ଢେଙ୍କାନାଳ ଅଫିସ, ୧୯।୪: ସ୍ତ୍ରୀଙ୍କୁ ଜନ୍ମଦିନରେ ଉପହାର ସ୍ବରୂପ ମିଳିଛି ୫ ଏକର ଜାଗା। ତେବେ ପୃଥିବୀରେ ନୁହେଁ, ବରଂ ଜହ୍ନରେ କିଣାଯାଇଛି ଏହି ଜମି। ଏଭଳି ଏକ ନିଆରା ଉପହାର ଦେଇ ଉଦାହରଣ ସୃଷ୍ଟି କରିଛନ୍ତି ଢେଙ୍କାନାଳ ସହର କାରିଗରସାହି ଅଞ୍ଚଳର ମହମ୍ମଦ ସାଜନ୍ (୩୨)।
ମହମ୍ମଦ ସାଜନ୍ ପେସାରେ ଜଣେ ସଫ୍ଟଓ୍ବେର ଇଞ୍ଜିନିୟର। ସେ କୁଏତରେ କାର୍ଯ୍ୟ କରୁଥିଲେ। କରୋନା ପାଇଁ ଢେଙ୍କାନାଳ ଫେରି ଆସିଥିବାବେଳେ ଏବେ ଓ୍ବାର୍କ ଫ୍ରମ୍ ହୋମ୍ କରୁଛନ୍ତି। ଗତବର୍ଷ ସ୍ତ୍ରୀ ନାଜିଆ ଇପ୍ତେଫାରଙ୍କ ଜନ୍ମଦିନରେ ଜହ୍ନରେ ଜାଗା କିଣି ଉପହାର ଦେବେ ବୋଲି ମନସ୍ଥ କରିଥିଲେ ସାଜନ। ତେବେ କରୋନା ସଂକ୍ରମଣଜନିତ ଅଚଳାବସ୍ଥା କାରଣରୁ ଓ୍ବେବ୍ସାଇଟ୍ରେ କାଗଜପତ୍ର ପାଇବାରେ ବିଳମ୍ବ ହୋଇଥିଲା। ଗତ ଏପ୍ରିଲ ୮ରେ ତାଙ୍କୁ ଏହି କାଗଜପତ୍ର ପ୍ରାପ୍ତ ହୋଇଛି। ନାଜିଆଙ୍କ ଜନ୍ମଦିନ ଅକ୍ଟୋବର ୨୯ରେ। ସାଜନଙ୍କୁ ହସ୍ତଗତ ହୋଇଥିବା କାଗଜପତ୍ରରେ ଉକ୍ତ ତାରିଖ ଅନୁଯାୟୀ ଜମି ରେଜିଷ୍ଟ୍ରେଶନ ହୋଇଛି।
ନିଜ ପ୍ରତିକ୍ରିୟାରେ ସାଜନ କୁହନ୍ତି, ବଲିଉଡ୍ର ଦିବଂଗତ ଅଭିନେତା ସୁଶାନ୍ତ ସିଂ ରାଜପୁତ ଜହ୍ନରେ ଜାଗା କିଣିଥିବା ସମ୍ପର୍କରେ ଏକ ୟୁଟ୍ୟୁବରୁ ସୂଚନା ମିଳିଥିଲା। ଏହାପରେ ସ୍ତ୍ରୀ ନାଜିଆଙ୍କ ଜନ୍ମଦିନରେ ଅନୁରୂପ ଭାବେ ଜହ୍ନରେ ଜାଗା କିଣି ଉପହାର ଦେବାକୁ ମନ ବଳାଇଥିଲେ। ଏଥିଲାଗି ସେ ଆମେରିକାର ଲୁନାର ରେଜିଷ୍ଟ୍ରି ଓ୍ବେବସାଇଟ୍ର ସହାୟତା ନେଇଥିଲେ। ଏଥିରେ ୫୧୯ ଆମେରିକୀୟ ଡଲାର ଖର୍ଚ୍ଚ ହୋଇଛି। ଭାରତୀୟ ମୁଦ୍ରାରେ ଏହାର ମୂଲ୍ୟ ୩୭ ହଜାର ଟଙ୍କାରୁ ଅଧିକ। ଦୀର୍ଘଦିନର ଇଚ୍ଛା ପୂରଣ ହୋଇଥିବାରୁ ଆନନ୍ଦିତ ବୋଲି ସାଜନ୍ କହିଛନ୍ତି। ନାଜିଆ କୁହନ୍ତି, ସ୍ବାମୀ ଏମିତି ଏକ ଉପହାର ଦେବେ ବୋଲି ସେ ଭାବି ନ ଥିଲେ। ଏଥିରେ ସେ ବହୁତ ଖୁସି ଏବଂ ଗର୍ବିତ।