ଚମ୍ପୁଆ/ବଡ଼ବିଲ,୨୧।୧୧-(ଡି.ଏନ.ଏ/ସ୍ବ.ପ୍ର.):ଇଂରାଜୀ ପ୍ରବନ୍ଧରେ ଜାତୀୟ ସ୍ତରରେ ଦ୍ୱିତୀୟ ହୋଇ କେନ୍ଦୁଝର ଜିଲା ବଡ଼ବିଲ ଅଞ୍ଚଳର ସାଇସୁମନ ହୋତା ଗୌରବ ଆଣିଛନ୍ତି। ଡା.ମାନସ ରଞ୍ଜନ ହୋତା ଓ ଡ. ସାଇସ୍ମିତାଙ୍କ ଅଲିଅଳି ଝିଅ ସାଇସୁମନ। ବଡ଼ ହେଲେ ଆଇଏଏସ୍ ହେବାକୁ ଲକ୍ଷ୍ୟ ରଖିଥିବା ସୁମନ ଜିନ୍ଦଲ ସ୍କୁଲରେ ଏବେ ନବମ ଶ୍ରେଣୀ ଛାତ୍ରୀ। ପାଠପଢ଼ା ସହ ସଙ୍ଗୀତରେ ତାଙ୍କର ରୁଚି ଅଛି। ତାଙ୍କ ମା’ ସାଇସ୍ମିତା ବର୍ତ୍ତମାନ ଚମ୍ପୁଆ ତହସିଲଦାର ଥିବାବେଳେ ବାପା ମାନସ ବଡ଼ବିଲରେ ଡାକ୍ତର ଭାବେ କାର୍ଯ୍ୟ କରୁଛନ୍ତି। ଢେଙ୍କାନାଳ ଜିଲା କାମାକ୍ଷାନଗରରେ ସମିତିସ୍ତରୀୟ ପ୍ରବନ୍ଧ ପ୍ରତିଯୋଗିତାରେ ଦ୍ୱିତୀୟ ହେବା ପରେ ସେ ଚେଷ୍ଟା ଜାରି ରଖିଥିଲେ। ପରେ ଢେଙ୍କାନାଳଠାରେ ଜିଲା ସ୍ତରୀୟ ପ୍ରତିଯୋଗିତାରେ ପ୍ରଥମ, ରାଜ୍ୟସ୍ତରରେ ପ୍ରଥମ ଓ ଜାତୀୟସ୍ତରରେ ଦ୍ୱିତୀୟ ହୋଇଛନ୍ତି। ଅନ୍ଲାଇନ ମାଧ୍ୟମରେ ହୋଇଥିବା ଏହି ପ୍ରତିଯୋଗିତାରେ ସାଇସୁମନ ସଫଳ ହୋଇଥିବା ବେଳେ ଏହାର ଶ୍ରେୟ ମା’ ବାପାଙ୍କୁ ଦେଇଛନ୍ତି।