![](https://www.dharitri.com/wp-content/uploads/2024/05/as-1.jpg)
ଭେଡେନ,୨୯।୫(ସୁଦନ ମହାକୁର):ବରଗଡ଼ ଜିଲା ଭେଡେନ ଥାନା ଅର୍ନ୍ତଗତ ସହରାଟିକ୍ରାଠାରେ ସୋମବାର ରାତିରେ ଘଟିଥିବା ମଙ୍ଗନିଆ ସେଠ(୫୨) ହତ୍ୟା ଘଟଣାର ପର୍ଦ୍ଦାଫାଶ କରିଛି ପୋଲିସ। ନିଶା ସେବନ ପାଇଁ ଟଙ୍କା ନ ଦେବାରୁ ରାତିରେ ଶୋଇଥିବାବେଳେ ପ୍ରତିଶୋଧ ପରାୟଣ ହୋଇ ନିଶାସକ୍ତ ପୁଅ ନିଜର ବାପାଙ୍କୁ ଏକ ଶକ୍ତ ରସିରେ ଗଳା ଚିପି ହତ୍ୟା କରିଥିବା ପୋଲିସ ଆଗରେ ସ୍ବୀକାର କରିଛନ୍ତି।
ସୂଚନା ଅନୁସାରେ, ସହରାଟିକ୍ରା ଅରୋ ବିହାର ନିକଟରେ ରହୁଥିବା ମଙ୍ଗନିଆ ସେଠ ସୋମବାର ରାତି ଭୋଜନ ପରେ ପ୍ରବଳ ଗୁଳୁଗୁଳି ଯୋଗୁ ନିଜର ଦଉଡିଆ ଖଟ ନେଇ ଛାତ ଉପରକୁ ଶୋଇବାକୁ ଯାଇଥିଲେ। କିନ୍ତୁ ପରଦିନ ସକାଳୁ ଦୀର୍ଘ ସମୟଧରି ନ ଉଠିବାରୁ ପରିବାର ଲୋକେ ଛାତ ଉପରକୁ ଯାଇଥିଲେ। ମାତ୍ର ଖଟିଆରେ ତାଙ୍କର ମୃତଦେହ ପଡ଼ିଥିବା ଏବଂ ଗଳାରେ ଦାଗ, ଆଣ୍ଠୁରେ ଆଘାତ ଲାଗିଥିବା ପରିବାର ଲୋକେ ଦେଖିବାକୁ ପାଇଥିଲେ।
ଖବରପାଇ ଭେଡେନ ଥାନା ଅଧିକାରୀ ପ୍ରେମଜିତ ଦାଶ ସଦଳବଳେ ଘଟଣାସ୍ଥଳକୁ ପହଞ୍ଚି ଅନୁସନ୍ଧାନୀ କୁକୁର, ସାଇଣ୍ଟିଫିକ ଟିମ ଜରିଆରେ ଅନୁସନ୍ଧାନ ଆରମ୍ଭ କରିଥିଲେ। ମାତ୍ର ପାରିପାଶର୍ବିକ ସ୍ଥିତି, ବାପା, ପୁଅଙ୍କ କଳି, ସ୍ଥାନୀୟ ସରପଞ୍ଚଙ୍କ ବୟାନ ଅନୁଯାୟୀ ତାଙ୍କ ପୁତ୍ର ଗୋପାଳ(୨୮)କୁ ସନ୍ଦେହରେ ଥାନାରେ ଅଟକ ରଖି ଜେରା କରିଥିଲା। ତେବେ ପଚରାଉଚରା ସମୟରେ ଗୋପାଳ ପୋଲିସ ଆଗରେ ସମସ୍ତ ଘଟଣାକ୍ରମ ପ୍ରକାଶ କରିଥିବା ପୋଲିସ କହିଛି। ଏ ନେଇ ମୃତକଙ୍କ ଝିଅ ମାଧବୀଙ୍କ ଏତଲା ଅନୁଯାୟୀ ପୋଲିସ ଦଫା ୩୦୨ରେ ଏକ ମାମଲା ( ନମ୍ବର.୧୬୫।୨୪) ରୂଜୁ କରିଛି। ତେବେ ଘଟଣାର ପର୍ଦ୍ଦାଫାଶ ହେବାପରେ ଅଭିଯୁକ୍ତଙ୍କୁ ଗିରଫ କରି ବୁଧବାର କୋର୍ଟ ଚାଲାଣ କରିଛି।