ସମ୍ବଲପୁର, ୨୬ା୬ (ଶୁଭାଶିଷ ପାଢୀ): ସମ୍ବଲପୁର ଜିଲାକୁ ଭୁବନେଶ୍ୱରସ୍ଥିତ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ଅରେଞ୍ଜ ଓ୍ବାର୍ଣ୍ଣିଭାବେ ସୂଚିତ କରାଯାଇଛି। ରବିବାର ଓ ସୋମବାର ଦୁଇଦିନ ଧରି ପ୍ରବଳ ବର୍ଷା ହେବ ବୋଲି ସଚେତନ କରାଯାଇଛି। ୨୫ ତାରିଖ ସକାଳ ସାଢେ ୮ଟାରୁ ୨୬ ତାରିଖ ସକାଳ ସାଢେ ୮ ମଧ୍ୟରେ ପଶ୍ଚିମ ଓଡିଶାର ସମ୍ବଲପୁର ସମେତ ବରଗଡ, ବଲାଙ୍ଗୀର, ସୋନପୁର, ଝାରସୁଗୁଡା, ବୌଦ୍ଧ ଜିଲା ୭ ରୁ ୨୦ ସେମି ବର୍ଷା ହେବ ବୋଲି ସୂଚନା ଦିଆଯାଇଥିଲା। ସୂଚନା ଅନୁସାରେ ଶନିବାର ସନ୍ଧ୍ୟାରୁ ସମ୍ବଲପୁର ଜିଲାରେ ଲଗାଣ ବର୍ଷା ହେଉଛି। ବନ୍ୟା ପରିସ୍ଥିତି ମୁକାବିଲା ପାଇଁ ପୂର୍ବରୁ ଥରକୁ ଥର ପ୍ରସ୍ତୁତି ବୈଠକ ହୋଇଥିଲା। ହେଲେ ପ୍ରଥମ ମୌସୁମୀ ବର୍ଷାରେ ସହର ତଳିଅଞ୍ଚଳ ଜଳ ମଗ୍ନ ହୋଇଥିବାବେଳେ ଡ୍ରେନଗୁଡିକ ସଫେଇ ନ ହେବାରୁ ଘରକୁ ପାଣି ପଶି ଯାଇଛି। ଦୁଇଦିନ ବର୍ଷାରେ ସମ୍ବଲପୁରବାସୀଙ୍କ ହାଲ ବେହାଲ ହୋଇଯାଇଛି। ପ୍ରଶାସନର ଅବହେଳା ଓ ପୂର୍ବ ପ୍ରସ୍ତୁତି ନ ହେବାରୁ ଏଭଳି ହୋଇଥିବା ନେଇ ଅଭିଯୋଗ ହେଉଛି। ମହାନଗର ନିଗମ ପ୍ରାୟ ଅଞ୍ଚଳରେ ଡ୍ରେନ ସଫେଇ ନ ହେବାରୁ ଜାମ ହୋଇ ରହିଛି। ବର୍ଷାଜଳ ନିଷ୍କାସନ ନ ହୋଇପାରି କୃତିମ ବନ୍ୟା ସୃଷ୍ଟି ହୋଇଥିଲା। ଏପରିକି ଜାତୀୟ ରାଜପଥଗୁଡିକରେ ମଧ୍ୟ ପାଣି ପ୍ରବାହିତ ହେଉଥିଲା। ଟାଙ୍ଗରପାଲି, ଚାରଭାଟି, ମୋଦିପଡା ଦେଉଲବନ୍ଧ ଫାଟକ ସମେତ ବିଭିନ୍ନ ତଳି ଅଞ୍ଚଳ ଓ ରାସ୍ତା ଗୁଡିକରେ ବର୍ଷା ଜଳ ନିଷ୍କାସନ ବ୍ୟବସ୍ଥା ଠିକ ଭାବରେ ହୋଇ ନ ପାରିବାରୁ ଲୋକଙ୍କ ଘର ଓ ଦୋକାନରେ ବର୍ଷା ଜଳ ପ୍ରବେଶ କରିଛି ବୋଲି ଅଭିଯୋଗ ହୋଇଛି। ଜାତୀୟ ରାଜପଥରେ ୫୩ ସାର୍ଭିସ ରୋଡର ପାଞ୍ଚଗୋଛିଆ ଠାରେ ୪ ଫୁଟର ବର୍ଷା ପାଣି ଜମି ରହିଛି। ମାନେଶ୍ୱର ଛକରେ ମଧ୍ୟ ଜାତୀୟ ରାଜପଥ ୫୫ ନିର୍ମାଣ ସଂସ୍ଥା ଡ୍ରେନ କାମ ଅଧାରେ ପକାଇ ଦେଇଥିବାରୁ ରବିବାର ରାତି ଓ ସକାଳେ କଟିଆପଡାକୁ ପାଣି ପଶି ଯାଇଥିଲା। ଘର ଭିତରେ ପାଣି ଥିବା ନେଇ ଲୋକମାନେ ଅସନ୍ତେଷ ବ୍ୟକ୍ତ କରି ଅଭିଯୋଗ କରିଥିଲେ। ଘରୁ ବାହାରି ପଡିଥିଲେ। ଉତ୍ତେଜନା ପ୍ରକାଶ ପାଇଥିଲା। ଖବର ପାଇ ଠିକା ସଂସ୍ଥା କର୍ମଚାରୀମାନେ ପହଞ୍ଚିଥିଲେ। ପରେ ଜେସିବରେ ମାଟି ଖୋଳି ଏକ ଅସ୍ଥାୟୀ ଡ୍ରେନ ନିର୍ମାଣ କରାଯିବା ପରେ ପାଣି ଘରକୁ ପଶିବା ବନ୍ଦ ହୋଇଥିଲା। ହେଲେ ଏହି ଅସ୍ଥାୟୀ ଡ୍ରେନର ମଧ୍ୟ ସ୍ଥାୟୀତ୍ୱ ନାହିଁ। ପୁଣି ସମସ୍ୟା ହେବ ବୋଲି ପଡାବାସୀ କହିଛନ୍ତି।