ମୁମ୍ବାଇ: ଦୀର୍ଘ ୬ ବର୍ଷ ତଳେ ରିଲିଜ୍ ହୋଇଥିବା ସୁପରହିଟ୍ ଫିଲ୍ମ ‘ବଜରଙ୍ଗି ଭାଇଜାନ’ ସଲମାନ ଖାଁଙ୍କ କ୍ୟାରିୟରରେ ଆଣିଥିଲା ଏକ ନୂଆ ମୋଡ । ଏଥିରେ ସଲମାନଙ୍କ ଅଭିନୟକୁ ଦର୍ଶକେ ବେଶ୍ ପ୍ରଶଂସା କରିଥିଲେ । ଏବେ ଏହି ଫିଲ୍ମର ସିକ୍ୱିଏଲ ନିର୍ମାଣ ହେବାକୁ ଯାଉଥିବା ଜଣାପଡିଛି । ସୂଚନାଯୋଗ୍ୟ, ଜାନୁୟାରୀ ୭ରେ ରିଲିଜ୍ ହେବାକୁ ଯାଉଥିବା ଫିଲ୍ମ ‘ଆର୍ଆର୍ଆର୍’ର ଏକ ବିଶେଷ କାର୍ଯ୍ୟକ୍ରମରେ ସଲମାନ ଖାଁ ସାମିଲ ହୋଇଥିବା ବେଳେ ସେହିଠାରେ ହିଁ ସେ କନଫର୍ମ କରିଛନ୍ତି କି ‘ବଜରଙ୍ଗି’ ଭାଇଜାନର ସିକ୍ୱିଏଲ ନିର୍ମାଣ କରାଯାଉଛି । ମୁମ୍ବାଇରେ ଅନୁଷ୍ଠିତ ‘ଆର୍ଆର୍ଆର୍’ର ଏହି ବିଶେଷ କାର୍ଯ୍ୟକ୍ରମରେ ସଲମାନ ଖାଁ, କରଣ ଜୋହର, ଆଲିଆ ଭଟ୍ଟ, ଜୁନିୟର ଏନଟିଆର, ରାମଚରଣ ଓ ‘ଆର୍ଆର୍ଆର୍’ ଫିଲ୍ମର ନିର୍ଦ୍ଦେଶକ ଏସ୍. ଏସ୍ ରାଜାମୌଳି ଉପସ୍ଥିତ ଥିଲେ । ଏହି ଇଭେଣ୍ଟ ସମୟରେ ସଲମାନ କହିଥିଲେ ଏସ୍. ଏସ୍ ରାଜାମୌଳିଙ୍କ ଲେଖକ ପିତା କେ.ବି. ବିଜେନ୍ଦ୍ର ପ୍ରସାଦ ‘ବଜରଙ୍ଗି ଭାଇଜାନ’ ଲେଖିଥିଲେ ଯାହା ତାଙ୍କ କ୍ୟାରିୟରରେ ଏକ ନୂଆ ମୋଡ ଆଣିଥିଲା । ଆଉ ଏବେ ବିଜେନ୍ଦ୍ର ପ୍ରସାଦ ‘ବଜରଙ୍ଗି ଭାଇଜା’ର ସିକ୍ୱିଏଲ ପାଇଁ ସ୍କ୍ରିପ୍ଟ ପ୍ରସ୍ତୁତ କରି ସାରିଲେଣି । ଏହି ସମୟରେ ନିର୍ଦ୍ଦଶକ କରନ ଜୋହର ସଲମାନଙ୍କୁ ପ୍ରଶ୍ନ କରିଥିଲେ କ’ଣ ‘ବଜରଙ୍ଗି ଭାଇଜାନ’ର ସିକ୍ୱିଏଲକୁ ନେଇ ଏହା ଆନାଉନ୍ସମେଣ୍ଟ ବୋଲି ଧରିନେବା । ଉତ୍ତରରେ ସଲମାନ ହଁ ଭରିଥିଲେ । ତେଣୁ ଦର୍ଶକେ ‘ବଜରଙ୍ଗି ଭାଇଜାନ’ର ସିକ୍ୱିଏଲକୁ ଅପେକ୍ଷା ରଖିବେ ନିଶ୍ଚୟ ।