ଭୁବନେଶ୍ୱର, ୧୩।୫ (କ୍ରୀଡ଼ା ପ୍ରତିନିଧି): ଆନ୍ତଃଜିଲା ସାହାଣୀ କପ୍ ଫୁଟବଲ ଟୁର୍ନାମେଣ୍ଟର ୨ଟି ସେମିଫାଇନାଲ ଶୁକ୍ରବାର ଅନୁଷ୍ଠିତ ହୋଇଯାଇଛି। ଏଥିରେ ବିଜୟୀ ହୋଇ କଟକ ଓ କନ୍ଧମାଳ ଦଳ ଫାଇନାଲରେ ପ୍ରବେଶ କରିଛି। କ୍ୟାପିଟାଲ ଫୁଟବଲ ଆରେନାରେ ଅନୁଷ୍ଠିତ ସଂଘର୍ଷପୂର୍ଣ୍ଣ ପ୍ରଥମ ସେମିଫାଇନାଲରେ କଟକ ୪-୩ ଗୋଲରେ ସୁନ୍ଦରଗଡ଼କୁ ପରାସ୍ତ କରିଛି। କଟକ ପକ୍ଷରୁ ସେକ୍ ଫରିଦ ୨ୟ ଓ ୪୬ତମ ମିନିଟରେ ଏବଂ ଦୀନବନ୍ଧୁ ଦାସ ୪୫ ଓ ୫୧ତମ ମିନିଟରେ ୨ଟି ଲେଖାଏ ଗୋଲ ଦେଇଥିଲେ। ସୁନ୍ଦରଗଡ଼ର ସ୍ବାଧୀନ ବଡ଼େଇ ୧୮, ଦୀପକ ମୁଣ୍ଡା ୬୬ ଓ କିଶୋର ଖାଡ଼ିଆ ୯୦+୪ ମିନିଟରେ ଗୋଟିଏ ଲେଖାଏ ଗୋଲ ଦେଇଥିଲେ। ଦ୍ୱିତୀୟ ସେମିଫାଇନାଲରେ କନ୍ଧମାଳ ୨-୧ ଗୋଲରେ ବରଗଡ଼କୁ ହରାଇଛି। ବିଜୟୀ ଦଳର ସଞ୍ଜୀବ ଓରାମ ୧୦, ମାନସ ରଞ୍ଜନ ପ୍ରଧାନ ୫୩ ଓ ବରଗଡ଼ ପକ୍ଷରୁ ଫ୍ରାନ୍ସିସ ଲାକ୍ରା ୬୧ତମ ମିନିଟରେ ଗୋଟିଏ ଲେଖାଏ ଗୋଲ ସ୍କୋର କରିଥିଲେ। କଟକ ଓ କନ୍ଧମାଳ ମଧ୍ୟରେ ଡବଲ୍ ଲିଗ୍ ବିଶିଷ୍ଟ ଫାଇନାଲ ହେବ। କଟକ ଚୌଦ୍ୱାରସ୍ଥିତ ଓଟିଏମ୍ ଗ୍ରାଉଣ୍ଡରେ ୧୪ ତାରିଖରେ ପ୍ରଥମ ଏବଂ କଳିଙ୍ଗ ଷ୍ଟାଡିୟମରେ ୧୭ ତାରିଖରେ ଦ୍ୱିତୀୟ ଫାଇନାଲ ଅନୁଷ୍ଠିତ ହେବ।
