ନୂଆଦିଲ୍ଳୀ,୯।୮(ପି.ଟି.): ଲଣ୍ଡନ ଅଲିମ୍ପିକ୍ସ ବ୍ରୋଞ୍ଜ୍ ପଦକ ବିଜୟିନୀ ସାଇନା ନେହ୍ବାଲ ଦୀର୍ଘ ଦିନ ପରେ ପୁଣି ଟ୍ରେନିଂ ଆରମ୍ଭ କରିଛନ୍ତି। ହାଇଦ୍ରାବାଦ୍ର ଏକ ସ୍ବତନ୍ତ୍ର ସ୍ଥାନରେ ସେ ଅଭ୍ୟାସ ଆରମ୍ଭ କରିଛନ୍ତି। କରୋନା ଭାଇରସ ସଂକ୍ରମଣ କାରଣରୁ କିଛି ମାସ ହେବ କ୍ରୀଡ଼ା ସମ୍ପୂର୍ଣ୍ଣ ଠପ୍ ହୋଇଯାଇଥିଲା। ତେବେ ଆଗାମୀ କେତେ ସପ୍ତାହ ପରେ ସେ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ପୁଲେଲା ଗୋପୀଚାନ୍ଦ ଏକାଡେମୀରେ ଜାତୀୟ କ୍ୟାମ୍ପରେ ଯୋଗ ଦେବେ ବୋଲି ଆଶା କରାଯାଉଛି।
ଟୋକିଓ ଅଲିମ୍ପିକ୍ସରେ ଅଂଶଗ୍ରହଣ କରିବାର ସମ୍ଭାବନା ରଖୁଥିବା ୮ଜଣ ଖେଳାଳିଙ୍କ ମଧ୍ୟ ସାଇନା ଅନ୍ୟତମ। ସାଇ ସାଇନାଙ୍କୁ ଗୋପୀଚାନ୍ଦ ଏକାଡେମୀରେ ଟ୍ରେନିଂ ଆରମ୍ଭ କରିବାକୁ ସାଇ ଅନୁମତି ଦେଇଛି। ତେଲେଙ୍ଗାନା ସରକାର ଅଗଷ୍ଟ ୧ ତାରିଖରେ ଟ୍ରେନିଂ ପାଇଁ ଅନୁମତି ଦେଇଛନ୍ତି। ୭ ତାରିଖରୁ ଏହି ଏକାଡେମୀରେ ଟ୍ରେନିଂ ଆରମ୍ଭ ହୋଇଛି। ପୂର୍ବତନ ୧ ନମ୍ବର ମହିଳା ଖେଳାଳି ସାଇନା ସ୍ବାମୀ ତଥା ଅନ୍ୟତମ ବ୍ୟାଡମିଣ୍ଟନ ତାରକା ପାରୁପାଲ୍ଲୀ କାଶ୍ୟପ ଓ ୨୦୧୪ ରାଜ୍ୟଗୋଷ୍ଠୀ କ୍ରୀଡ଼ା ବ୍ରୋଞ୍ଜ୍ ପଦକ ବିଜେତା ଆର.ଏମ୍.ଭି. ଗୁରୁସାଇଦତ୍ତଙ୍କ ସହ ଗୋପୀଚାନ୍ଦ ଏକାଡେମୀ ନିକଟସ୍ଥ ବିଭିନ୍ନ ସେଣ୍ଟରରେ ଅଭ୍ୟାସ କରିବାକୁ ନିଷ୍ପତ୍ତି ନେଇଛନ୍ତି। ସାଇନା ଏବେ ଫିଟ୍ନେସ ଉପରେ ଅଧିକ ଧ୍ୟାନ ଦେଉଛନ୍ତି। କାଶ୍ୟପ୍ ଏବେ ବିଶ୍ୱ ର଼୍ୟାଙ୍କିଙ୍ଗ୍ର ୨୪ତମ ସ୍ଥାନରେ ଅଛନ୍ତି। ଅଲିମ୍ପିକ୍ସ ସମ୍ଭାବ୍ୟ ୮ ଜଣ ଖେଳାଳିଙ୍କ ମଧ୍ୟରୁ ଚିରାଗ, ସାତ୍ତ୍ୱିକ ଓ ଅଶ୍ୱିନୀ ପୋନାପ୍ପା ଏବେ ହାଇଦ୍ରାବାଦରେ ନାହାନ୍ତି। ବର୍ତ୍ତମାନ କେବଳ ୪-୫ ଜଣ ଖେଳାଳି ଟ୍ରେନିଂ ନେଉଛନ୍ତି।
