ମୁମ୍ବାଇ: ବଲିଉଡ୍ର ହ୍ୟାଣ୍ଡସମ୍ ବ୍ୟାଚଲର ସଲମାନ ଖାନ ଦୀର୍ଘ ବର୍ଷ ଧରି ତାଙ୍କ ପ୍ରଶଂସକଙ୍କର ମନୋରଞ୍ଜନ କରିଆସୁଛନ୍ତି। ତିନି ଦଶନ୍ଧି ଧରି ସେ ତାଙ୍କ କ୍ୟାରିୟରରେ ଭିନ୍ନ ଚରିତ୍ର ସହିତ ପ୍ରଶଂସକଙ୍କ ହୃଦୟରେ ଏକ ସ୍ବତନ୍ତ୍ର ସ୍ଥାନ ସୃଷ୍ଟି କରିଛନ୍ତି। ଏକ ସମୟ ଥିଲା, ଯେତେବେଳେ ସଲମାନ ପ୍ରଥମ ଫିଲ୍ମରେ ମାତ୍ର ୧୧ ହଜାର ଫି’ ନେଇ କାମ କରିଥିଲେ। ଆଜି ସେ ଗୋଟିଏ ଫିଲ୍ମ ପାଇଁ ୧୦୦ କୋଟିରୁ ଅଧିକ ଟଙ୍କା ଚାର୍ଜ କରନ୍ତି।
ସଲମାନ ୧୯୮୮ରେ ‘ବିବି ହୋ ତୋ’ ଫିଲ୍ମରୁ ବଲିଉଡ୍ରେ ଡେବ୍ୟୁ କରିଥିଲେ। ଏଥିରେ ଫାରୁକ ଶେଖ୍ ଏବଂ ରେଖା ମୁଖ୍ୟ ଭୂମିକାରେ ଅଭିନୟ କରିଥିଲେ। ସଲମାନ ସହାୟକ ଭୂମିକାରେ ଥିଲେ। ଏହି ଫିଲ୍ମ ପାଇଁ ସଲମାନ ମାତ୍ର ୧୧ ହଜାର ଟଙ୍କା ପାରିଶ୍ରମିକ ନେଇଥିଲେ।
ବର୍ତ୍ତମାନ ସଲମାନ ବଲିଉଡ୍ର ସର୍ବାଧିକ ପାରିଶ୍ରମିକ ପାଉଥିବା ଜଣେ ସୁପରଷ୍ଟାର ହୋଇପାରିଛନ୍ତି। ସଲମାନ ତାଙ୍କର ଫିଲ୍ମ ‘ଟାଇଗର’ ପାଇଁ ୧୦୦ କୋଟି ଟଙ୍କା ଫି’ ନେଇଛନ୍ତି। ସେ ଗତ କିଛି ବର୍ଷ ଧରି ରିୟାଲିଟି ଶୋ’ ବିଗ୍ ବସ୍ର ହୋଷ୍ଟ କରୁଛନ୍ତି। ଗୋଟିଏ ଏପିସୋଡ୍ ପାଇଁ ୧୨ କୋଟି ଟଙ୍କା ନିଅନ୍ତି।
ସଲମାନଙ୍କ ବାର୍ଷିକ ରୋଜଗାର ହେଉଛି ୨୦୦ କୋଟି ଟଙ୍କା । ତାଙ୍କର ମୋଟ୍ ସମ୍ପତ୍ତି ମୂଲ୍ୟ ୨୮୫୦ କୋଟି ଟଙ୍କା ବୋଲି କୁହାଯାଉଛି। ଯଦି ସେ ନିଜ ଇନ୍ଷ୍ଟାଗ୍ରାମରେ ଏକ ବ୍ରାଣ୍ଡକୁ ସମର୍ଥନ କରନ୍ତି, ତେବେ ସେ କେବଳ ଗୋଟିଏ ପୋଷ୍ଟ ଶେୟାର କରିବା ପାଇଁ ୫୦ ଲକ୍ଷ ଟଙ୍କା ଶୁଳ୍କ ଆଦାୟ କରନ୍ତି।
ସଲମାନଙ୍କ ‘ଗାଲାକ୍ସି’ ଆପାର୍ଟମେଣ୍ଟର ମୂଲ୍ୟ ୧୧୪ କୋଟି ଟଙ୍କା। ପାନଭେଲରେ ତାଙ୍କର ଏକ ଫାର୍ମହାଉସ ଅଛି ଯାହାର ମୂଲ୍ୟ ୯୪ କୋଟି ଟଙ୍କା। ଏହା ବ୍ୟତୀତ ଚିମ୍ବାଇ ରୋଡ୍ରେ ତାଙ୍କର ଏକ ସମ୍ପତ୍ତି ଅଛି ଯାହାର ମୂଲ୍ୟ ୧୭ କୋଟି ଟଙ୍କା। ଗୋରାଇ ବେଳାଭୂମିରେ ୩୫ କୋଟି ମୂଲ୍ୟର ଏକ ଘର ଅଛି। ଏଥି ସହିତ ମୁମ୍ବାଇ ଏବଂ ଦୁବାଇରେ ତାଙ୍କର ଆଉ ତିନୋଟି ଜାଗା ରହିଛି।
ସଲମାନଙ୍କର ନିଜସ୍ବ ପ୍ରଡକ୍ସନ ହାଉସ ଅଛି, ଯାହାର ନାମ ‘ସଲମାନ ଖାନ ଫିଲ୍ମସ’। ସେ ‘ଦ ହ୍ୟୁମାନ ଫାଉଣ୍ଡେଶନ’ ନାମକ ଏକ ଚାରିଟି ଟ୍ରଷ୍ଟ ଚଳାଉଛନ୍ତି। ଏସ୍କେ-୨୭ ନାମକ ଏକ ଜିମ୍ ଫ୍ରାଞ୍ଚାଇଜ ଅଛି। ଏହା ବ୍ୟତୀତ ସଲମାନ ‘ବି ହ୍ୟୁମାନ’ ପୋଷାକ ବ୍ୟାଣ୍ଡର ମାଲିକ ଅଟନ୍ତି। ସେ ଅନେକ ଷ୍ଟାର୍ଟଅପରେ ମଧ୍ୟ ଟଙ୍କା ବିନିଯୋଗ କରିଛନ୍ତି।
‘କିସି କା ଭାଇ କିସି କି ଜାନ୍’ର ଅଭିନେତା ସଲମାନ ପ୍ରାୟତଃ ବିଳାସପୂର୍ଣ୍ଣ କାର୍ ଚଢୁଥିବା ଦେଖାଯାଏ। ତାଙ୍କର ମର୍ସିଡିଜ ଏସ୍ କ୍ଲାସ, ଏଏମ୍ଜି ଜିଏଲ୍ଇ ୪୩, ରେଞ୍ଜ ରୋଭର, ଏଲ୍ଏକ୍ସ ୪୭୦, ଅଡି ଆର୍ଏସ୍-୭, ଲ୍ୟାଣ୍ଡ କ୍ରୁଜର ଏବଂ ବିଏମ୍ଡବ୍ଲ୍ୟୁ୬ ପରି ବିଳାସପୂର୍ଣ୍ଣ ଗାଡ଼ି ରହିଛି। ଯେଉଁ ଗାଡ଼ିଗୁଡ଼ିକର ମୂଲ୍ୟ କୋଟି କୋଟି ଟଙ୍କା ଅଟେ।