ଭଦ୍ରକ ଅଫିସ, ୧୯।୧: ସରକାରୀ କର୍ମଚାରୀମାନେ ଚଳିତମାସ ୩୧ ତାରିଖ ମଧ୍ୟରେ ନିଜ ଆଇଡିରେ ଏଚ୍ଆର୍ଏମ୍ଏସ୍ (ହ୍ୟୁମାନ ରିସୋର୍ସେସ୍ ମ୍ୟାନେଜମେଣ୍ଟ ସିଷ୍ଟମ) ପୋର୍ଟାଲରେ ବାର୍ଷିକ ସମ୍ପତ୍ତି ତାଲିକା ଦାଖଲ ପାଇଁ ଓଡ଼ିଶା ସରକାର ସମସ୍ତ ବିଭାଗୀୟ ମୁଖ୍ୟମାନଙ୍କୁ ନିର୍ଦ୍ଦେଶ ଦେଇଛନ୍ତି। କିନ୍ତୁ ଏହି ନିର୍ଦ୍ଦେଶାନାମାର ଊର୍ଦ୍ଧ୍ୱକୁ ଯାଇ ଭଦ୍ରକ ଜିଲା ବନ୍ତ ବ୍ଲକ ଅଧୀନ ସମସ୍ତ ପ୍ରାଥମିକ ବିଦ୍ୟାଳୟର ଶିକ୍ଷକମାନେ ଉକ୍ତ ପୋର୍ଟାଲରେ ତାଲିକା ଦେବା ସହ ତାହାର ହାର୍ଡ କପି ଆସନ୍ତା ୨୦ ତାରିଖ ସୁଦ୍ଧା ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟରେ ଦାଖଲ କରିବାକୁ ବିଇଓଙ୍କ ଅଫିସ୍ ପକ୍ଷରୁ ସିଆର୍ସିସିଙ୍କ ମାଧ୍ୟମରେ ନିର୍ଦ୍ଦେଶ ଦିଆଯାଇଛି। ଏଥିରେ ଅମାନ୍ୟ କଲେ ଜାନୁୟାରୀ ମାସର ଦରମା ବନ୍ଦ କରାଯିବ ବୋଲି ନିର୍ଦ୍ଦେଶ ରହିଛି। ଏ ସମ୍ପର୍କରେ ବ୍ଲକ ଶିକ୍ଷାଧିକାରୀ ମଞ୍ଜୁବାଳା ନାୟକ କହିଛନ୍ତି, ପ୍ରକୃତରେ କେଉଁମାନେ ପୋର୍ଟାଲରେ ତାଲିକା ଦେଲେ ବୋଲି ଜାଣିବା ପାଇଁ ହାର୍ଡ କପି ମଗାଯାଇଛି। ୨୦ ତାରିଖ ସୁଦ୍ଧା ନ ଦେଲେ ଦରମା ବନ୍ଦ ହେବ, ସେ ବାବଦରେ ମୁଁ ଜାଣିନାହିଁ। ଅପରପକ୍ଷେ ପ୍ରାଥମିକ ଶିକ୍ଷକମାନଙ୍କ ମୋବାଇଲକୁ ଏହା ମେସେଜ୍ କରାଯାଇଥିବା ଜଣାପଡ଼ିଛି।