ଶାରଜା, ୨୨।୯: ଆଇପିଏଲ୍-୧୩ର ୪ର୍ଥ ମୁକାବିଲାରେ ମଙ୍ଗଳାବର ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱାଧୀନ ଚେନ୍ନାଇ ସୁପର୍ କିଙ୍ଗ୍ସ ଓ ରାଜସ୍ଥାନ ରୟାଲ୍ସ ସାମ୍ନାସାମ୍ନି ହୋଇଛନ୍ତି। ଏଥିରେ ଟସ୍ ହାରି ପ୍ରଥମେ ବ୍ୟାଟିଂ ଆମନ୍ତ୍ରଣ ପାଇଥିବା ରାଜସ୍ଥାନ ନିର୍ଦ୍ଧାରିତ ୨୦ ଓଭରରେ ୭ ଉଇକେଟ୍ ହରାଇ ୨୧୬ ରନ୍ ସଂଗ୍ରହ କରିଛି। ଫଳରେ ଚେନ୍ନାଇ ସାମ୍ନାରେ ବିଜୟ ଲାଗି ୨୧୭ ରନର ଟାର୍ଗେଟ୍ ଧାର୍ଯ୍ୟ କରିଛି ରାଜସ୍ଥାନ। ରୟାଲ୍ସ ପକ୍ଷରୁ ଅଧିନାୟକ ଷ୍ଟିଭ ସ୍ମିଥ୍ (୬୯ ରନ, ୪୭ ବଲ) ଓ ଉଇକେଟ୍କିପର ସଞ୍ଜୁ ସାମ୍ସନ (୭୪ ରନ୍ ୩୨ ବଲ୍) ଦମ୍ଦାର ଅର୍ଦ୍ଧଶତକୀୟ ଇନିଂସ ଖେଳିଥିଲେ। ସଞ୍ଜୁ ତାଙ୍କ ୩୨ ବଲର ଇନିଂସ ମଧ୍ୟରେ ୯ ଛକା ଓ ଗୋଟିଏ ଚୌକା ମାରିଥିଲେ। ଏହି ଉଦୀୟମାନ ଉଇକେଟ୍କିପର ବ୍ୟାଟ୍ସମ୍ୟାନ ମାତ୍ର ୧୯ ବଲରେ ଅର୍ଦ୍ଧଶତକ ହାସଲ କରିଥିଲେ। ଶେଷ ଭାଗରେ ଜୋଫ୍ରା ଆର୍ଚର (୮ ବଲ୍, ୨୭ ରନ୍, ୪ ଛକା) ମଧ୍ୟ ବିସ୍ଫୋରକ ବ୍ୟାଟିଂ କରିଥିଲେ। ଅନ୍ୟମାନଙ୍କ ମଧ୍ୟରେ ଡେଭିଡ୍ ମିଲର (୦), ରବିନ ଉଥପ୍ପା (୫) ନିରାଶ କରିଥିଲେ। ଚେନ୍ନାଇ ପକ୍ଷରୁ ସାମ୍ କୁରାନ (୪-୦-୩୩-୩) ସଫଳ ବୋଲର ରହିଥିଲେ।
