ବମ୍ବେ: କେବେ ବିବାହ କରିବେ ଭାଇଜାନ୍? ଏଭଳି ପ୍ରଶ୍ନର ଉତ୍ତର ହୁଏତ କେହି ଜାଣେନା। ଅନେକ ସମୟରେ ନାୟିକାମାନଙ୍କ ସହ ତାଙ୍କ ନାମକୁ ଯୋଡ଼ା ଯାଇଛି। ହେଲେ ବିବାହ ହୋଇପାରିନାହିଁ। ସେଭଳି କିଛି ଘଟିଥିଲା ୧୯୯୯ ମସିହା ନଭେମ୍ବର ୧୮ ତାରିଖରେ।
କୁହାଯାଏ ସଲମାନ ଖାନ୍ ଏବଂ ଲୋକପ୍ରିୟ ପ୍ରଯୋଜକ ସାଜିଦ୍ ନାଦିଆବାଲାଙ୍କ ବିବାହ ଉକ୍ତ ଦିନ ହେବାର ଥିଲା। ଉଭୟ ବିବାହ ପାଇଁ ଅତିଥିମାନଙ୍କୁ ଆମନ୍ତ୍ରଣ କରିଦେଇଥିଲେ। ହେଲେ ଧାର୍ଯ୍ୟ ବିବାହ ତାରିଖର ୫ରୁ ୬ ଦିନ ପୂର୍ବରୁ ସଲମାନ ଓହରିଯାଇଥିଲେ। ହେଲେ ସାଜିଦ ନିଜ ପ୍ରେମିକାଙ୍କ ହାତ ଧରିଥିଲେ।
ବିଗତ କିଛି ବର୍ଷକୁ ଯଦି ଦେଖାଯାଏ ତେବେ ୧୯୯୦ ମସିହାରେ ଅଭିନେତ୍ରୀ ସଙ୍ଗୀତା ବିଜଲାନୀଙ୍କ ପ୍ରେମରେ ପଡ଼ିଥିଲେ ସଲମାନ। ହେଲେ ବିବାହ ଯାଏ ଏହି କଥା ବଢ଼ି ନ ଥିଲା। ପଚରାଯିବାରେ ଯେତେବେଳେ ସ୍ତ୍ରୀଙ୍କୁ ମା’ବାପାଙ୍କଠାରୁ ଅଧିକ ଭଲପାଇବା ଦେବାର ଯୋଗ୍ୟତା ହୋଇଯିବ ସେତେବେଳେ ବିବାହ ପାଇଁ ରାଜି ହୋଇଯିବି ବୋଲି ସଫେଇ ଦେଇଥିଲେ।
୨୦୧୯ରେ ସଲମାନ ବିବାହରେ ବିଶ୍ୱାସ କରନ୍ତି ନାହିଁ ବୋଲି କହିଥିଲେ। ଏହା ଏକ ମୃତ୍ୟୁର ବନ୍ଧନ ବୋଲି କହିଦେଇଥିଲେ। ଏହାପରେ ଏକାଧିକ ସମୟରେ ତାଙ୍କୁ ବିବାହକୁ ନେଇ ପଚରାଯାଇଛି। ବିଗ୍ବସ୍ ସେଟ୍ ହେଉ ଅଥବା ଫିଲ୍ମ ପ୍ରମୋଶନ, ସବୁଠାରେ ତାଙ୍କ ଅସଲ ଜୀବନର ନାୟିକା କିଏ ହେବ ସେ ନେଇ ପଚରାଯାଇଛି। ହେଲେ ସବୁଥର ପରି କଥାକୁ ଏଡ଼ାଇ ଯାଉଛନ୍ତି ସଲମାନ୍। ଏବେ ୫୫ ବର୍ଷରେ ପାଦ ଥାପିଥିବା ସଲମାନ୍ କେବେ ବିବାହ କରୁଛନ୍ତି ତାହା ଏକ ଅଛିଣ୍ଡା ପ୍ରଶ୍ନ ପାଲଟିଛି ବୋଲି କହିଲେ ଭୁଲ୍ ହେବ ନାହିଁ।