ନୂଆଦିଲ୍ଲୀ,୧୯।୧୨(ପି.ଟି.): ଅଲିମ୍ପିକ୍ ରୌପ୍ୟ ପଦକ ବିଜୟିନୀ ତଥା ବିଶ୍ୱ ଚାମ୍ପିୟନ ବ୍ୟାଡମିଣ୍ଟନ ତାରକା ପି.ଭି. ସିନ୍ଧୁଙ୍କ ଅନୁରୋଧକୁ ଶେଷରେ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ରକ୍ଷା କରିଛି। ଆସନ୍ତାବର୍ଷ ଜାନୁୟାରୀରେ ଆୟୋଜନ ହେବାକୁ ଥିବା ୩ଟି ଟୁର୍ନାମେଣ୍ଟ ଖେଳିବା ଅବସରରେ ଫିଜିଓ ଓ ଫିଟ୍ନେସ ଟ୍ରେନରଙ୍କୁ ନିଜ ସାଥିରେ ଯାତ୍ରା କରିବା ନେଇ ସିନ୍ଧୁ ସାଇକୁ ଅନୁରୋଧ ଜଣାଇଥିଲେ। ଏବେ ସିନ୍ଧୁଙ୍କ ଏହି ଅନୁରୋଧକୁ ରକ୍ଷା କରିଛନ୍ତି ସରକାର। ଅବଶ୍ୟ ଏ ବାବଦରେ ସରକାରଙ୍କୁ ୮ ଲକ୍ଷ ୨୫ ହଜାର ଟଙ୍କା ଖର୍ଚ୍ଚ କରିବାକୁ ପଡିବ।
୨୬ ବର୍ଷୀୟା ସିନ୍ଧୁ ଟାର୍ଗେଟ ଅଲିମ୍ପିକ୍ ପୋଡିୟମ ସ୍କିମ୍ରେ ସାମିଲ ରହିଛନ୍ତି। ସେ ଜାନୁୟାରୀରେ ପ୍ରତିଯୋଗିତାମୂଳକ ବ୍ୟାଡ୍ମିଣ୍ଟନକୁ ଫେରିବେ। କରୋନ ସଂକ୍ରମଣ କାରଣରୁ ସେ ବ୍ରେକ୍ ନେଇଥିଲେ। ଜାନୁୟାରୀ ୧୨ରୁ ୧୭ ମଧ୍ୟରେ ୟୋନେକ୍ସ ଥାଇଲାଣ୍ଡ ଓପନ, ୧୯ରୁ ୨୪ ମଧ୍ୟରେ ଟୟୋଟା ଥାଇଲାଣ୍ଡ ଓପନ ଓ ୨୭ରୁ ୩୧ ତାରିଖ ମଧ୍ୟରେ ବ୍ୟାଙ୍କକରେ ଓ୍ବାଲର୍ଡ ଟୁର ଫାଇନାଲ୍ସ ଆୟୋଜନ ହେବାର କାର୍ଯ୍ୟକ୍ରମ ରହିଛି। ସିନ୍ଧୁ ଏବେ ଲଣ୍ଡନରେ ରହି ଟ୍ରେନିଂ ଜାରି ରଖିଛନ୍ତି। ସିନ୍ଧୁ ଗତ ଅକ୍ଟୋବରରେ ଡେନ୍ମାର୍କ ଓପନ୍ରୁ ଓହରିଯାଇଥିଲେ।
