ବ୍ରହ୍ମପୁର ଅଫିସ,୨୨।୩: ପଶ୍ଚିମା ଝଡ ପ୍ରଭାବରେ ବ୍ରହ୍ମପୁରରେ ଗତ ୩ ଦିନ ଧରି ପାଗ ମେଘୁଆ ସାଙ୍ଗକୁ ସନ୍ଧ୍ୟାରୁ ରାତି ଯାଏ ବର୍ଷା ଲାଗି ରହୁଥିଲା। ପୂର୍ବାହ୍ନରୁ ଅପରାହ୍ନ ଟାଣ ଖରା ହେଉଥିବା ବେଳେ ସନ୍ଧ୍ୟାରେ ପାଗ ମେଘୁଆ ହୋଇ ଝିପି ଝିପି ବର୍ଷା ଲାଗି ରହୁଥିଲା। ମଙ୍ଗଳବାର ପୂର୍ବାହ୍ନରେ ପାଗ ଭଲ ଥିବା ବେଳେ ଅପରାହ୍ନରେ ହଠାତ ଆକାଶ ମେଘାଛନ ହୋଇ ଝିପି ଝିପି ବର୍ଷା ଆରମ୍ଭ ହୋଇଥିଲା। ଏହାପରେ ଅପରାହ୍ନ ୨ଟା ବେଳକୁ ଘଡ ଘଡି ବିଜୁଳି ସାଙ୍ଗକୁ ପ୍ରାୟ ୧ ଘଣ୍ଟା ଧରି ବର୍ଷା ଲାଗି ରହିଥିଲା। ଏହି ବର୍ଷାରେ ସହର ତଳି ଅଞ୍ଚଳ ସମେତ ବିଭିନ୍ନ ସାହିରେ କୁତ୍ରିମ ବନ୍ୟା ସୃଷ୍ଟି ହୋଇ ଲୋକେ ଜଳବନ୍ଦୀ ହୋଇଥିଲେ।
ନେହେରୁନଗର ୭ମ ଲେନରେ ନୂତନ ଭାବେ ଡ୍ରେନ୍ କାର୍ଯ୍ୟ ହୋଇଥିବା ବେଳେ ବର୍ଷା ପ୍ରଭାବରେ ନର୍ଦ୍ଦମା ପାଣି ଘର ସମ୍ମୁଖରେ ଥିବା ଗାଡିଗୁଡିକ ବୁଡି ଯାଇଥିବା ଦେଖିବାକୁ ମିଳିଥିଲା। ଏପରିକି ଉକ୍ତ ସାହିରେ ପାଇପ୍ ଲାଇନ ବିଛାଇବା ପାଇଁ ରାସ୍ତା ଖୋଳାଯାଇଛି। ଏଥିରେ ବର୍ଷା ପାଣି ଜମି ରହିବା ଫଳରେ ବହୁ ଲୋକ ଯାତାୟାତ ସମୟରେ ଦୁର୍ଘଟଣାର ସମ୍ମୁଖୀନ ହୋଇଥିଲେ। ସେହିଭଳି ଅଶୋକନଗର ମୁଖ୍ୟ ରାସ୍ତାରେ ଆଣ୍ଠୁଏ ଉଚ୍ଚର ପାଣି ଜମି ରହିଥିଲା। ଫଳରେ ସେହି ରାସ୍ତା ଦେଇ ନୂଆ ବସ୍ଷ୍ଟାଣ୍ଡ ଓ କମାପଲୀକୁ ଯିବା ପାଇଁ ସମ୍ଭବ ହୋଇପାରି ନ ଥିଲା। ଯାହାକୁ ନେଇ ସାହି ବାସିନ୍ଦା ଅସନ୍ତୋଷ ପ୍ରକାଶ କରିବା ସହ ବ୍ରହ୍ମପୁର ମହାନଗର ନିଗମର ଖାମ ଖିଆଲି ନୀତି ଯୋଗୁ ଏଭଳି ପରିସ୍ଥିତି ସୃଷ୍ଟି ହୋଇଥିବା ଅଭିଯୋଗ କରିଛନ୍ତି। ସେହିପରି ଲାଞ୍ଜିପଲୀ ଉମାନଗର ଓ ଗଜପତିନଗର ଆଦି ଅଞ୍ଚଳର ମୁଖ୍ୟ ରାସ୍ତାରେ ଦୀର୍ଘ ସମୟ ଧରି ପାଣି ଜମି ରହିଥିଲା। ଏପରିକି ଆଙ୍କୁଲି ରାଜସ୍ବ ନୀରିକ୍ଷକଙ୍କ କାର୍ଯ୍ୟାଳୟ ପରିସରରେ ମଧ୍ୟ ପାଣିର ଜମା ହୋଇ ରହିଥିଲା।