ଧାମନଗର,୨୧।୧୦(ଡି.ଏନ୍.ଏ): ଧାମନଗର ଉପନିର୍ବାଚନ ରଣକ୍ଷେତ୍ରରେ ଭାଜପା ରାଜ୍ୟ ସଭାପତି ସମୀର ମହାନ୍ତି ପ୍ରଚାର ମଇଦାନରେ ସାମିଲ ହୋଇଛନ୍ତି। ସେ ଗତ ଦୁଇଦିନ ଧରି ଏହି ନିର୍ବାଚନମଣ୍ଡଳୀ ଅଧୀନ ବିଭିନ୍ନ ପଞ୍ଚାୟତ ଗସ୍ତ କରି ଲୋକଙ୍କୁ ଭେଟି ଦଳୀୟ ପ୍ରାର୍ଥୀ ସୂର୍ଯ୍ୟବଂଶୀ ସୂରଜ ସ୍ଥିତପ୍ରଜ୍ଞଙ୍କ ସପକ୍ଷରେ ଭୋଟ ଭିକ୍ଷା କରିଛନ୍ତି। ସମୀର ବ୍ଲକର ଗୋବିନ୍ଦପୁର, ଚୂଡ଼ାକୁଟି, ଦଇପୁର ଓ ଅନ୍ୟାନ୍ୟ ପଞ୍ଚାୟତର ବିଭିନ୍ନ ସ୍ଥାନକୁ ଯାଇ ପ୍ରଚାର କରିବା ସହ କେନ୍ଦ୍ର ସରକାରଙ୍କ ଦ୍ୱାରା ପ୍ରଚଳିତ ବିଭିନ୍ନ ଯୋଜନାକୁ ଶାସକ ବିଜେଡି ଅପବ୍ୟବହାର କରୁଥିବା ଆରୋପ ଆଣି ଲୋକଙ୍କୁ ବୁଝାଇଥିଲେ। ଜଣେ ଉଚ୍ଚଶିକ୍ଷିତ ଉଦୀୟମାନ ଯୁବକ ସୂର୍ଯ୍ୟବଂଶୀଙ୍କୁ ସ୍ବାଭିମାନୀ ଧାମନଗରବାସୀ ବହୁ ମାତ୍ରାରେ ସମର୍ଥନ କରିବେ ବୋଲି ସେ ଆଶାବ୍ୟକ୍ତ କରିଛନ୍ତି। ସମୀରଙ୍କ ସମେତ ଦଳର ବରିଷ୍ଠ ନେତା ମନମୋହନ ସାମଲ, ବିରୋଧୀ ଦଳ ନେତା ଜୟ ନାରାୟଣ ମିଶ୍ର, ରାଜ୍ୟ ସାଧାରଣ ସମ୍ପାଦକ ଗୋଲଖ ମହାପାତ୍ର, ବିଧାୟକ ନବ ଚରଣ ମାଝି, ପ୍ରକାଶ ସୋରେନ, ସନାତନ ବିଜୁଳି, ଡା. ବୁଢ଼ାନ ମୁର୍ମୁ, ରାଜ୍ୟ ସମ୍ପାଦକ କାଳନ୍ଦୀ ସାମଲ, ଐର ଖାରବେଳ ସ୍ବାଇଁ, ମୁରଲୀ ଶର୍ମା, ଅଭିମନ୍ୟୁ ସେଠୀ, ଜିଲା ସଭାପତି ହେମନ୍ତ ପାଢୀ, ବଦ୍ରି ନାରାୟଣ ଧଳ, ଡା. ପ୍ରଦୀପ ନାୟକ, ବିରଞ୍ଚି ତ୍ରିପାଠୀ, ମହିଳା ମୋର୍ଚ୍ଚା ସଭାନେତ୍ରୀ ସ୍ମୃତି ପଟ୍ଟନାୟକ, ସୁଷମା ବିଶ୍ୱାଳ ପ୍ରମୁଖ ପ୍ରାର୍ଥୀ ସୂର୍ଯ୍ୟବଂଶୀଙ୍କ ପାଇଁ ପ୍ରଚାର ଅଭିଯାନରେ ସାମିଲ ଅଛନ୍ତି।