ଭୁବନେଶ୍ୱର,୩୧।୮(ସତ୍ୟଜିତ୍ ରାଉତ)ରାଜଧାନୀରେ ଚିନ୍ତା ବଢ଼ାଉଛନ୍ତି ଅପରାଧୀ। ଗୋଟେ ପରେ ଗୋଟେ ଆପରାଧିକ କାଣ୍ଡ ଘଟାଇ ଅପରାଧୀମାନେ କମିଶନରେଟ ପୋଲିସକୁ ଚ୍ୟାଲେଞ୍ଜ ଦେଉଛନ୍ତି। ଚୋରି, ଲୁଟ୍, ଗୋଷ୍ଠୀ ସଂଘର୍ଷ, ଆକ୍ରମଣ ଆଦି ଘଟଣା ଏବେ ପୋଲିସର ମୁଣ୍ଡବିନ୍ଧାର କାରଣ ସାଜିଛି। ଏପରି କି ଅଧିକାଂଶ ଚାଳକ ବେପରୁଆ ଭାବେ ଦ୍ରୁତଗତିରେ ଗାଡ଼ି ଚଳାଇ ନିଜ ସହ ଅନ୍ୟମାନଙ୍କ ଜୀବନ ପ୍ରତି ବିପଦ ସୃଷ୍ଟି କରୁଛନ୍ତି। ଫଳରେ ଅପରାଧ ବଢ଼ିବା ସହ ଆଇନ ଶୃଙ୍ଖଳା ପରିସ୍ଥିତି ମଧ୍ୟ ସୃଷ୍ଟି ହେଉଛି। ତେଣୁ ଏସବୁ ଦିଗକୁ ଦୃଷ୍ଟିରେ ରଖି ଭୁବନେଶ୍ୱରକୁ ଅଧିକ ସୁରକ୍ଷିତ ଏବଂ ସୁନ୍ଦର କରିବାକୁ କମିଶନରେଟ ପୋଲିସ ଆଉ ଏକ ବଡ଼ ପ୍ରୟାସ ଆରମ୍ଭ କରିବାକୁ ଯାଉଛି। ‘ସହଭାଗିତା’ ନାମରେ ଏକ କାର୍ଯ୍ୟକ୍ରମ କରିବାକୁ ଯାଉଛି କମିଶନରେଟ୍ ପୋଲିସ। ବୁଧବାର ଭିଡିଓ ବାର୍ତ୍ତା ମାଧ୍ୟମରେ ଏ ସଂକ୍ରାନ୍ତରେ ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ ସୂଚନା ଦେବା ସହ ସହରର ବ୍ୟବସାୟିକ ପ୍ରତିଷ୍ଠାନ, ଘର ଏବଂ ଆପାର୍ଟମେଣ୍ଟ ଆଦିରେ ଲାଗିଥିବା ସିସିଟିଭିର ଲିଙ୍କ୍ ମାଗିଛନ୍ତି।
ସୁରକ୍ଷା ଦୃଷ୍ଟିରୁ ରାଜଧାନୀରେ ସରକାର ପ୍ରାୟ ୭୦୦ ସିସିଟିଭି କ୍ୟାମେରା ଲଗାଇଛନ୍ତି। ଅଧିକ ସୁରକ୍ଷା ପାଇଁ ସାଧାରଣ ଲୋକମାନେ ମଧ୍ୟ ନିଜ ଘରେ, ଦୋକାନ ଏବଂ ଆପାର୍ଟମେଣ୍ଟରେ ସିସିଟିଭି ଲଗାଇଛନ୍ତି। ଏପରି କି ସମସ୍ତ ବ୍ୟାଙ୍କ, ମଲ୍ ଆଦିରେ ମଧ୍ୟ ଏହି କ୍ୟାମେରା ଲଗାଯାଇଛି। ଅପରାଧ ନିୟନ୍ତ୍ରଣରେ ଏସବୁ ସିସିଟିଭିକୁ ସଦୁପଯୋଗ କରିବାକୁ ପୋଲିସ ପକ୍ଷରୁ ସହଭାଗିତା ପ୍ରୟାସ ଆରମ୍ଭ ହେବାକୁ ଯାଉଛି। ୨୦୨୨ ଜୁଲାଇରେ କଟକରେ ପ୍ରଥମେ ‘ସହଭାଗିତା’ କାର୍ଯ୍ୟକ୍ରମ ଆରମ୍ଭ ହୋଇଥିଲା। ଏପର୍ଯ୍ୟନ୍ତ କଟକରେ ୬୦୦ରୁ ଊର୍ଦ୍ଧ୍ୱ ଘରୋଇ ସିସିଟିଭି ପୋଲିସ କଣ୍ଟ୍ରୋଲ ରୁମ୍ ସହ ଯୋଡ଼ିହୋଇଛି।
କଟକରେ ଏହି କାର୍ଯ୍ୟକ୍ରମର ସଫଳ ରୂପାୟନ ପରେ ଭୁବନେଶ୍ୱରରେ ଏହାକୁ କାର୍ଯ୍ୟକାରୀ କରିବାକୁ ପ୍ରୟାସ ଆରମ୍ଭ ହୋଇଛି। ପୋଲିସ କମିଶନର ଏସବୁ ସିସିଟିଭିର ଆଇପି ଆଡ୍ରେସ୍ ଦେବାକୁ ନିବେଦନ କରିଛନ୍ତି। ଭିଡିଓରେ ପୋଲିସ କମିଶନର କହିଛନ୍ତି, ସିଟି ସର୍ଭେଲାନ୍ସ, କ୍ରାଇମ୍ ପ୍ରିଭେନଶନ୍, କ୍ରାଇମ୍ ଡିଟେକ୍ଶନ୍, ଟ୍ରାଫିକ୍ ମ୍ୟାନେଜମେଣ୍ଟ ଆଦିରେ ସିସିଟିଭି ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। କଟକ ପରେ ଭୁବନେଶ୍ୱରେ ଏହି କାର୍ଯ୍ୟକ୍ରମକୁ ଆମେ ଆରମ୍ଭ କରିବାକୁ ଯାଉଛୁ। ତେଣୁ ଭୁବନେଶ୍ୱରର ବିଭିନ୍ନ ପ୍ରତିଷ୍ଠାନ ବିଶେଷକରି ସୁନା ଦୋକାନ, ମଲ୍, ଆପାର୍ଟମେଣ୍ଟ, ବ୍ୟାଙ୍କ୍ ଆଦିକୁ ଅନୁରୋଧ କରାଯାଇଛି।
ସେମାନେ ତାଙ୍କ ସିସିଟିଭିର ଆଇପି ଆଡ୍ରେସ୍କୁ ଦେଇ ଆମ ସାଙ୍ଗରେ ଯୋଡ଼ି ନିଅନ୍ତୁ। ଏପରିକି ସିସିଟିଭିର ଗୋଟିଏ କ୍ୟାମେରାକୁ ରାସ୍ତା ଆଡ଼କୁ ମୁହଁ କରି ଲଗାଇବାକୁ କମିଶନର ଅନୁରୋଧ କରିଛନ୍ତି। ଫଳରେ ଲୋକଙ୍କ ଗତିବିଧି ଜାଣିବାକୁ ସହଜ ହେବ ବୋଲି ସେ କହିଛନ୍ତି। ସେ ଆହୁରି କହିଛନ୍ତି, ଏହି ସିସିଟିଭି ଫୁଟେଜ୍କୁ କମିଶନରେଟ୍ ପୋଲିସ ସମ୍ପୂର୍ଣ୍ଣ ଗୋପନୀୟତା ରଖିବ। ଏହି କାର୍ଯ୍ୟକ୍ରମରେ ଯୋଡ଼ିହେବା ପାଇଁ ସ୍ଥାନୀୟ ଥାନା ଅଧିକାରୀଙ୍କ ସହ ଲୋକମାନେ ଯୋଗାଯୋଗ କରିବେ। ଏଥିସହ କମିଶନରେଟ୍ ପୋଲିସ ପକ୍ଷରୁ ମଧ୍ୟ ଏଥିପାଇଁ ଏକ ନମ୍ବର (୯୪୩୯୨୨୪୪୪୧) ଦିଆଯାଇଛି। ସହରକୁ ଅଧିକ ସୁରକ୍ଷିତ ଓ ସୁନ୍ଦର କରିବାକୁ କମିଶନରେଟ୍ ପୋଲିସର ଏହି ସହଯୋଗିତା କାର୍ଯ୍ୟକ୍ରମରେ ଜନସାଧାରଣଙ୍କ ସହଯୋଗ ପାଇଁ ପୋଲିସ କମିଶନର ଆଶା ରଖିଥିବା କହିଛନ୍ତି।