ଜୟପୁର, ୧୨ା୫: ଚଳିତ ବର୍ଷ ଶେଷ ଭାଗରେ ରାଜସ୍ଥାନ ବିଧାନସଭା ନିର୍ବାଚନ ହେବାକୁ ଥିବାବେଳେ ମୁଖ୍ୟମନ୍ତ୍ରୀ ଅଶୋକ ଗେହଲଟ ଏବଂ ଦଳର ଶୀର୍ଷ ନେତୃତ୍ୱକୁ ଚ୍ୟାଲେଞ୍ଜ କରି ଅସନ୍ତୁଷ୍ଟ କଂଗ୍ରେସ ନେତା ସଚିନ ପାଇଲଟ୍ ଗୁରୁବାର ୫ ଦିନିଆ ଜନସଂଘର୍ଷ ଯାତ୍ରା ଆରମ୍ଭ କରିଛନ୍ତି। ଏହି ଯାତ୍ରା ଆଜମେରରୁ ଜୟପୁର ୧୨୫ କିଲୋମିଟର ଅତିକ୍ରମ କରିବ। ପୂର୍ବର ଭାଜପା ସରକାର ସମୟରେ ହୋଇଥିବା ଦୁର୍ନୀତି ବିରୋଧରେ ଗେହଲଟ୍ ସରକାର କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ବିଫଳ ହୋଇଥିବାରୁ ସଚିନ ଗତ ମାସରେ ଏହାର ସମାଲୋଚନା କରିବା ସହ ଗୋଟିଏ ଦିନ ଅନଶନରେ ବସିଥିଲେ। ଗୁରୁବାର ଆରମ୍ଭ ହୋଇଥିବା ଜନସଂଘର୍ଷ ଯାତ୍ରା କଗ୍ରେସ ନେତୃତ୍ୱ ଉପରେ ଚାପ ପକାଇବାକୁ ଉଦ୍ଦିଷ୍ଟ ବୋଲି କୁହାଯାଉଛି। ପୂର୍ବତନ ଉପମୁଖ୍ୟମନ୍ତ୍ରୀ ସଚିନ କହିଛନ୍ତି, ନିଜର ସ୍ବର ଉଠାଇବା ସହ ଜନସାଧାରଣଙ୍କ ସ୍ବରକୁ ଶୁଣିବା ପାଇଁ ଏହି ପଦଯାତ୍ରା ଆରମ୍ଭ ହୋଇଛି। ପ୍ରଚଣ୍ଡ ରୌଦ୍ରକୁ ନିଆଁର ନଦୀ ବୋଲି ଅଭିହିତ କରି ଆମକୁ ଏହା ପାରିହେବାକୁ ପଡ଼ିବ ବୋଲି ସଚିନ କହିଥିଲେ। ସଚିନ ଟ୍ରେନ୍ ଯୋଗେ ଆଜମେରରେ ପହଞ୍ଚତ୍ବା ପରେ ଜୟପୁର ରାଜପଥରେ ଏକ ସଭାକୁ ସମ୍ବୋଧନ କରିଥିଲେ। ଯାତ୍ରାରେ ତାଙ୍କ ସହ ହଜାର ହଜାର ଦଳୀୟ କର୍ମୀ ସାମିଲ ହୋଇଥିଲେ। ଯାତ୍ରାରେ ପୂର୍ବତନ ମନ୍ତ୍ରୀ ରାଜେନ୍ଦ୍ର ଚୌଧରୀ ଏବଂ ସ୍ତାନୀୟ ନେତା ମହେନ୍ଦ୍ର ରାଲଓ୍ବାତା ପ୍ରମୁଖ ଯୋଗ ଦେଇଥିଲେ।