ବ୍ରହ୍ମବରଦା,୬।୫(ଡି.ଏନ.ଏ.): ଯାଜପୁର ଜିଲା ଧର୍ମଶାଳା ବ୍ଲକ ଅର୍ନ୍ତଗତ ମଙ୍ଗଳପୁର ପଞ୍ଚାୟତ କୋଠଢ଼ିହ ଗ୍ରାମର ସଲମା ବିବିଙ୍କ ପରିବାର ଦୟନୀୟ ଅବସ୍ଥାରେ ଦିନ କାଟୁଛନ୍ତି। ଘରଖଣ୍ଡେ ନ ଥିବାରୁ ଏହି ପରିବାର ଭଙ୍ଗା ଆଜବେଷ୍ଟସ ଘରେ ମୁଣ୍ଡ ଗୁଞ୍ଜିଛନ୍ତି। କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ଯୋଜନାରେ ଘର ଯୋଗାଇ ଦେଉଥିଲେ ମଧ୍ୟ ସଲମାଙ୍କ ପାଖରେ ତାହା ପହଞ୍ଚତ୍ ପାରିନାହିଁ। ସଲମାଙ୍କ ପରିବାର କହିଲେ ସ୍ବାମୀ ରିୟାଜୁଦ୍ଦିନ ଓ ୩ ଝିଅ। ରିୟାଜୁଦ୍ଦିନ ରାଜ୍ୟ ବାହାରେ ରହି ଦାଦନ ଖଟନ୍ତି। ସେଥିରୁ ଯାହା ରୋଜଗାର ହୁଏ ପରିବାରର ଖାଇବା ଖର୍ଚ୍ଚ ଏବଂ ପିଲାଙ୍କ ପାଠପଢ଼ାରେ ସରିଯାଏ। ଅର୍ଥ ଅଭାବରୁ ସଲମା ପକ୍କା ଘରଟିଏ କରି ପାରିନାହାନ୍ତି।
ଏପରି କି ତାଙ୍କ ପରିବାର ଗରିବ ଶ୍ରେଣୀର ହୋଇଥିଲେ ସୁଦ୍ଧା ଖାଦ୍ୟ ସୁରକ୍ଷା ଯୋଜନାରେ ରାଶନ କାର୍ଡ ଖଣ୍ଡେ ମିଳି ପାରିନାହିଁ। ଯେଉଁ ଆଜବେଷ୍ଟ ଘର ଖଣ୍ଡେ ରହିଛି ସେଥିରୁ ବିଭିନ ସ୍ଥାନରେ ଫାଟ ସୃଷ୍ଟି ହୋଇଛି। ତେଣୁ ସଲମା ଘର ଖଣ୍ଡେ ପାଇବା ପାଇଁ ବିଡିଓଙ୍କଠାରୁ ଆରମ୍ଭ କରି ୱାର୍ଡ ସଭ୍ୟଙ୍କ ପର୍ଯ୍ୟନ୍ତ ଯାଇଥିଲେ ମଧ୍ୟ ସବୁଠି ନିରାଶ ହୋଇଛନ୍ତି। ତେଣୁ ଜିଲାପାଳ ଏଥିପ୍ରତି ସ୍ବତନ୍ତ୍ର ଦୃଷ୍ଟି ଦେଇ ସଲମାଙ୍କ ପରିବାରକୁ ଏକ ପକ୍କାଘର ଓ ରାଶନକାର୍ଡ ଯୋଗାଇ ଦେବାକୁ ଦାବି ହୋଇଛି।