ନୂଆଦିଲ୍ଲୀ, ୧୬।୨: ଦିଲ୍ଲୀର ଏକ ରେଷ୍ଟୁରାଣ୍ଟ ଫ୍ରିଜର ଭିତରୁ ମହିଳାଙ୍କ ମୃତଦେହ ମିଳିବା ଘଟଣାରେ ଗିରଫ ସାହିଲଙ୍କୁ ଦିଲ୍ଲୀର ଏକ କୋର୍ଟ ୫ ଦିନିଆ ରିମାଣ୍ଡରେ ପଠାଇଛି। ବାହାଘରର ୩ ଘଣ୍ଟା ପୂର୍ବରୁ ସାହିଲ ତାଙ୍କ ଲିଭ୍-ଇନ୍ ପାର୍ଟନର ନିକି ଯାଦବଙ୍କୁ ହତ୍ୟା କରିଥିବା ପୋଲିସ କହିଛି। ସାହିଲ ନିକିଙ୍କୁ ବିବାହ ପ୍ରତିଶ୍ରୁତି ଦେଇଥିଲେ ହେଁ ଘରଲୋକ ଠିକ୍ କରିଥିବା ଅନ୍ୟ ଜଣେ ଯୁବତୀଙ୍କୁ ସେ ବାହା ହେବାଲାଗି ରାଜି ହୋଇଥିଲେ। ସାହିଲ କିନ୍ତୁ ଏ ବିଷୟରେ ନିକିଙ୍କୁ ଜଣାଇ ନ ଥିଲେ। ବାହାଘରର ଗୋଟିଏ ଦିନ ପୂର୍ବରୁ ସାହିଲଙ୍କର ଅନ୍ୟ ଜଣକ ସହ ନିର୍ବନ୍ଧ ହୋଇସାରିଥିବା ପ୍ରେମିକା ନିକି ଜାଣିବାକୁ ପାଇଥିଲେ। ବାହାଘର ଦିନ ହିଁ ନିକି ସାହିଲଙ୍କୁ ଦେଖା କରିଥିଲେ। କାର୍ରେ ଦୁହେଁ ବସି କଥା ହେଉଥିବାବେଳେ ସେମାନଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ସାହିଲ ରାଗିଯାଇ ଡେଟା କେବୁଲ୍ରେ ନିକିଙ୍କ ଗଳାଚିପି ହତ୍ୟା କରିଥିଲେ। ଏହାପରେ ସାହିଲ ମୃତଦେହକୁ ତାଙ୍କ ରେଷ୍ଟୁରାଣ୍ଟ ଫ୍ରିଜର ଭିତରେ ଲୁଚାଇ ଦେଇଥିଲେ।
ସାଉଥ୍-ଓ୍ବେଷ୍ଟ ଦିଲ୍ଲୀସ୍ଥିତ ନିଜ ଘରେ ଏକୁଟିଆ ରହୁଥିବାବେଳେ ତାଙ୍କ ପରିବାର ଲୋକେ ହରିୟାଣାରେ ଥିଲେ। ନିକି ଘରକୁ ନ ଫେରିବା ଦେଖି ତାଙ୍କ ପଡ଼ୋଶୀ ଥାନାରେ ଅଭିଯୋଗ କରିଥିଲେ। ପୋଲିସ ତଦନ୍ତ ପରେ ନିକିଙ୍କ ମୃତଦେହ ପୋଲିସ ମଙ୍ଗଳବାର ସାହିଲଙ୍କ ରେଷ୍ଟୁରାଣ୍ଟ ଫ୍ରିଜର ଭିତରୁ ପାଇଥିଲା। ୨୪ ବର୍ଷୀୟ ଫାର୍ମା ଗ୍ରାଜୁଏଟ୍ ସାହିଲ ଏକବର୍ଷ ଧରି ନିକିଙ୍କ ସହ ଲିଭ୍ଇନ୍ ରିଲେସନ୍ଶିପ୍ରେ ଥିଲେ। ଦୁହେଁ ଏକାଠି ମେଡିକାଲ ଏଣ୍ଟ୍ରାନ୍ସ ଏଗ୍ଜାମ୍ ପାଇଁ ପ୍ରସ୍ତୁତ ହେଉଥିବାବେଳେ ସେମାନଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ିଉଠିଥିଲା। ଫେବୃୟାରୀ ୯ରେ କିନି ତାଙ୍କ ଘରକୁ ଯାଉଥିବାର ଏକ ଭିଡିଓ ପୋଲିସ ହାତକୁ ଲାଗିଛି। ନିକିଙ୍କ ବାପା ସୁନୀଲ ଯାଦବ ସାହିଲଙ୍କୁ ମୃତ୍ୟୁଦଣ୍ଡ ଦିଆଯିବା ନେଇ ଦାବି କରିଛନ୍ତି। ସାହିଲଙ୍କ କାର୍ ଜବତ କରି ପୋଲିସ ଘଟଣାର ତଦନ୍ତ ଚଳାଇଛି।