ଭୁବନେଶ୍ୱର, ୧୪।୯ (ବ୍ୟୁରୋ): ପାର୍ବଣ ଋତୁ ଆସିଯାଇଥିବାରୁ ବିଏମ୍ସି ଖାଦ୍ୟ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିବା ଆରମ୍ଭ କରିଛି। ଭେଜାଲ ଓ ବାସି ଖାଦ୍ୟ ଖାଇ ଯେପରି କେହି ଅସୁସ୍ଥ ନ ହୁଅନ୍ତି ସେଥିପ୍ରତି ଗୁରୁତ୍ୱ ଦିଆଯାଉଛି। ଏଥିପାଇଁ ବିଏମ୍ସିର ଫୁଡ୍ ସେଫ୍ଟି ସ୍କାଡ୍ ସହରର ବଡ଼ଠାରୁ ଛୋଟ ବିଭିନ୍ନ ଦୋକାନରେ ଚଢ଼ାଉ କରି ଖାଦ୍ୟର ମାନ ଯାଞ୍ଚ କରୁଛି। ଏହି କ୍ରମରେ ମଙ୍ଗଳବାର ୟୁନିଟ-୪ ସ୍ଥିତ ଭାଇନା ହୋଟେଲରେ ଚଢ଼ାଉ କରାଯାଇଥିଲା। ସେହି ହୋଟେଲରୁ ବାସି ଖାଦ୍ୟ ମିଳିଥିଲା। ସ୍କାଡ୍ ଦ୍ୱାରା ପ୍ରାୟ ୨୦ କେଜି ବାସି ଖାଦ୍ୟ ସମେତ ଏକାଧିକ ସିନ୍ଥେଟିକ୍ ଫୁଡ୍ କଲର୍ ନଷ୍ଟ କରାଯାଇଥିଲା। ସେଠାରେ ପ୍ରସ୍ତୁତ ଖାଦ୍ୟର ନମୁନା ସଂଗ୍ରହ କରାଯାଇ ଯାଞ୍ଚ ପାଇଁ ଲ୍ୟାବ୍କୁ ପଠାଯାଇଛି। ରିପୋର୍ଟ ଆସିବା ପରେ ବିହିତ ପଦକ୍ଷେପ ଗ୍ରହଣ କରାଯିବ ବୋଲି ବିଏମ୍ସି ପକ୍ଷରୁ କୁହାଯାଇଛି।
ସୂଚନାଯୋଗ୍ୟ, ସୋମବାର ବିଏମ୍ସିର ଫୁଡ୍ ସେଫ୍ଟି ସ୍କ୍ବାଡ୍ ଶହୀଦ ନଗର ଓ ୟୁନିଟ-୪ ଅଞ୍ଚଳର ବିଭିନ୍ନ ଚାଟ୍, ଗୁପ୍ଚୁପ୍, ଫାଷ୍ଟଫୁଡ୍ ଷ୍ଟଲ ଏବଂ ଉତ୍କଳ ଗ୍ୟାଲେରିଆ ମଲ୍ର ଫୁଡ୍କୋର୍ଟ ବୁଲି ଖାଦ୍ୟର ମାନ ଯାଞ୍ଚ କରିଥିଲା। ପାର୍ବଣ ଋତୁ ଆରମ୍ଭ ହୋଇଯାଇଥିବାବେଳେ ଏହାକୁ ଦୃଷ୍ଟିରେ ରଖି ରାଜଧାନୀର ଗଳିକନ୍ଦିରେ ଖାଦ୍ୟର ପସରା ଖୋଲିଛି। ବଡ଼ ବଡ଼ ଦୋକାନ ଠାରୁ ଆରମ୍ଭ କରି ଛୋଟ ଷ୍ଟଲରେ ଭଳିକି ଭଳି ଖାଦ୍ୟ ବିକ୍ରି କରାଯାଉଛି। ଏହାର ସୁଯୋଗ ନେଇ ଲାଭଖୋର୍ ଅସାଧୁ ବେପାରୀ ବାସି ଓ ଭେଜାଲ ଖାଦ୍ୟ ବିକ୍ରି କରୁଛନ୍ତି। ଏହାକୁ ଗୁରୁତ୍ୱ ସହ ନେଇ ବିଏମ୍ସି ପକ୍ଷରୁ ଖାଦ୍ୟର ମାନ ଯାଞ୍ଚ ପ୍ରକ୍ରିୟାକୁ ତ୍ୱରାନ୍ବିତ କରାଯାଉଛି।