ବମ୍ବେ: ବଲିଉଡ୍ ଅଭିନେତା ସୁନିଲ ସେଟ୍ଟୀଙ୍କୁ ଇଣ୍ଡଷ୍ଟ୍ରୀର ଅନ୍ନା ବୋଲି କୁହାଯାଏ। ହେଲେ ଯଦି ତାଙ୍କର ବିତୃଷ୍ଣା ଭାବ ଆସେ ତେବେ ସେ ତାଙ୍କ ସହ କଥା ହୁଅନ୍ତି ନାହିଁ। ସୁପରଷ୍ଟାର ସଲମାନ୍ଙ୍କ ସହ ତାଙ୍କ ସମ୍ପର୍କ ବେଶ୍ ଭଲ। ହେଲେ ଏକ ସମୟରେ ସଲମାନ୍ଙ୍କୁ ସୁନିଲଙ୍କୁ ହାତ ଯୋଡ଼ି କ୍ଷମା ମାଗିବାକୁ ପଡ଼ିଥିଲା।
ସେ ସମୟରେ ସୁନିଲଙ୍କ ପ୍ରଥମ ଫିଲ୍ମ ’ବଲଓ୍ବାନ’ ରିଲିଜ ହୋଇଥିଲା। ଏହା ପରେ ତାଙ୍କୁ ଅନେକ ଫିଲ୍ମର ଅଫର ମିଳିଥିଲା। ସେଥିରୁ ଗୋଟିଏ କରିବା ପାଇଁ ସୁନିଲ ହଁ କରିଥିଲେ। ଫିଲ୍ମରେ ନାୟିକା ଭାବେ ସୋମି ଅଲ୍ଲୀଙ୍କୁ ଚୟନ କରାଯାଇଥିଲା। ହେଲେ ସେ ଯେତେବେଳେ ଜାଣିଲେ ସୁନିଲ ଉକ୍ତ ଫିଲ୍ମରେ ହିରୋ ଅଛନ୍ତି, ସେ ମନା କରିଦେଇଥିଲେ। ସେ ନୂଆ ନୂଆ କାମ କରୁଥିବା ନାୟକଙ୍କ ସହ କାମ କରିବେ ନାହିଁ ବୋଲି କହିଥିଲେ। ଏହା ଜାଣିବା ପରେ ସୁନିଲଙ୍କୁ ଖରାପ ଲାଗିଥିଲା। ପରେ ସୁନିଲ ‘ବକ୍ତ ହମାରା ହେ’, ‘ଦିଲଓ୍ବାଲେ’ ଭଳି ଫିଲ୍ମରେ କାମ କରି ସଫଳତା ପାଇଥିଲେ।
ଅପରପକ୍ଷେ ସୋମିଙ୍କ ଫିଲ୍ମ ‘ବୁଲନ୍ଦ’ ଅଟକି ରହିଥିଲା। ସେତେବେଳେ ସଲମାନ ସୋମିଙ୍କ ପ୍ରେମିକ ଥିଲେ। ଏହାପରେ ତାଙ୍କୁ ଫିଲ୍ମ ‘ଅନ୍ତ’ର ଅଫର ମିଳିଥିଲା। ସେଥିରେ ସୁନିଲ ନାୟକ ଥିଲେ। ଏହା ଜାଣି ମଧ୍ୟ ସୋମି ଫିଲ୍ମ କରିବାକୁ ରାଜି ହୋଇଥିଲେ। ହେଲେ ସୁନିଲଙ୍କୁ ଏହା ଜଣାପଡ଼ିବା ପରେ ସେ ଫିଲ୍ମ କରିବାକୁ ମନା କରିଦେଇଥିଲେ। ଏହାପରେ ପ୍ରଯୋଜକମାନେ ସୋମିଙ୍କୁ ଏ ବିଷୟରେ ଜଣାଇଥିଲେ। ଯଦି ଫିଲ୍ମରେ ସୁନିଲ ନ ରୁହନ୍ତି ଫିଲ୍ମ ହେବ ନାହିଁ ବୋଲି ରୋକଠୋକ୍ ଶୁଣାଇ ଦେଇଥିଲେ।
ଫଳରେ ଚିନ୍ତାରେ ପଡ଼ିଯାଇଥିଲେ ସୋମି। ସଲମାନଙ୍କୁ ଯେତେବେଳେ ଏହା ଜଣାପଡ଼ିଲା, ସେ ପ୍ରେମିକାଙ୍କ ପାଇଁ କଥା ହେବା ଲାଗି ସୁନିଲଙ୍କ ପାଖରେ ପହଞ୍ଚିଥିଲେ। ତାଙ୍କୁ ସୋମିଙ୍କ ସହ କାମ କରିବାକୁ ରାଜି କରାଇଥିଲେ। ଅନେକ ସମୟ ଧରି କଥା ହେବା ପରେ ସୁନିଲ କାମ କରିବାକୁ ରାଜି ହୋଇଥିଲେ। ଏବେ ସଲମାନଙ୍କ ଆଗରେ ଇଣ୍ଡଷ୍ଟ୍ରୀ ନଉଁଥିବା ବେଳେ ସେ ସୁନିଲଙ୍କୁ ଅନୁରୋଧ କରିଥିବା କୁହାଯାଉଛି।