Smriti Mandhana (C)of Trailblazers pose for picture with trophy after the final of the Jio Womens T20 Challenge 2020 between the Trailblazers and the Supernovas held at the Sharjah Cricket Stadium, Sharjah in the United Arab Emirates on the 9th November 2020. Photo by: Arjun Singh / Sportzpics for BCCI
ଶାରଜା, ୧୧।୧୧(ପି.ଟି.)- ଚଳିତ ବର୍ଷର ମହିଳା ଟି୨୦ ଚ୍ୟାଲେଞ୍ଜ୍ରେ ବାଜି ମାରିଛି ଟ୍ରେଲ୍ ବ୍ଲେଜର୍ସ। ସୋମବାର ଅନୁଷ୍ଠିତ ଫାଇନାଲରେ ଗତ ୨ ବର୍ଷର ଚାମ୍ପିୟନ ସୁପରନୋଭାସକୁ ୧୬ ରନରେ ହରାଇ ପ୍ରଥମଥରପାଇଁ ଚାମ୍ପିୟନ ହୋଇଛି ସ୍ମୃତି ମାନ୍ଧାନାଙ୍କ ନେତୃତ୍ୱାଧୀନ ଏହି ଦଳ। ଲୋ ସ୍କୋରିଂ ମ୍ୟାଚରେ ଟ୍ରେଲ୍ବ୍ଲେଜର୍ସ ମାତ୍ର ୧୧୮ ରନ କରିଥିଲେ ହେଁ ତାହାକୁ ଚେଜ୍ କରିପାରି ନ ଥିଲା ହରମନପ୍ରୀତ କୌରଙ୍କ ସୁପରନୋଭାସ। ଏହି ଦଳ ପୂରା ୨୦ ଓଭର ଖେଳିଥିଲେ ହେଁ ୭ ଉଇକେଟ ହରାଇ ୧୦୨ ରନ କରିପାରିଥିଲା। ଏଥିରେ ସ୍ବାଭାବିକଭାବେ ଖୁସି ଜାହିର କରିଛନ୍ତି ଚାମ୍ପିୟନ ଦଳର ଅଧିନାୟିକା ସ୍ମୃତି। ଲୋ ସ୍କୋରିଂ ଗେମ୍ ହୋଇଥିଲେ ହେଁ ତାଙ୍କ ସ୍ପିନରମାନେ ଏହାକୁ ଡିଫେଣ୍ଡ କରିବାର କ୍ଷମତା ରଖିଛନ୍ତି ବୋଲି ସେ ସର୍ବଦା ବିଶ୍ୱାସ କରିଥାନ୍ତି। ପିଚ୍ କ୍ରମେ ସ୍ଲୋ ହୋଇଥିବାରୁ ଫାଇନାଲରେ ତାଙ୍କ ଦଳର ବିଜୟ ସମ୍ଭବ ହେଲା ବୋଲି ସେ ପ୍ରକାଶ କରିଛନ୍ତି। ” ଏହା ଏକ ଚମତ୍କାର ପ୍ରଦର୍ଶନ ଥିଲା। ଆମେ ୧୩୦-୪୦ ରନ କରିବାକୁ ଚାହିଁଥିଲୁ, ମାତ୍ର ଶେଷ ଭାଗରେ ଟ୍ରାକ୍ଚ୍ୟୁତ ହେଲୁ। ପିଚ୍ ସ୍ଲୋ ଥିବାରୁ ଏବଂ ମ୍ୟାଚ ଆଗେଇବା ସହିତ ଅଧିକ ସ୍ଲୋ ହେଉଥିବାରୁ ୧୨୦ ପାଖାପାଖି ଚ୍ୟାଲେଞ୍ଜିଂ ସ୍କୋର ବୋଲି ମୁଁ ଅନୁଭବ କରିଥିଲି। ଆମର ସ୍ପିନ୍ ଆକ୍ରମଣ ବହୁତ ଭଲ। ଆମେ ମ୍ୟାଚର ପ୍ରଥମ ବଲ୍ରୁ ସକାରାତ୍ମକ ଫଳାଫଳ ପାଇଥିଲୁ“ ବୋଲି ମାନ୍ଧାନା କହିଛନ୍ତି। ଅଫ୍ ସ୍ପିନର ସଲ୍ମା ଖାତୁନ ୧୯ତମ ଓଭରରେ ୩ ଉଇକେଟ ନେଇଥିଲେ। ଏହା ମଧ୍ୟରେ ଅଧିନାୟିକା ହରମନପ୍ରୀତଙ୍କ ଉଇକେଟ ସାମିଲ ଥିଲା। ”ସଲ୍ମା ବଢ଼ିଆ ବୋଲିଂ କରିଥିଲେ। ଏହାକୁ ମ୍ୟାଚ ବିଜୟୀ ସ୍ପେଲ କୁହାଯାଇପାରିବ। ସେ ଜଣେ ଅଭିଜ୍ଞ ଖେଳାଳି। ନିଜ ଉପରେ ବିଶ୍ୱାସ ରଖିବାକୁ ମୁଁ ତାଙ୍କୁ ପରାମର୍ଶ ଦେଇଥିଲି। ସେ ନିଜ ଅଭିଜ୍ଞତାର ଉପଯୋଗ କଲେ ଏବଂ ଫଳାଫଳରେ ତାହା ପ୍ରତିଫଳିତ ହେଲା“ ବୋଲି ସେ କହିଛନ୍ତି।
ଟ୍ରେଲ୍ ବ୍ଲେଜର୍ସ ଦଳର ଥାଇଲାଣ୍ଡ ଖେଳାଳି ନଥାକନ୍ ଚନଥାମଙ୍କ ଏକ ବାଉଣ୍ଡାରି ଫିଲ୍ଡିଂ ଏବେ ଚର୍ଚ୍ଚାରେ ରହିଛି। ତେଣୁ ସ୍ବାଭାବିକଭାବେ ତାଙ୍କ ପ୍ରଶଂସାରେ ଶତମୁଖ ହୋଇଥିଲେ ଅଧିନାୟିକା। ଚନ୍ଥାମ ପଡ଼ିଆରେ ସବୁବେଳେ ସକ୍ରିୟ ଥାଆନ୍ତି। ଆକ୍ରୋବେଟିକ୍ ଦକ୍ଷତା ଦେଖାଇ ସେ ଯେପରି ବାଉଣ୍ଡାରି ଅଞ୍ଚଳରେ ବଲ୍କୁ ଅଟକାଇଲେ ତାହା ମହିଳା କ୍ରିକେଟ ପାଇଁ ଏକ ଭଲ ବିଜ୍ଞାପନ। ସେ କଭର ଅଞ୍ଚଳରେ ଏକ ଚିତ୍ତାକର୍ଷକ କ୍ୟାଚ ମଧ୍ୟ ନେଇଥିଲେ। ଫିଲ୍ଡିଂ ସମୟରେ ଚନ୍ଥାମ ୨-୩ ଥର ଯେପରି ଦକ୍ଷତା ଦେଖାଇଲେ ତାହା ମହିଳା କ୍ରିକେଟରେ ମୁଁ କେବେ ଦେଖି ନ ଥିଲି ବୋଲି ମାନ୍ଧାନା ପ୍ରକାଶ କରିଛନ୍ତି। କୋଭିଡ-୧୯ ପାଇଁ ଦୀଘଦିନପରେ କ୍ରିକେଟ ଖେଳିବା ସୁଯୋଗ ପାଇଥିବାରୁ ସମସ୍ତେ ଖୁସିଥିବା ସେ କହିଛନ୍ତି। ” ଆମେ ଖେଳିବା ସହିତ ସମସ୍ତଙ୍କ ସହ ମିଶିବାକୁ ଚାହୁଁଥିଲୁ। ଆମେ ୭ ମାସ ହେଲା ପରସ୍ପରକୁ ଦେଖି ନ ଥିଲୁ। ଏପରି ପୂର୍ବରୁ କେବେ ହୋଇ ନ ଥିଲା। ଗତ ୬ ମାସ ସମ୍ପୂର୍ଣ୍ଣ ବିଶ୍ୱ ପାଇଁ କଷ୍ଟଦାୟକ ଥିଲା। ଏହି ଟୁର୍ନାମେଣ୍ଟ ଆୟୋଜନ କରିଥିବାରୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)କୁ ମୁଁ ଧନ୍ୟବାଦ ଜଣାଉଛି। ଆଗକୁ ମଧ୍ୟ ଖେଳ ବଜାୟ ରଖିବାନେଇ ଆଶା ରହିଛି। ଏହା ହୋଇପାରିଲେ ଆମେ ନିଶ୍ଚିତ ଖୁସି ହେବୁ“ ବୋଲି ସେ କହିଛନ୍ତି। ସୁପରନୋଭାସର ସିନିୟର ଶ୍ରୀଲଙ୍କା ଖେଳାଳି ଶଶିକଳା ଶିରିବର୍ଦ୍ଧନେ ମଧ୍ୟ ଏହି ଇଭେଣ୍ଟ ଆୟୋଜନ ପାଇଁ ବିସିସିଆଇକୁ ଧନ୍ୟବାଦ ଦେଇଛନ୍ତି।