ନୂଆଦିଲ୍ଲୀ, ୭ା୧୦ (ପି.ଟି.)-ଷ୍ଟାର ଇଣ୍ଡିଆନ ବ୍ୟାଟ୍ସମ୍ୟାନ ଦମ୍ପତି ସାଇନା ନେହ୍ବାଲ ଓ ପାରୁପଲ୍ଲୀ କାଶ୍ୟପ ମଙ୍ଗଳବାର ଡେନମାର୍କ ଓପନ୍ ସୁପର ୭୫୦ ଟୁର୍ନାମେଣ୍ଟରୁ ଓହରିଯାଇଛନ୍ତି। ଓଡେଞ୍ଜରେ ଅକ୍ଟୋବର ୧୩ରୁ ଏହି ଟୁର୍ନାମେଣ୍ଟ ସହ ଅନ୍ତର୍ଜାତୀୟ କ୍ୟାଲେଣ୍ଡରର ପୁନଃ ଆରମ୍ଭ ହେବ। ମାର୍ଚ୍ଚରେ ଅଲ୍ ଇଂଲଣ୍ଡ ଚାମ୍ପିୟନଶିପ୍ ଶେଷ ହେବା ପରେ କୋଭିଡ୍-୧୯ ମହାମାରୀ ଯୋଗୁ ବିଡବ୍ଲ୍ୟୁଏଫ୍ (ବ୍ୟାଡ୍ମିଣ୍ଟନ ଓ୍ବାଲର୍ଡ ଫେଡେରେଶନ)ର ଓ୍ବାଲର୍ଡ ଟୁର୍ ଶଟ୍ଡାଉନ୍ ହୋଇଥିଲା। ଲଣ୍ଡନ ଅଲିମ୍ପିକ୍ସ ବ୍ରୋଞ୍ଜ ବିଜୟିନୀ ସାଇନା କହିଛନ୍ତି ଡେନମାର୍କ ଓପନରୁ ଓହରିଯିବା ଲାଗି ସେ ନିଷ୍ପତ୍ତି ନେଇଛନ୍ତି। ଜାନୁୟାରୀରେ ଏସିଆନ ଟୁର୍ ସହ ସେ ସିଜନ ଆରମ୍ଭ କରିବେ। ୭୫୦,୦୦୦ ଆମେରିକୀୟ ଡଲାର ପୁରସ୍କାରବିଶିଷ୍ଟ ଡେନମାର୍କ ଓପନ୍ରେ ଅଂଶଗ୍ରହଣ କରିବା ଲାଗି ସାଇନା ଓ କାଶ୍ୟପ ବ୍ୟାଡ୍ମିଣ୍ଟନ ଆସୋସିଏଶନ ଅଫ୍ ଇଣ୍ଡିଆ (ବାଇ)ଠାରୁ ଗତ ମାସରେ ଅନୁମତି ନେଇଥିଲେ। କୋଭିଡ୍-୧୯ ପାଇଁ ବ୍ୟାଡମିଣ୍ଟନ ଓ୍ବାଲର୍ଡ ଫେଡେରେଶନ ଥୋମାସ ଓ ଉବର କପ୍ ଫାଇନାଲ୍ସ (ଅକ୍ଟୋବର ୩ରୁ୧୧), ଏସିଆରେ ୩ଟି ଇଭେଣ୍ଟ (ନଭେମ୍ବରରେ) ସ୍ଥଗିତ ରଖି ୨୦୨୧କୁ ଘୁଞ୍ଚାଇ ଦେଇଥିଲା। ଡେନମାର୍କ ମାଷ୍ଟର୍ସ (ଅକ୍ଟୋବର ୨୦ରୁ ୨୫)କୁ ବାତିଲ କରି ଦେଇଥିଲା। ଅବଶିଷ୍ଟ ସିଜନରେ ଡେନମାର୍କ ଓପନ ଏକମାତ୍ର ଓ୍ବାଲର୍ଡ ଟୁର୍ ଭାବେ ଖେଳାଯିବ। ସାଇନା କହିଛନ୍ତି ଇଞ୍ଜୁରି ପାଇଁ ସେ ଟୁର୍ନାମେଣ୍ଟରୁ ଓହରି ନାହାନ୍ତି। ଅବଶିଷ୍ଟ ସିଜନରେ ଯଦି ତିନୋଟି ଟୁର୍ନାମେଣ୍ଟ ଖେଳାଯାଇଥାନ୍ତା ତେବେ ସେ ଅଂଶଗ୍ରହଣ କରିଥାନ୍ତୋ। ଜାନୁୟାରୀରେ ଏସିଆନ ଟୁର୍ ସହ ସେ ଖେଳ ଆରମ୍ଭ କରିବା ଲାଗି ବିଚାର କରୁଛନ୍ତି।
