ବମ୍ବେ: ପଡ଼ୋଶୀଙ୍କ ବିରୋଧରେ ମାନହାନି ମକଦ୍ଦମା ଦାୟର କରି ଚର୍ଚ୍ଚାରେ ଦବଙ୍ଗ ଖାଁ ସଲମାନ। ପାନ୍ଭେଲରେ ରହୁଥିବା ପଡୋଶୀ କେତନ କକ୍କର ତାଙ୍କର ପୁରୁଣା ଭିଡିଓ ଶେୟାର କରି ଭାବମୂର୍ତ୍ତିକୁ କ୍ଷୁର୍ଣ୍ଣ କରିବା ସହ ଲୋକଙ୍କୁ ଉତ୍ତେଜିତ କରିବାକୁ ମଧ୍ୟ ଚେଷ୍ଟା କରିଥିବା ଅଭିନେତା କହିଛନ୍ତି। ବମ୍ବେ ହାଇକୋର୍ଟରେ ଏନେଇ ଶୁଣାଣି ହୋଇଥିବା ବେଳେ ସଲମାନ ନିଜର ବିବୃତି ରଖିଥିଲେ।ମାର୍ଚ୍ଚ ୨୦୨୨ରେ ସେଶନ୍ସ କୋର୍ଟରେ ହୋଇଥିବା ଆଦେଶକୁ ଚ୍ୟାଲେଞ୍ଜ କରି ଏହି ଆବେଦନ କରିଥିଲେ। ମାମଲାର ପରବର୍ତ୍ତୀ ଶୁଣାଣି ଅଗଷ୍ଟ ୨୨ରେ ହେବ।
କେତନ ତାଙ୍କ ଭିଡିଓରେ ସଲମାନ ତାଙ୍କ ପାନଭେଲ ଫାର୍ମହାଉସ୍ରେ କ’ଣ କରନ୍ତି ସେ ବିଷୟରେ କହିଥିଲେ। ସେ ଅଭିନେତାଙ୍କ ତୁଳନା ବାବର ଏବଂ ଔରଙ୍ଗଜେବଙ୍କ ସହ କରିଥିଲେ। ଏପରିକି ସେ ସଲମାନଙ୍କୁ ଅଣ୍ଡରଓ୍ବାଲର୍ଡ ଡନ୍ ଦାଉଦ ଇବ୍ରାହିମ ଗ୍ୟାଙ୍ଗର ସଦସ୍ୟ ଭାବେ ବର୍ଣ୍ଣନା କରିଥିଲେ। ଏହାକୁ ନେଇ ସଲମାନ କୋର୍ଟର ଦ୍ୱାରସ୍ଥ ହୋଇଥିଲେ। କେତନ ଉକ୍ତ ଭିଡିଓକୁ ହଟାଇବା ସହ ଭବିଷ୍ୟତରେ ଏଭଳି କରିବା ବନ୍ଦ କରିବା ଉଚିତ ବୋଲି ସଲମାନ ଆବେଦନ କରିଥିଲେ। ହେଲେ ସେଶନ୍ସ କୋର୍ଟ ଏପରି ନିର୍ଦ୍ଦେଶ ଦେବାକୁ ମନା କରିବା ପରେ ସଲମାନ ବମ୍ବେ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି।
