ନୂଆଦିଲ୍ଲୀ, ୭।୭- ବିଶ୍ୱ କ୍ରିକେଟ୍ରେ ପ୍ରଥମ ଅଧିନାୟକ ଭାବେ ଆଇସିସିର ସମସ୍ତ ୩ଟି ଯାକ ଟ୍ରଫି ଜିତିଥିବା ମହେନ୍ଦ୍ର ସିଂ ଧୋନୀ ମଙ୍ଗଳବାର ୩୯ ବର୍ଷରେ ପଦାର୍ପଣ କରିଛନ୍ତି। ଏହି ଅବସରରେ କ୍ରୀଡ଼ା ଜଗତ ସମେତ ଚାରିଆଡ଼ୁ ଧୋନୀଙ୍କ ନିକଟକୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି। ଧୋନୀଙ୍କ ସ୍ତ୍ରୀ ସାକ୍ଷୀ ମଧ୍ୟ ଶୁଭେଚ୍ଛା ବାର୍ତ୍ତା ଦେବାରେ ପଛରେ ପଡ଼ିନାହାନ୍ତି। ସାକ୍ଷୀ ନିଜ ଇନ୍ଷ୍ଟାଗ୍ରାମ ପୃଷ୍ଠାରେ ଧୋନୀଙ୍କ କିଛି ଫଟୋ ଶେୟାର କରିଛନ୍ତି। ଯେଉଁଥିରେ ଏହି ଉଇକେଟ୍କିପର ବ୍ୟାଟ୍ସମ୍ୟାନ ତାଙ୍କ ଫାର୍ମ ହାଉସ ପରିସରରେ ପୋଷା କୁକୁରଙ୍କ ସହ ଖେଳୁଥିବାର ଦେଖିବାକୁ ମିଳିଛି। ଏହି ଫଟୋ ତଳେ ସାକ୍ଷୀ ଲେଖିଛନ୍ତି, ‘ତୁମେ ଆଜି ଜନ୍ମଦିନ ଅବସରରେ ଆହୁରି ଗୋଟିଏ ବର୍ଷ ବଡ଼ ହୋଇଗଲ। ଚୁଟି ଆଉ ଟିକେ ଧଳା ହୋଇଯାଇଛି। ତୁମେ ଆହୁରି ସ୍ମାର୍ଟ ଓ ମଧୁର ହୁଅ। ତୁମେ ସେହି ବ୍ୟକ୍ତି ନୁହେଁ ଯିଏକି ଭଲପାଇବା ଓ ଉପହାର ଦ୍ୱାରା ପ୍ରଭାବିତ ହୋଇଯିବ। ତେବେ ଚାଲ ତୁମ ଜନ୍ମଦିନର ଆଉ ଏକ ବର୍ଷକୁ କେକ୍ କାଟି ଓ ମହମବତୀ ଜାଳି ସେଲିବ୍ରେସନ କରିବା। ହାପି ବାର୍ଥଡେ, ସ୍ବାମୀ।’ ଏଠାରେ ଉଲ୍ଲେଖଯୋଗ୍ୟ, ୪ ଜୁଲାଇ ୨୦୧୦ରେ ଧୋନୀ ତାଙ୍କ ସ୍କୁଲବେଳର ସାଙ୍ଗ ସାକ୍ଷୀ ସିଂ ରାଓ୍ବତ୍ଙ୍କୁ ବିବାହ କରିଥିଲେ। ଉଭୟ ଡିଏଭି ଜବାହର ବିଦ୍ୟାମନ୍ଦିରରେ ଏକାଠି ପଢ଼ୁଥିଲେ। ବିବାହ ସମୟରେ ସାକ୍ଷୀ ହୋଟେଲ ମ୍ୟାନେଜମେଣ୍ଟ କୋର୍ସ କରୁଥିଲେ। ୨୦୧୫ରେ ଧୋନୀ ଏକ କନ୍ୟା ସନ୍ତାନର ବାପା ହୋଇଥିଲେ। ତାଙ୍କ ଝିଅର ନାମ ଜିଭା।