ନୟାଗଡ଼ ଅଫିସ,୧୧।୮: ବିଶ୍ୱର ମଙ୍ଗଳ କାମନା ସହ ଭାରତରେ ଶାନ୍ତି ପ୍ରତିଷ୍ଠା ପାଇଁ ରାମସିଂ ଭଗତ ନାମକ ଜଣେ ସନ୍ଥ ରାଜସ୍ଥାନରୁ ଶ୍ରୀକ୍ଷେତ୍ର ଧାମ ପୁରୀକୁ ଦଣ୍ଡବତ ଯାତ୍ରାରେ ବାହାରିଛନ୍ତି। ୧୫ରୁ ୨୦ ଦିନ ଭିତରେ ପୁରୀରେ ପହଞ୍ଚି ଜଗନ୍ନାଥଙ୍କୁ ଦର୍ଶନ କରି ଫେରିବେ ବୋଲି ଅଭିଳାଷ ରଖିଛନ୍ତି। ବର୍ତ୍ତମାନ ସମୟରେ କରୋନା କାୟା ବିସ୍ତାର କରିଚାଲିଥିବାରୁ ଏଥିରୁ ମୁକ୍ତି ପାଇଁ ସେ ଠାକୁରଙ୍କୁ ନିବେଦନ କରିଛନ୍ତି। ଦଣ୍ଡବତ ଯାତ୍ରାରେ ସନ୍ଥ ରାସ୍ତାରେ ଏକ ଟେକା ପକାଉଛନ୍ତି। ତା’ପରେ ଟେକାକୁ ଗୋଟାଇ ରାସ୍ତାରେ ଜରି ଶେଯ ପକାଇ ତା’ଉପରେ ଶୋଇପଡୁଛନ୍ତି। ପୁଣି ଉଠି ପୂର୍ବବତ୍ କରୁଛନ୍ତି। ସନ୍ଥଙ୍କ ଘର ରାଜସ୍ଥାନର କରୋଲି ଜିଲା ତେହେରା କରକାପୁରରେ। ସେ ୨୦୧୯ ନଭେମ୍ବର ୩ରୁ ଦଣ୍ଡବତ ଯାତ୍ରା ଆରମ୍ଭ କରିଛନ୍ତି। ତାଙ୍କ ସହ ଯାତ୍ରାରେ ଜୟସିଂ, ବତୁ ରାମ, ହରିମନ ଜୟସିଂ ସାମିଲ ହୋଇଛନ୍ତି। ସନ୍ଥ ରାମସିଂ ଭଗତଙ୍କ ସୂଚନା ଅନୁସାରେ ସେ ୨୦୧୬ରେ ଉତ୍ତରାଖଣ୍ଡର ବଦ୍ରିନାଥକୁ ବିଶ୍ୱର ମଙ୍ଗଳ ପାଇଁ ଦଣ୍ଡବତ ଯାତ୍ରା କରିଥିଲେ। ୬ମାସର ଯାତ୍ରା ପରେ ତାଙ୍କୁ ସଫଳତା ମିଳିଥିଲା ଓ ସେ ବଦ୍ରିନାଥଙ୍କୁ ଦର୍ଶନ କରିଥିଲେ। ଏହି ଯାତ୍ରା ତାଙ୍କୁ ଶ୍ରୀକ୍ଷେତ୍ର ଯାତ୍ରା ପାଇଁ ପ୍ରେରଣା ଦେଇଥିଲା। ସେ ବର୍ତ୍ତମାନ ପ୍ରାୟ ଅଢ଼େଇ ହଜାର କି.ମି. ଯାତ୍ରା କରିସାରିଲେଣି। କରୋନା ସମୟରେ ଶ୍ରୀକ୍ଷେତ୍ର ଧାମ ବନ୍ଦ ରହିଥିଲେ ବି ଠାକୁରଙ୍କୁ ସେ ଦର୍ଶନ କରିବେ ବୋଲି ଆଶା ରଖିଥିବା କହିଛନ୍ତି।