ସାକ୍ଷୀଗୋପାଳ,୧୦।୨(ଡି.ଏନ୍.ଏ.): ରାଜ୍ୟ ପର୍ଯ୍ୟଟନ ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ ମଙ୍ଗଳବାର ସନ୍ଧ୍ୟାରେ ସାକ୍ଷୀଗୋପାଳ ଆସି ସାକ୍ଷୀଗୋପାଳ ମନ୍ଦିର ପରିଦର୍ଶନ କରିଛନ୍ତି। ଠାକୁରଙ୍କୁ ଦର୍ଶନ କରିବା ପରେ ସାକ୍ଷୀଗୋପାଳ ସେବାୟତ ସଂଘ ପକ୍ଷରୁ ଆୟୋଜିତ ସଭାରେ ମନ୍ତ୍ରୀ ଯୋଗଦେଇ ଶ୍ରୀମନ୍ଦିର ଭଳି ପୁରାତନ ସାକ୍ଷୀଗୋପାଳ ମନ୍ଦିର ରାଜ୍ୟ ସରକାରଙ୍କ ଐତିହ୍ୟ ପୀଠ ବିକାଶ ଯୋଜନାରେ ସାମିଲ ହେବ ବୋଲି କହିଥିଲେ। ମୁଖ୍ୟ ମନ୍ଦିରର ରକ୍ଷଣାବେକ୍ଷଣ, ବେଢ଼ାରେ କନ୍ଦା ପଥର କାମ ପୂର୍ଣ୍ଣାଙ୍ଗ ସହ ଆକର୍ଷଣୀୟ ଉନ୍ନୟନ ଆଦି କାମ କରାଯିବ। ସଂସ୍କୃତି ସମ୍ପନ୍ନ ସତ୍ୟବାଦୀର ବିକାଶ ରାଜ୍ୟ ସରକାରଙ୍କର ଦାୟିତ୍ୱ ବୋଲି ସେ କହିଥିଲେ। ସେହିପରି ପୁରୀର ମୁଖଶାଳା ସଦୃଶ ସତ୍ୟବାଦୀର ପ୍ରାରମ୍ଭ ଜାତୀୟ ରାଜପଥର ପଟ୍ଟନାୟିକିଆ ଛକରେ ସୁନ୍ଦର ତୋରଣ ଜରିଆରେ ଶ୍ରଦ୍ଧାଳୁଙ୍କୁ ସାକ୍ଷୀଗୋପାଳ ମନ୍ଦିରକୁ ସ୍ବାଗତ କରାଯିବା ସଙ୍ଗେସଙ୍ଗେ ସାକ୍ଷୀଗୋପାଳ ମନ୍ଦିରର ପ୍ରମୁଖ ପର୍ବ ଅଁଳାନବମୀ ପାଇଁ ରାଜ୍ୟ ଆଇନ ବିଭାଗ ପ୍ରତିବର୍ଷ ୨ ଲକ୍ଷ ଟଙ୍କା ଅନୁଦାନ ଯୋଗାଇ ଦିଆଯିବ ବୋଲି ବିଧାୟକ ତଥା ମନ୍ଦିିର ଟ୍ରଷ୍ଟବୋର୍ଡର ସଭାପତି ଉମାକାନ୍ତ ସାମନ୍ତରାୟ ସଭାରେ ସୂଚନା ଦେଇଥିଲେ। ସାକ୍ଷୀଗୋପାଳ ରେଳ ଓଭରବ୍ରିଜ ନିର୍ମାଣ କରାଯିବା ସହ ବିସ୍ଥାପିତ ବ୍ୟବସାୟୀଙ୍କୁ ଏକ ମାର୍କେଟ କମ୍ପ୍ଲେକ୍ସରେ ଥଇଥାନ କରାଯିବା ବୋଲି ବିଧାୟକ ସମାନ୍ତରାୟ ପ୍ରତିଶ୍ରୁତି ଦେଇଥିଲେ। ସମ୍ମାନିତ ଅତିଥି ଭାବେ ପଞ୍ଚାୟତ ସମିତି ଅଧ୍ୟକ୍ଷା ସସ୍ମିତା ପ୍ରଧାନ, ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ବସନ୍ତ କୁମାର ପ୍ରଧାନ ଯୋଗଦେଇଥିଲେ। ଏହି ଅବସରରେ ମନ୍ଦିର ସେବାୟତମାନଙ୍କୁ ଅତିଥିମାନେ କୋଭିଡ୍ ସହାୟତା ବାବଦରେ ବ୍ୟାଙ୍କ ଚେକ ପ୍ରଦାନ କରିଥିଲେ। ସଂଘର ସଭାପତି ରାମଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ସମ୍ପାଦକ କିଶୋର ଚନ୍ଦ୍ର ମହାପାତ୍ର ମନ୍ଦିର, ବକୁଳବନ, ସମାଧିପୀଠ, ପାଠାଗାରର ବିକାଶ ସହ ମନ୍ଦିର ନିକଟରେ ଗୋଶାଳା ସ୍ଥାପନ ଆଦି ୧୦ ଦଫା ସମ୍ବଳିତ ସ୍ମାରକପତ୍ର ଅତିଥିଙ୍କୁ ପ୍ରଦାନ କରିଥିଲେ। ସେବାୟତ ସଂଘ ସଦସ୍ୟ ଜ୍ୟୋତି ଶଙ୍କର ଖୁଣ୍ଟିଆ କାର୍ଯ୍ୟକ୍ରମ ପରିଚାଳନା କରିଥିଲେ। ସଂଘ ପରିଚାଳନା ପରିଷଦ ସଦସ୍ୟ ରାମଚନ୍ଦ୍ର ନନ୍ଦ, ଉପସଭାପତି ଅଶୋକ ଖୁଣ୍ଟିଆ, ସହ ସମ୍ପାଦକ ସଞ୍ଜୟ ନନ୍ଦ ଓ କୋଷାଧ୍ୟକ୍ଷ ଭର୍ଗୋଦେବ କୋଠାରି ପ୍ରମୁଖ ସହଯୋଗ କରିଥିଲେ।