୁଣ ସାହୁ): ଓଡ଼ିଶାର କଶ୍ମୀର କୁହାଯାଉଥିବା ଦାରିଙ୍ଗବାଡ଼ିକୁ ଏବେ ପର୍ଯ୍ୟଟକଙ୍କ ସୁଅ ଛୁଟୁଛି। ଅଞ୍ଚଳରେ ପ୍ରାୟ ୩୦ରୁ ଊର୍ଦ୍ଧ୍ୱ ହୋଟେଲ ରହିଥିବା ବେଳେ ଏକାଧିକ ଜଳଖିଆ ଦୋକାନ ଏବଂ ମିଲ୍ସ ହୋଟେଲ ରହିଛି। ହେଲେ ରାତ୍ରିଯାପନ କରୁଥିବା ପର୍ଯ୍ୟଟକଙ୍କ ସୁରକ୍ଷା ନେଇ ପ୍ରଶାସନ ପକ୍ଷରୁ ଲଜ୍ ଏବଂ ହୋଟେଲଗୁଡ଼ିକରେ ଚଢ଼ାଉ କରାଯାଇଥିଲା। ଚଢ଼ାଉ ବେଳେ ଅଧିକାରୀମାନେ ଅଗ୍ନି ନିରାପତ୍ତା ବ୍ୟବସ୍ଥା ସମେତ ଖାଦ୍ୟ ସୁରକ୍ଷା, ରନ୍ଧନ ଗ୍ୟାସ, ପଞ୍ଚାୟତ କାର୍ଯ୍ୟାଳୟର ଏନ୍ଓସି ସହ ଲଜ୍ଗୁଡ଼ିକର ରେଜିଷ୍ଟର ଯାଞ୍ଚ ଏବଂ ପର୍ଯ୍ୟଟକଙ୍କ ଆଧାର, ଠିକଣା ଠିକ୍ ଭାବେ ରେଜିଷ୍ଟର ମେଣ୍ଟେନ କରାଯାଉଛି କି ନାହିଁ ତାହା ଯାଞ୍ଚ କରାଯାଇଥିଲା। ଏଥିସହ ବିଭିନ୍ନ ପ୍ରମାଣପତ୍ର ଆଦି ଯାଞ୍ଚ କରାଯାଇଥିଲା।
ଯାଞ୍ଚ ବେଳେ ଏକାଧିକ ହୋଟେଲରେ ତ୍ରୁଟି ପରିଲକ୍ଷିତ ହୋଇଥିବା ବେଳେ ପଚା ଖାଦ୍ୟଗୁଡ଼ିକୁ ପ୍ରଶାସନ ନଷ୍ଟ କରିଥିଲା। ଏଥିସହ ହୋଟେଲରେ ଘରୋଇ ପାଇଁ ବ୍ୟବହୃତ ହେଉଥିବା ୧୦ ସିଲିଣ୍ଡର(ଟାଙ୍କି) ପ୍ରଶାସନ ଜବତ କରିଥିଲା। ଏଥିସହ ୫ ହୋଟେଲ, ଲଜ୍, ରେଷ୍ଟୁରାଣ୍ଟରୁ ୨୭ ହଜାର ଟଙ୍କା ଜରିମାନା ଆଦାୟ କରାଯାଇଛି।
ଚଢ଼ାଉରେ ସ୍ଥାନୀୟ ବିଡିଓ ଗଦାଧର ପାତ୍ର, ତହସିଲଦାର ତଥା କାର୍ଯ୍ୟନିର୍ବାହୀ ଅଧିକାରୀ ଶରତ ଶବର, ଆଇଆଇସି ଆନନ୍ଦ ଚନ୍ଦ୍ର ଦଣ୍ଡପାଟ, ଯୋଗାଣ ନିରୀକ୍ଷକ ନୀହାର ରଞ୍ଜନ ବେହେରା, ଅଗ୍ନିଶମ ବିଭାଗ ହାବିଲଦାର ସତ୍ୟନାରାୟଣ ବେହେରା ପ୍ରମୁଖ ସାମିଲ ଥିଲେ। ପ୍ରଶାସନର ଏଭଳି ଚଢ଼ାଉକୁ ସ୍ଥାନୀୟ ଲୋକେ ସ୍ବାଗତ କରିଛନ୍ତି। ଅନ୍ୟପକ୍ଷେ ଭୟରେ କେତେକ ହୋଟେଲ, ରେଷ୍ଟୁରାଣ୍ଟ ମାଲିକ ବନ୍ଦ କରି ଦେଇଥିବା ଜଣାପଡିଛି। ଏନେଇ ପରବର୍ତ୍ତୀ ସମୟରେ ପ୍ରଶାସନ ପକ୍ଷରୁ ଚଢ଼ାଉ କରାଯିବ ବୋଲି ବିଡିଓ କହିଛନ୍ତି।
