ଭୁବନେଶ୍ୱର, ୨୪।୪ (କ୍ରୀଡ଼ା ପ୍ରତିନିଧି): ଫୁଟବଲ ଆସୋସିଏଶନ ଅଫ୍ ଓଡ଼ିଶା (ଫାଓ) ଓ ରାଜ୍ୟ କ୍ରୀଡ଼ା ବିଭାଗର ମିଳିତ ଆନୁକୂଲ୍ୟରେ ସିନିୟର ପୁରୁଷ ଆନ୍ତଃଜିଲା ଫୁଟବଲ ଟୁର୍ନାମେଣ୍ଟ ସାହାଣୀ କପ୍ ରବିବାର ଭୁବନେଶ୍ୱର ଓ କଟକର ବିଭିନ୍ନ ଗ୍ରାଉଣ୍ଡରେ ଆରମ୍ଭ ହୋଇଛି। ପ୍ରଥମ ଦିବସରେ ୪ଟି ମ୍ୟାଚ ହୋଇଥିବାବେଳେ ସୁନ୍ଦରଗଡ଼, ଭୁବନେଶ୍ୱର, ଜଗତ୍ସିଂହପୁର ଓ ବୌଦ୍ଧ ଦଳ ବିଜୟ ହାସଲ କରିଛନ୍ତି। କଟକର ବିଡ଼ାନାସୀ ଗ୍ରାଉଣ୍ଡରେ ଅନୁଷ୍ଠିତ ମ୍ୟାଚରେ ସୁନ୍ଦରଗଡ଼ ୫-୦ ଗୋଲରେ ନୟାଗଡ଼କୁ ପରାସ୍ତ କରିଛି। ବିଜୟୀ ଦଳ ପକ୍ଷରୁ ସ୍ବାଧୀନ ବଢ଼େଇ, ୩ୟ ଓ ୨୬ତମ ମିନିଟରେ ୨ଟି ଏବଂ ମହେଶ ପ୍ରଧାନ (୪୨ତମ ମିନିଟ), ମୋହନ ମାଝି (୬୬) ଓ ଦୀପକ ମୁଣ୍ଡା (୯୦+୧) ଗୋଟିଏ ଲେଖାଏ ଗୋଲ ଦେଇଥିଲେ। ମ୍ୟାଚ କମିଶନର ଥିଲେ ସୁଜିତ କୁମାର ପାତ୍ର। ପୂର୍ବତନ ଜାତୀୟ ଖେଳାଳି ଯୁଧିଷ୍ଠିର ସେଠୀ, ଫାଓ ଯୁଗ୍ମ ସମ୍ପାଦକ ବିଶ୍ୱ ରଞ୍ଜନ ଘଡ଼େଇ, ସଦସ୍ୟ ବୀରେନ୍ଦ୍ର ବେହେରା, ବିଜୟ କୁମାର ଦାସ, ରମେଶ ମଲିକ, ତଡ଼ିତ କୁମାର ରାଉତ, ପ୍ରଭାତ ମହାପାତ୍ର, ଆର.ଆଇ. ଟିଗା ଓ କାର୍ତ୍ତିକ ବେହେରା ଅତିଥିଭାବେ ଯୋଗ ଦେଇଥିଲେ।
ଭୁବନେଶ୍ୱରର କ୍ୟାପିଟାଲ ଫୁଟବଲ ଆରେନାରେ ଅନୁଷ୍ଠିତ ମ୍ୟାଚରେ ଭୁବନେଶ୍ୱର ୭-୦ ଗୋଲରେ ପୁରୀକୁ ପରାସ୍ତ କରିଛି। ପପୁ ମାଝି ୪, ୧୫, ୭୬, ୮୬ ଓ ୯୦+୧ ମିନିଟରେ ଏକାକୀ ୫ ଗୋଲ ଦେଇଥିବାବେଳେ ଗୌରବ ସିଂ ନେଗୀ ୩୭ ଓ ତପନ ନାୟକ ୬୧ତମ ମିନିଟରେ ଗୋଟିଏ ଲେଖାଏ ଗୋଲ ସ୍କୋର କରିଥିଲେ। ମ୍ୟାଚ କମିଶନର ସୁଦୀପ୍ତା ଦାଶ। ଏମ୍ଜିଏମ୍ ମିନେରାଲର ଚେୟାରମ୍ୟାନ ପଙ୍କଜ ଲୋଚନ ମହାନ୍ତି, ରାଜ୍ୟ କ୍ରୀଡ଼ା ବିଭାଗର ଯୁଗ୍ମ ସଚିବ ରଞ୍ଜିତ ପରିଡ଼ା, ଓଏସ୍ଡି ସୋନାଲି ଚାନ୍ଦ, ଓଏସ୍ଡି ଶୁଭେନ୍ଦୁ ପଣ୍ଡା, ପୂର୍ବତନ କ୍ରୀଡ଼ା ପ୍ରଶାସକ ଅଶୋକ ମହାନ୍ତି, ଫାଓ ଯୁଗ୍ମ ସମ୍ପାଦକ ଅଭିଜିତ ପାଲ, ସଦସ୍ୟ ସୁନୀଲ ମିତ୍ର ପ୍ରମୁଖ ଅତିଥିଭାବେ ଯୋଗ ଦେଇଥିଲେ।
କଟକ ଚୌଦ୍ୱାରା ଓଟିଏମ୍ ପଡ଼ିଆରେ ଅନୁଷ୍ଠିତ ମ୍ୟାଚରେ ଜଗତ୍ସିଂହପୁର ୧-୦ ଗୋଲରେ ବାଲେଶ୍ୱରକୁ ପରାସ୍ତ କରିଛି। ଯଦୁନାଥ ହାଁସଦା ୨୩ତମ ମିନିଟରେ ସ୍କୋର କରିଥିବା ଗୋଲଟି ଶେଷରେ ନିର୍ଣ୍ଣାୟକ ହୋଇଥିଲା। ମ୍ୟାଚ କମିଶନର ଥିଲେ ଜୁଗଳ ଚନ୍ଦ୍ର ଦାସ। ଫାଓ ସମ୍ପାଦକ ଆଶୀର୍ବାଦ ବେହେରା, କୋଷାଧ୍ୟକ୍ଷ ଭକ୍ତବଲ୍ଲଭ ଦାସ, ଉପସଭାପତି ବିଜୟ ଦାସ, ଦିଲୀପ କୁମାର ସାହୁ, ଯୁଗ୍ମ ସମ୍ପାଦକ ମହମ୍ମଦ ସହିଦ ଜବାର, ସଦସ୍ୟ ମାନସ ସାମଲ, ନରେନ୍ଦ୍ର ସାହୁ, ପ୍ରଭାକର ବର୍ଦ୍ଧନ, ସହଦେବ ରାଉତ, ହୃଷିକେଶ ବେହେରା, ପୂର୍ବତନ ଖେଳାଳି ତଇରୁଲ ହୋଦା, ଚୌଦ୍ୱାର ସ୍ପୋଟର୍ସ କାଉନ୍ସିଲ ସମ୍ପାଦକ ଅଶୋକ ସାହୁ ପ୍ରମୁଖ ଅତିଥି ଥିଲେ।
ଭୁବନେଶ୍ୱରସ୍ଥିତ ୭ମ ବାଟାଲିୟନ ପଡ଼ିଆରେ ଅନୁଷ୍ଠିତ ମ୍ୟାଚରେ ବୌଦ୍ଧ ୩-୨ ଗୋଲରେ ଅନୁଗୋଳକୁ ହରାଇ ଦେଇଛି। ବିଜୟୀ ଦଳ ପକ୍ଷରୁ ବିକ୍ରମ ନାଏକ, ଜୀତେନ୍ଦ୍ର ଦେହୁରିଆ ଓ ସମିର ପ୍ରଧାନ ଏବଂ ପରାଜିତ ଦଳର ଜୀତେନ୍ଦ୍ର ବିରୁଆ ଓ ସୁନ୍ଦର ହାଁସଦା ଗୋଟିଏ ଲେଖାଏ ଗୋଲ ଦେଇଥିଲେ। ଫାଓ ସଦସ୍ୟ ସୌର୍ଯ୍ୟରଞ୍ଜନ ପରିଜା, ଟି. ମୋହନ ରାଓ ଓ ଫାଓ ରେଫରୀ ମୁଖ୍ୟ ଦୁର୍ଗା ମାଧବ ନାଏକ ପ୍ରମୁଖ ଅତିଥିଭାବେ ଯୋଗ ଦେଇଥିଲେ।