ନୟାଗଡ଼ ଅଫିସ, ୪।୬: ନୟାଗଡ଼ ଜିଲା ସଦର ମହକୁମା ନିକଟସ୍ଥ ଘଡୁଆଳର ଏକ ଜଳଖିଆ ଦୋକାନରେ ଇଡ୍ଲି ଓ ଘୁଗୁନିରୁ ପୋକ ବାହାରି ଥିଲା। ନୟାଗଡ଼ର ଏକ ପରିବାର ଖାଉଥିବାବେଳେ ପୋକ ବାହାରିବାରୁ ଅଭିଯୋଗ କରିଥିଲେ । ତେବେ ସୁଫଳ ମିଳି ନ ଥିଲା । ବରଂ ଦୋକାନୀ ଗ୍ରାହାକଙ୍କ ଅଭିଯୋଗକୁ ଅଣଦେଖା କରି ତାଙ୍କ ପ୍ରାପ୍ୟ ନେଲେ । ଖାଉଟି ତାଙ୍କ ଜଳଖିଆ ବାବଦ ଟଙ୍କା ଫୋନ ପେ’ରେ ପଇଠ କରି ଚାଲିଆସିଲେ । ଘଟଣା ସମ୍ପର୍କରେ ଫୋନ ଯୋଗେ ନୟାଗଡ଼ ଫୁଡ୍ ସେପ୍ଟି ଅଫିସରଙ୍କୁ ଯୋଗାଯୋଗ କରାଯାଇଥିଲା । ହେଲେ ଫୁଡ୍ ସେଫ୍ଟି ଅଫିସରଙ୍କ ଫୋନ ସୁଇଚ୍ ଅଫ୍ ଥିଲା। ଏନେଇ ସମ୍ପୃକ୍ତ ଗ୍ରାହାକ ଶୂନ୍ୟବିଜୟୀ ମିଶ୍ର କୁହନ୍ତି, ଘଡୁଆଳର ସାଉଥ୍ ଓଡ଼ିଶା ଟିଫିନ ସେଣ୍ଟରରେ ଶନିବାର ଇଡ୍ଲି ଘୁଗୁନି ଖାଉଥିଲେ। ଖାଦ୍ୟ ଖାଇବା ବେଳେ ଘୁଗୁନିରୁ ବାଇଗଣ ପୋକ ବାହାରିଥିଲା । ଦୋକାନୀଙ୍କୁ ପଚାରିବାରୁ ସେ କହିଥିଲେ ମୁଁ କ’ଣ କରିବି ପୋକଟି କାଢ଼ି ଖାଇ ଦିଅନ୍ତୁ । ନୟାଗଡ଼ ଜିଲା ସଦର ମହକୁମାରେ ଏପରି ଅନେକ ଦୋକାନ ଅଛି ଯେଉଁଠାରେ ପ୍ରତ୍ୟହ ଅପରିଷ୍କାର ପରିବେଶରେ ଖାଦ୍ୟ ପ୍ରସ୍ତୁତ ହେଉଛି । ହେଲେ ଫୁଡ୍ ସେଫ୍ଟି ଅଫିସର ଏହାର ତଦନ୍ତ କରୁ ନ ଥିବାରୁ ସୁଫଳ ମିଳୁନି ବୋଲି ଅଭିଯୋଗ ହୋଇଛି ା
ଜିଲା ସଦର ମହକୁମାରେ ଥିବା ହୋଟେଲ, ଜଳଖିଆ ଦୋକାନରେ ଅପରିଷ୍କାର ଓ ବାସୀ ଖାଦ୍ୟ ବିକ୍ରି ହେଉଛି ବୋଲି ଅଭିଯୋଗ ହେଉଛି। ଫୁଡ୍ ସେଫ୍ଟି ଅଫିସର ଠିକ୍ ଭାବରେ ଚଢ଼ାଉ କରୁ ନ ଥିବା ଓ ସାମ୍ପୁଲ ସଂଗ୍ରହ ଠିକ୍ରେ କରାଯାଉ ନ ଥିବାରୁ ଗ୍ରାହକ ଭଲ ଖାଦ୍ୟ ନଁାରେ ରୋଗ କିଣୁଛନ୍ତି । ଜିଲା ସଦର ମହକୁମାରେ ଖାଦ୍ୟ ଦୋକାନୀଙ୍କ ମନମାନି ବଢ଼ି ଚାଲିଛି । ଏନେଇ ଫୁଡ୍ ସେଫ୍ଟି ଅଫିସର ନବ ସାହୁଙ୍କୁ ମୋବାଇଲ ନଂ.୮୨୪୯୦ ୬୭୮୩୫ ନମ୍ବରକୁ ଯୋଗାଯୋଗ କରାଯାଇଥିଲା । ହେଲେ ତାଙ୍କର ଫୋନ ସୁଇଚ୍ଅପ୍ ଥିଲା । ଜିଲା ମୁଖ୍ୟ ଚିକିସତ୍ାଧିକାରୀ ମକରନ୍ଦ ବେଉରା କୁହନ୍ତି, ଫୁଡ୍ ସେଫ୍ଟିି ଅଫିସରଙ୍କ ଫୋନ ସୁଇଚ୍ ଅଫ୍ କାହିଁକି ଅଛି ଜଣାପଡିନାହିଁ । ତେବେ ସାମ୍ପୁଲ ସଂଗ୍ରହ ହେଉଛି । କିନ୍ତୁ ଷ୍ଟାଫ୍ କମ ଥିବାରୁ ଯାଞ୍ଚରେ ସମସ୍ୟା ସୃଷ୍ଟି ହେଉଛି । ତଥାପି ବ୍ଲକ ଓ ଜିଲା କାର୍ଯ୍ୟାଳୟ ସମେତ ସହରାଞ୍ଚଳକୁ ଗୁରୁତ୍ୱ ଦିଆଯାଉଛି । ଇଡ୍ଲି ଓ ଘୁଗୁନିରୁ ପୋକ ବାହାରିବା ଉପରେ ତଦନ୍ତ କରାଯିବ । ଘଟଣା ସମ୍ପର୍କରେ ଫୁଡ୍ ସେଫ୍ଟି ଅଫିସରଙ୍କ ସହ ଆଲୋଚନା କରାଯାଇ ପଦକ୍ଷେପ ନିଆଯିବ। ତେବେ ଅଭିଯୋଗକାରୀ ଅଭିଯୋଗ କରିବା ଦରକାର ବୋଲି କହିଛନ୍ତି। ରଣପୁରର ସୁଦାମ ନାୟକ, ନୟାଗଡ଼ର ମିନତୀ ବାରିକ, ଦଶପଲ୍ଲାର ଟିକି ପଲେଇ କୁହନ୍ତି ବଜାରରେ ଅପମିଶ୍ରଣ ଓ ନିମ୍ନମାନର ଖାଦ୍ୟ ପଦାର୍ଥ ବିକ୍ରି ହେଉଛି। କେଉଁଟା ଭଲ ଓ ମନ୍ଦ ଆଖିକୁ ଜଣାପଡୁନି। ଗ୍ରାହକ ତଟକା ଖାଦ୍ୟ ନଁାରେ ବାସୀ ଓ ଦୂଷିତ ଖାଦ୍ୟ ଖାଉଛନ୍ତି। ଅଭିଯୋଗ କଲେ ସୁଫଳ ମିଳୁନି । ଫୁଡ ସେପ୍ଟି ଅଫିସର ଏହାକୁ ଗୁରୁତର ସହ ନେଇ ଯାଞ୍ଚ କରିବା ଦରକାର। କର୍ମଚାରୀ ଅଭାବ ଦର୍ଶାଇ ସ୍ବାସ୍ଥ୍ୟ ବିଭାଗ ଯେଉଁ ଭଳି ଢ଼ଙ୍ଗରେ ଯାଞ୍ଚ ଓ ଧରପଗଡକୁ ଅଣଦେଖା କରୁଛି କେତେବେଳେ କ’ଣ ହେବ କହି ହେବ ନାହିଁ।