ବରଗଡ଼,୪।୧୦(ପ୍ରେମାନନ୍ଦ ଖମାରୀ): ବରଗଡ଼ ଲେଙ୍ଗୁ ମିଶ୍ର ମିନି ଷ୍ଟାଡିୟମରେ ଫୁଟବଲ ଆସୋସିଏସନ ଅଫ ଓଡ଼ିଶା ଓ ବରଗଡ଼ ଜିଲା କ୍ରୀଡ଼ା ସଂସଦର ମିଳିତ ଆୟୋଜନରେ ଅନୁଷ୍ଠିତ ହେଉଥିବା ଆନ୍ତଃଜିଲା ସାହାଣୀ କପ୍ ଫୁଟବଲ ପ୍ରତିଯୋଗିତାର ଶୁକ୍ରବାର ଅନୁଷ୍ଠିତ ସେମି ଫାଇନାଲ ମ୍ୟାଚରେ ବରଗଡ଼ ପ୍ରତିପକ୍ଷ ରାଉରକେଲାକୁ ୪-୦ ଗୋଲରେ ହରାଇ ପ୍ରଥମ ଥର ପାଇଁ ଫାଇନାଲରେ ପ୍ରବେଶ କରିଛି ।
ଏହି ଉତ୍କଣ୍ଠାପୂର୍ଣ୍ଣ ମ୍ୟାଚରେ ଉଭୟ ଦଳ ଖୁବ ଚିତ୍ତାକର୍ଷକ ଖେଳ ପ୍ରଦର୍ଶନ କରିଥିଲେ । ମ୍ୟାଚର ପ୍ରଥମ ଭାଗରେ ଉଭୟ ଦଳ କେହି କାହାରିକୁ ଗୋଲ ଦେଇ ପାରି ନ ଥିଲେ। ଦ୍ୱିିତୀୟାର୍ଦ୍ଧର ଆରମ୍ଭରୁ ବରଗଡ଼ ଦଳ ଖେଳକୁ ସମ୍ପୂର୍ଣ୍ଣ ନିଜ ନିୟନ୍ତ୍ରଣକୁ ନେଇ ମ୍ୟାଚର ୪ତମ ମିନିଟରେ ଦଳର ୩ନମ୍ବର ଖେଳାଳି ଜିତୁ ମୁଦୁଲି ଦଳ ପକ୍ଷରୁ ପ୍ରଥମ ଗୋଲ ସ୍କୋର କରିଥିଲେ। ଜିତୁ ପୁଣି ୬୧ତମ ମିନିଟରେ ଓ ୭୧ ତମ ମିନିଟରେ ଦୁଇଟି ଗୋଲ ଦେଇ ଦଳକୁ ୩-୦ ରେ ଆଗୁଆ ରଖିଥିଲେ। ଦଳର ୨୦ ନମ୍ବର ଖେଳାଳି ଚନ୍ଦ୍ର ମୁର୍ମୁ ଦଳ ପକ୍ଷରୁ ଆଉ ଗୋଟିଏ ଗୋଲ ସ୍କୋର କରିବା ଫଳରେ ବରଗଡ଼ ଦଳ ୪-୦ ଗୋଲରେ ମ୍ୟାଚ ଜିତି ପ୍ରଥମଥର ପାଇଁ ସାହାଣୀ କପର ଫାଇନାଲରେ ପ୍ରବେଶ କରିଛି।
ଖେଳକୁ ନବୀନ ନାୟକ ପରିଚାଳନା କରିଥିବା ବେଳେ, ତାଙ୍କୁ ଲାଇନ୍ରେ ଜିତେନ୍ଦ୍ରିୟ ଥନାପତି ଓ ଶଶୀକାନ୍ତ ଦାସିଆ ସହଯୋଗ କରିଥିଲେ। ଚତୁର୍ଥ ରେଫରି ଥିଲେ ଲିଙ୍ଗରାଜ ପ୍ରଧାନ। ମ୍ୟାଚ କମିଶନର ଥିଲେ ସୁଜିତ୍ କୁମାର ପାତ୍ର । ସେମି ଫାଇନାଲ ମ୍ୟାଚକୁ ବରଗଡ ଲୋକସଭା ଏମ୍ପି ପ୍ରଦୀପ ପୁରୋହିତ ଓ ପୂର୍ବତନ ବିଧାୟକ ଦେବେଶ ଆଚାର୍ଯ୍ୟ ଯଥାକ୍ରମେ ମୁଖ୍ୟ ଅତିଥି ଓ ସମ୍ମାନିତ ଅତିଥି ଭାବେ ଯୋଗଦେଇ ଉଦ୍ଘାଟନ କରିଥିଲେ।
ମ୍ୟାଚ ପରେ ଜିଲା କ୍ରୀଡା ସଂସଦ ଉପ ସଭାପତି ଯୁଗଳ ପ୍ରସାଦ ସିଂଙ୍କ ସଭାପତିତ୍ୱ ଓ ସଚ୍ଚିଦାନନ୍ଦ ପଣ୍ଡାଙ୍କ ସଂଯୋଜନାରେ ଅନୁଷ୍ଠିତ ପୁରସ୍କାର ବିତରଣ ଉତ୍ସବରେ ପୂର୍ବତନ ବିଧାୟକ ଆଚାର୍ଯ୍ୟ, ଫୁଟବଲ ଏସୋସିଏସନ ଅଫ ଓଡ଼ିଶା (ଫାଓ)ର ଉପ ସଭାପତି ରବି ପଣ୍ଡା, ଜିଲା କ୍ରୀଡା ସଂସଦର ସାଧାରଣ ସମ୍ପାଦକ କିଶୋର କୁମାର ମିଶ୍ର, ପ୍ରାକ୍ତନ ସାଧାରଣ ସମ୍ପାଦକ ଅରୁଣ କୁମାର ମହାନ୍ତି ଓ ପ୍ରଭାତାଦିତ୍ୟ ମିଶ୍ର, ଜିଲା କ୍ରୀଡ଼ା ଅଧିକାରୀ ତୁଷାରକାନ୍ତି ମିଶ୍ର, ଫାଓ ଚୟନକର୍ତ୍ତା କରୁଣାକର ବେହେରା, ଫୁଟବଲ ସମ୍ପାଦକ ସେକ ଶବଦର, କୋଷାଧ୍ୟକ୍ଷ ଡଃ. ଶୁଭ୍ରାଂଶୁ ଶେଖର ମହାପାତ୍ର, କ୍ରିକେଟ ସମ୍ପାଦକ ଅମିୟ ଭୁଷଣ ସାହୁ, ଆଉଟଡୋର ଗେମ୍ସ ସମ୍ପାଦକ ସୁରେଶ ଦାଶ,
କାଉନସିଲ ସଦସ୍ୟ ପ୍ରଦୀପ ସାହୁ, ପ୍ରାକ୍ତନ ଫୁଟବଲ ଖେଳାଳୀ ଜ୍ଞାନ ରଞ୍ଜନ ପୂଜାରୀ, ମ୍ୟାଚ କମିଶନର ସୁଜିତି୍ କୁମାର ପାତ୍ର ଅତିଥି ଭାବରେ ଯୋଗଦେଇ ଉଭୟ ଦଳକୁ ଟ୍ରଫି ପ୍ରଦାନ କରିବା ସହ ପ୍ରତିଯୋଗିତାର କୃତୀ ଖେଳାଳି ଓ ରେଫରୀଙ୍କୁ ସମ୍ବର୍ଦ୍ଧିତ କରିଥିଲେ ।
ଏଥିରେ ବରଗଡ ଜୋନର ଶ୍ରେଷ୍ଠ ଗୋଲ ରକ୍ଷକ ଭାବରେ କେନ୍ଦୁଝର ଦଳର ଗୋଲ ରକ୍ଷକ ଯଦୁନାଥ ସର୍ଦ୍ଦାର, ଶ୍ରେଷ୍ଠ ଷ୍ଟପର ଭାବରେ ବରଗଡ ଦଳର ସଞ୍ଜୀବ ଦଂସନା, ପ୍ରତିଯୋଗିତାର ଶ୍ରେଷ୍ଠ ଖେଳାଳି ଭାବରେ ବରଗଡ ଦଳର ବିବେକ ବାଗ ଓ ସେମି ଫାଇନାଲ ଖେଳର ଶ୍ରେଷ୍ଠ ଖେଳାଳି ଭାବେ ବରଗଡ ଦଳର ଜିତୁ ମୁଦୁଲିଙ୍କୁ ଅତିଥିମାନେ ସମ୍ବର୍ଦ୍ଧିତ କରିଥିଲେ । ଏହା ସହ ଜିଲା କ୍ରୀଡା ସଂସଦ ପକ୍ଷରୁ ସମସ୍ତ ମ୍ୟାଚ ଅଫିସିଆଲ ତଥା ଚୟନ କର୍ତ୍ତା ତଥା ଅତିଥିମାନଙ୍କୁ ସମ୍ବର୍ଦ୍ଧିତ କରାଯାଇଥିଲା ।