ନୂଆଦିଲ୍ଲୀ,୪।୧୧ (ଅଭୟ ଦାଶ): ପ୍ରତି ବର୍ଷ ଭଳି ଚଳିତ ବର୍ଷର ପାର୍ବଣ ବିକ୍ରି (ଫେଷ୍ଟିଭ ସେଲ୍ସ) ପରେ ପରେ ଦେଶର ପ୍ରମୁଖ ଅଟୋମୋବାଇଲ କମ୍ପାନି ମାରୁତି ସୁଜୁକି ଇଣ୍ଡିଆ ଲିମିଟେଡ (ଏମ୍ଏସ୍ଆଇଏଲ୍)ପକ୍ଷରୁ େଓଡିଂ ସେଲ୍ସ ସମ୍ପର୍କରେ ଘୋଷଣା କରାଯାଇଛି। ଏପରିକି ଆଉ କିଛି ଦିନ ପରେ ସାରା ଦେଶରେ ବିବାହ ଋତୁ ଆରମ୍ଭ ହେବ। ଏହି ସମୟ ମଧ୍ୟରେ ବ୍ରାଣ୍ଡ୍ (କମ୍ପାନି) ବଡ଼ କାରବାର ପାଇଁ ବ୍ୟାପକ ପ୍ରସ୍ତୁତି କରୁଥିବାବେଳେ ପାର୍ବଣ କାରବାର ପରି ବିବାହ କାରବାରରେ ମଧ୍ୟ ବିକ୍ରି ଅଭିବୃଦ୍ଧି ହାସଲ କରିବାକୁ ଏମ୍ଏସ୍ଆଇଏଲ୍ ପକ୍ଷରୁ ଆକଳନ କରାଯାଇଛି।
ସେହିଭଳି ୨୦୨୪ ଅକ୍ଟୋବରରେ ଏମ୍ଏସ୍ଆଇଏଲର ଖୁଚୁରା ବିକ୍ରି ୨,୦୨,୪୦୨ ୟୁନିଟ ଥିଲାବେଳେ ପୂର୍ବ ବର୍ଷ ଅପେକ୍ଷା ଚଳିତ ବର୍ଷର ସମାନ ଅବଧି ମଧ୍ୟରେ ପ୍ରାୟ ୨୩% ବିକ୍ରି ବୃଦ୍ଧି ଘଟିଛି। ଏପରିକି ୨୦୨୦ରେ ମଧ୍ୟ ଏମ୍ଏସ୍ଆଇଏଲର ଖୁଚୁରା ବିକ୍ରି ୧,୯୧,୪୭୬ ୟୁନିଟ ଥିଲା।
ସେହିପରି ପାର୍ବଣ ବିକ୍ରିର ଉତ୍ସାହ ଅନୁଯାୟୀ ବ୍ରାଣ୍ଡ୍ ପକ୍ଷରୁ ବିବାହ ଋତୁରେ ମଧ୍ୟ ଭଲ କାରବାର ସହ ନଭେମ୍ବରରେ ପ୍ରାୟ ୫% ବିକ୍ରି ଅଭିବୃଦ୍ଧିର ଆକଳନ କରାଯାଇଛି। ଏପରିକି ଆକର୍ଷଣୀୟ ଅଫର ଓ ରିହାତି ସାଙ୍ଗକୁ ନୂତନ ମଡେଲ ଆଶାୟୀ ଗ୍ରାହକଙ୍କୁ ବେଶ୍ ସହାୟ ହେବ ବୋଲି କମ୍ପାନି ପକ୍ଷରୁ ମତବ୍ୟକ୍ତ କରାଯାଇଛି।
ଏ ସମ୍ପର୍କରେ ଏମ୍ଏସ୍ଆଇଏଲର ଏସ୍ଇଓ (ଏମ୍ ଆଣ୍ଡ ଏସ୍) ପାର୍ଥୋ ବାନାର୍ଜୀ କହିଥିଲେ, ଆମେ ଚଳିତ ବର୍ଷର ଅକ୍ଟୋବର ବିକ୍ରି ବୃଦ୍ଧି ଭଳି ନଭେମ୍ବର ମାସର ସ୍ବତନ୍ତ୍ର ବିକ୍ରି ଅଭିବୃଦ୍ଧି ପାଇଁ ଆଶାବ୍ୟକ୍ତ କରିଛୁ। ଏପରିକି ଚଳିତ ବିବାହ ଋତୁରେ ଆମେ ପ୍ରାୟ ୪ରୁ ୫%ର ବିକ୍ରି ଅଭିବୃଦ୍ଧି ହାସଲ କରିବାକୁ ଲକ୍ଷ୍ୟ ରଖିଛୁ। ସେହିଭଳି ବିବାହ ସମୟରେ ଉପହାର ଉପଯୋଗୀ କାର୍ ସମ୍ଭାରର ଲମ୍ବା ଲାଇନ ଆମ ପାଖରେ ରହିଥିଲାବେଳେ ବ୍ରାଣ୍ଡ୍ ବିଭିନ୍ନ ମଡେଲ ଉପରେ ଆକର୍ଷଣୀୟ ସୁବିଧା ମଧ୍ୟ ଉପଲବ୍ଧ କରାଇଛି।