ଅନ୍ତର୍ଜାତୀୟ କ୍ରିକେଟରୁ ସନ୍ନ୍ୟାସ ନେବା ପରେ ଟିମ୍ ଇଣ୍ଡିଆର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ ବର୍ତ୍ତମାନ କୃଷକ ପାଲଟିଛନ୍ତି। ସେ ତାଙ୍କ ଫାର୍ମହାଉସରୁ ବିଭିନ୍ନ ପ୍ରକାର ଫସଲ ଆମଦାନୀ କରୁଛନ୍ତି। ତାଙ୍କ କ୍ଷେତର ପନିପରିବା ରାଞ୍ଚିରେ ବହୁତ ଚାହିଦା ରହିଛି। ଆପଣ ଜାଣି ଆଶ୍ଚର୍ଯ୍ୟ ହେବେ ଧୋନୀଙ୍କ ଫାର୍ମହାଉସରୁ ଏବେ ୧୦ ଟନ୍ ଷ୍ଟ୍ରବେରୀ ଉତ୍ପାଦନ ହୋଇଛି। ଏତେ ପରିମାଣର ଷ୍ଟ୍ରବେରୀର ଆନୁମାନିକ ମୂଲ୍ୟ ୩୦ ଲକ୍ଷ ହେବ। ଧୋନୀଙ୍କ ଫାର୍ମହାଉସରେ କେବଳ ଯେ ଷ୍ଟ୍ରବେରୀ ତା’ ନୁହେଁ, ଖରଭୁଜ ମଧ୍ୟ ଉତ୍ପାଦନ ହେଉଛି। ପ୍ରତିଦିନ କ୍ଷେତରୁ ୩ କ୍ୱିଣ୍ଟାଲ ତରଭୁଜ ଏବଂ ୨ କ୍ୱିଣ୍ଟାଲ ଖରଭୁଜ ତୋଳା ହେଉଛି।
୪୩ ଏକର ପରିମିତ ଜମିରେ ଧୋନୀ ନିଜ ହାତରେ ୩ ମାସ ପୂର୍ବରୁ ତରଭୁଜ ଏବଂ ଖରଭୁଜ ଗଛ ଲଗାଇଥିଲେ। ଏବେ ତାଙ୍କର ପ୍ରଥମ ତରଭୁଜ ଉତ୍ପାଦନ ହୋଇ ବଜାରରେ ବିକ୍ରି ପାଇଁ ରହିଛି। ଧୋନୀ ୪ ଏକର ଜମିରେ ତରଭୁଜ ଏବଂ ଦେଢ଼ ଏକର ଜମିରେ ଖରଭୁଜ ଲଗାଇଛନ୍ତି। ବିଶେଷ କଥା ହେଲା ବିନା କୌଣସି ରାସାୟନିକ ସାରରେ ପନିପରିବା ଅମଳ କରୁଛନ୍ତି ଧୋନୀ। ତାଙ୍କ ଫାର୍ମର ଫଳ ବହୁତ ସ୍ବାଦିଷ୍ଟ। ଧୋନୀ ଗୋଟିଏ ଏକର ଜମିରେ କ୍ୟାପସିକମ୍ ବି ଲଗାଇଛନ୍ତି। ଯାହା ଅଧିକ ଉତ୍ପାଦନ ହେଉଛି।
ସୂଚନାଯୋଗ୍ୟ, ଧୋନୀଙ୍କ ଫାର୍ମହାଉସରୁ କୋବି, ଟମାଟର, ଆଳୁ, ପିଆଜ, ବ୍ରୋକଲି, ପଣସ, ଅମୃତଭଣ୍ଡା ଅମଳ ହୋଇସାରିଛି। ଲୋକେ ଧୋନୀଙ୍କ ଅର୍ଗାନିକ ପନିପରିବାକୁ ବହୁ ପସନ୍ଦ କରୁଛନ୍ତି।