କୁଜଙ୍ଗ,୮।୭(ମନୋଜ ପ୍ରଧାନ):ପାରାଦୀପର ପୂର୍ବତନ ବିଜେଡି ବିଧାୟକ ସମ୍ବିତ ରାଉତରାୟ ରବିବାର ଭୁବନେଶ୍ୱରଠାରେ ଗତ ନିର୍ବାଚନରେ ଦଳ ହାରିବାର କାରଣ ସମ୍ପର୍କରେ ଦେଇଥିବା ମନ୍ତବ୍ୟ ଏବେ ବିଜେଡିରେ ଆଲୋଡ଼ନ ସୃଷ୍ଟି କରିଛି। ସେ ଗଣମାଧ୍ୟମ ସମ୍ମୁଖରେ କହିଛନ୍ତି, ‘ଢୋଲ ଭିତରେ ଥିବା ମୂଷା’ ପାଇଁ ନବୀନ ପଟ୍ଟନାୟକଙ୍କ ନେତୃତ୍ୱାଧୀନ ସରକାର ହାରିଲା। ତାଙ୍କ ମନ୍ତବ୍ୟ ଦଳ ଭିତରେ ଥାଇ କେତେ ଜଣ ନେତା ନିର୍ବାଚନରେ ଅନ୍ତର୍ଘାତୀ କାର୍ଯ୍ୟ କରିଥିବା ବିଷୟକୁ ଇଙ୍ଗିତ କରୁଛି। ତେବେ ଦଳବିରୋଧୀ କାର୍ଯ୍ୟ କରିଥିବା ନେତାଙ୍କ ନାମ ପ୍ରକାଶ କରିବାକୁ ସମ୍ବିତ ମନା କରିଦେଇଛନ୍ତି। ସ୍ତ୍ରୀ ଗୀତାଞ୍ଜଳି ରାଉତରାୟଙ୍କ ପରାଜୟ ସମ୍ପର୍କରେ ସେ କହିଛନ୍ତି, ଏବେବି ନବୀନ ପଟ୍ଟନାୟକ ଓଡ଼ିଶାବାସୀଙ୍କ ହୃଦୟରେ ଅଛନ୍ତି। ନବୀନ ପଟ୍ଟନାୟକଙ୍କ ବ୍ୟକ୍ତିତ୍ୱ ସମସ୍ତଙ୍କ ହୃଦୟରେ ରହି ମଧ୍ୟ ଦଳ ହାରିଲା। ସେଭଳି ସ୍ଥିତି ପାରାଦୀପରେ ଘଟିଲା ବୋଲି ସମ୍ବିତ କହିଛନ୍ତି।
ସମ୍ପର୍କରେ ଜଗତ୍ସିଂହପୁର ଜିଲା ବିଜେଡି ଉପସଭାପତି ପୀତାମ୍ବର ତରାଇଙ୍କ ଦୃଷ୍ଟି ଆକର୍ଷଣ କରିବାରେ ସେ କହିଛନ୍ତି, ସମ୍ବିତ ଯଦି ଢୋଲ ଭିତରେ ଥିବା ମୂଷାକୁ ଚିହ୍ନିଥିଲେ ତାକୁ ଦୂରେଇ ରଖିଲେ ନାହିଁ କାହିଁକି । ଏବେ ନିର୍ବାଚନର ମାସକ ପରେ ଏଭଳି ବିବୃତି ଦେବା ଠିକ୍ ନୁହେଁ । ଏହା କେବଳ ଦଳୀୟ କନ୍ଦଳ ବଢ଼ାଇବା ଛଡ଼ା ଆଉ କିଛି ନୁହେଁ। ତେବେ ଏ ବିଷୟରେ ଦଳୀୟସ୍ତରରୁ କୌଣସି ପ୍ରତିକ୍ରିୟା ପ୍ରକାଶ ପାଇ ନ ଥିବା ବେଳେ ଆଗକୁ ବିଜେଡି ଭିତରେ ସମ୍ବିତଙ୍କ ମନ୍ତବ୍ୟ କିଭଳି ରୂପ ଧାରଣ କରିବ ତାହାକୁ ଦେଖିବା ବାକି ରହିଲା। ଅପରପକ୍ଷେ ନୂଆ ସରକାର ବିଷୟରେ ପଚରାଯିବାରୁ ସମ୍ବିତ କୌଣସି ଟିପ୍ପଣୀ ଦେବାକୁ ମନା କରିଦେଇଛନ୍ତି ।
