କେନ୍ଦୁଝର,୫ା୭: କେନ୍ଦୁଝର ଜିଲା ଶିକ୍ଷା ବିଭାଗରେ ଜାଲ ଚିଠିରେ ଶିକ୍ଷକଙ୍କ ବେତନ ବୃଦ୍ଧି କରାଯିବା ଚର୍ଚ୍ଚାର ବିଷୟ ହୋଇଛି। ଏହି ଘଟଣାକୁ ଚପାଇ ଦେବାକୁ ଉଦ୍ୟମ ହେଉଥିବା ବେଳେ ଏହାର ତଦନ୍ତ କରି ଦୋଷୀ କର୍ମଚାରୀଙ୍କ ବିରୋଧରେ କାର୍ଯ୍ୟନୁଷ୍ଠାନ ଗ୍ରହଣ କରିବା ପାଇଁ ଜିଲା ପରିଷଦ ଅଧ୍ୟକ୍ଷା କମଳିନୀ ପାତ୍ର ଜିଲାପାଳ ଓ ବିଭାଗର ଉଚ୍ଚ ଅଧିକାରୀଙ୍କୁ ଚିଠି ଲେଖିଛନ୍ତି। ଦୀର୍ଘ ୭ ମାସ ହେଲା ଉକ୍ତ ଜାଲ ଚିଠିର ଯାଞ୍ଚ କରାଯାଇ ନ ଥିବା ବେଳେ ଏବେ ତରବରିଆ ଭାବେ ଦୋଷ ଲୁଚାଇବାକୁ ବିଭାଗୀୟ ତଦନ୍ତ ପାଇଁ ପ୍ରସ୍ତୁତି ଚାଲିଥିବା ଅଭିଯୋଗ ହେଉଛି।
ପ୍ରକାଶ ଯେ, ସାହାରପଡ଼ା ବ୍ଲକ ଅନ୍ତର୍ଗତ ଗଣ୍ଡବେଡ଼ା ପଞ୍ଚାନନ ଉଚ୍ଚ ବିଦ୍ୟାଳୟର ଶିକ୍ଷକ ଓ କର୍ମଚାରୀମାନେ ୨୦୧୫ ଅକ୍ଟୋବର ୧ତାରିଖଠାରୁ ୪୦ପ୍ରତିଶତ ଦରମା ପାଉଥିଲେ। ସରକାରଙ୍କ ନିୟମ ଅନୁସାରେ ଯେଉଁ ବ୍ଲକଗ୍ରାଣ୍ଟ ବିଦ୍ୟାଳୟ କ୍ରମାଗତ ଭାବେ ୫୦ ପ୍ରତିଶତରୁ ଅଧିକ ଫଳାଫଳ ପ୍ରଦର୍ଶନ କରିବ ସେହି ସ୍କୁଲ ଶିକ୍ଷକଙ୍କ ବେତନ ବୃଦ୍ଧି କରାଯିବା ବ୍ୟବସ୍ଥା ରହିଛି। ମାତ୍ର ଉକ୍ତ ଉଚ୍ଚ ବିଦ୍ୟାଳୟର ପ୍ରଦର୍ଶନ ଗତ ୩ବର୍ଷରେ ମାଟ୍ରିକ ଫଳାଫଳ ୫୦ ପ୍ରତିଶତରୁ ଅଧିକ ହୋଇ ନ ଥିଲେ ମଧ୍ୟ ତତ୍କାଳୀନ ଜିଲା ଶିକ୍ଷା ଅଧିକାରୀଙ୍କ ସ୍ବାକ୍ଷରରେ ପତ୍ର ସଂଖ୍ୟା ୧୨୦୮୧/ ୧୩/୧୧/୨୦୨୦ରେ ଏକ ଜାଲ ଚିଠି ପ୍ରସ୍ତୁତ କରାଯାଇ ଏହି ଶିକ୍ଷକ ଓ ଶିକ୍ଷା କର୍ମଚାରୀମାନେ ଶତକଡା ୬୦ପ୍ରତିଶତ ଦରମା ଦେବା ଲାଗି ଆଦେଶ କରାଯାଇଥିଲା। ଏହି ଆଦେଶ ଫଳରେ ବିଦ୍ୟାଳୟର କର୍ମଚାରୀ ଗୋଟିଏ ମାସର ବର୍ଦ୍ଧିତ ଦରମା ପାଇଥିଲେ। ପରେ ଏହା ଜାଲ ଚିଠି ବୋଲି ଜାଣିବା ପରେ ବର୍ତ୍ତମାନର ଡିଇଓ ସଂଗ୍ରାମ ସାହୁ ତାଙ୍କ ପତ୍ର ସଂଖ୍ୟା ୧୬୭୭୭/ ୨୮/୧୨/୨୦୨୦ରେ ଏକ ପତ୍ର ଲେଖି ନଭେମ୍ବର ୧୩ ତାରିଖ ପ୍ରଦାନ କରାଯାଇଥିବା ଚିଠିଟି ଜାଲ୍ ନଭେମ୍ବର ମାସରେ ଶିକ୍ଷକ ଓ ଶିକ୍ଷା କର୍ମଚାରୀଙ୍କୁ ପ୍ରଦାନ କରାଯାଇଥିବା ବର୍ଦ୍ଧିତ ବେତନ ଟ୍ରେଜେରୀ ଚାଲାଣ ମାଧ୍ୟମରେ ଜମା ଦେବାକୁ ଲେଖିଥିଲେ। ଏହାପରେ ଉକ୍ତ ବିଦ୍ୟାଳୟର କର୍ମଚାରୀ ବର୍ଦ୍ଧିତ ଦରମା ଫେରାଇ ନ ଥିବା ବେଳେ ଏହି କାମ ପାଇଁ ଜିଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟର ଜଣେ କନିଷ୍ଠ କିରାଣୀ ୫୦ହଜାର ଟଙ୍କା ଲାଞ୍ଚ ନେଇଥିବା କଥା ସେମାନେ ଅଭିଯୋଗ କରିଥିଲେ। ମାତ୍ର ଉକ୍ତ ଜାଲ୍ ଦସ୍ତଖତ ଥିବା ଚିଠିର ତଦନ୍ତ କରି ସମ୍ପୃକ୍ତ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ତଦନ୍ତ କରିବା କିମ୍ବା ଥାନାରେ ଏତଲା ନ ଦେବା ଖୋଦ ବିଭାଗରେ ଆଲୋଚ୍ୟ ବିଷୟ ହୋଇଛି। ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଡିଇଓ ସଂଗ୍ରାମ ସାହୁ କହିଛନ୍ତି ।