ଭୁବନେଶ୍ୱର,୧୧।୧୨(ବ୍ୟୁରୋ): ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡାଙ୍କୁ ରାଜ୍ୟ ସଭାପତି ସମୀର ମହାନ୍ତି ଗତ ବୁଧବାର ନୂଆଦିଲ୍ଲୀଠାରେ ସାକ୍ଷାତ୍ କରିଛନ୍ତି। ଆଲୋଚନା ବେଳେ ସାମ୍ପ୍ରତିକ ରାଜନୈତିକ ପରିସ୍ଥିତି, ଦଳର ସାଙ୍ଗଠନିକ କାର୍ଯ୍ୟ, ରାଜ୍ୟର ବିପର୍ଯ୍ୟସ୍ତ ଆଇନଶୃଙ୍ଖଳା, ମହିଳାଙ୍କ ପ୍ରତି ନିର୍ଯାତନା ଓ ବିଭିନ୍ନ ପ୍ରସଙ୍ଗରେ କଥା ହୋଇଥିବା ଦଳର ରାଜ୍ୟ ସାଧାରଣ ସମ୍ପାଦକ ଗୋଲକ ମହାପାତ୍ର ପ୍ରେସ୍ ବିଜ୍ଞପ୍ତି ଜରିଆରେ ସୂଚନା ଦେଇଛନ୍ତି।
ଗୋଲକ କହିଛନ୍ତି, ରାଜ୍ୟ ସଭାପତି ସେଠାରେ ଅବଗତ କରିଛନ୍ତି, ରାଜ୍ୟରେ ଶାସକ ଦଳ ଏକଚ୍ଛତ୍ରବାଦ ଶାସନ ଚଲାଇଥିବା ବେଳେ ବିଶେଷ ଭାବେ ମହିଳା ଓ ଶିଶୁ ନିର୍ଯାତନାର ଶିକାର ହେଉଛନ୍ତି। ନୟାଗଡ଼ ଜିଲାର ଶିଶୁ ପରୀ ଘଟଣା ସହିତ ଶିକ୍ଷୟିତ୍ରୀ ମମିତା ମେହେରଙ୍କୁ ନ୍ୟାୟ ପାଇଁ ଦଳ ପକ୍ଷରୁ ଗତ ୨ ମାସ ଧରି ଆନ୍ଦୋଳନ ଜାରି ରହିଛି। ଏହି ୨ ଘଟଣାରେ ଦୁଇଜଣ ମନ୍ତ୍ରୀଙ୍କ ସମ୍ପୃକ୍ତି ଥିବା ଜଣାଇଛନ୍ତି। ସେହିପରି ପ୍ରଧାନମନ୍ତ୍ରୀ ଆବାସ ଯୋଜନାର କେଳେଙ୍କାରୀରେ ପ୍ରତିବାଦ କରିବାରୁ ୨ ଜଣ କାର୍ଯ୍ୟକର୍ତ୍ତାଙ୍କୁ ହତ୍ୟା କରାଯାଇଛି। ଏହି ଘଟଣାରେ ଆଇନମନ୍ତ୍ରୀ ପ୍ରତାପ ଜେନା ଲିପ୍ତଥିବା କଥା କହିଛନ୍ତି। ଏହା ବ୍ୟତୀତ ଆଦିବାସୀ ଜିଲାର ବିକାଶ ପାଇଁ ଗଠନ ହୋଇଥିବା ଜିଲା ଖଣିଜ ପାଣ୍ଠି(ଡିଏମ୍ଏଫ୍)କୁ ବିନା ଟେଣ୍ଡରରେ ଦଳୀୟ କାମରେ ଲଗାଇ ସରକାରୀ ଦଳ ଏହି ଅର୍ଥର ଅପବ୍ୟବହାର କରୁଥିବା କଥା ଅବଗତ କରାଯାଇଛି। ଦଳର ସଙ୍ଗଠନାତ୍ମକ କାର୍ଯ୍ୟର ଅଗ୍ରଗତି ତଥା ଆଗାମୀ ଦିନରେ କିଭଳି ଦଳର ସଙ୍ଗଠନ ତୃଣମୂଳସ୍ତରରେ ମଜଭୁତ ହେବା ସହ ଅଧିକରୁ ଅଧିକ ନାଗରିକ ଯୋଡିହେବେ ସେ ବିଷୟରେ ମଧ୍ୟ ଆଲୋଚନା କରିଛନ୍ତି।
